• ໃບອະນຸຍາດແລ່ນລົດ (ໃບສີບົວ) ທີ່ທຸກທ່ານຄວນຮູ້ກ່ອນຖືກປັບໃໝ

ໂດຍ: Admin Mahason 10 ມັງກອນ 2019 (09.46 ນ.) Read : 2,145

     ຕໍ່ເນື່ອງຈາກໂພສເຟສບຸກຂອງນັກທຸລະກິດຊື່ດັງ ທີ່ໄດ້ໂພສກ່ຽວກັບຕຳຫຼວດຂໍເບິ່ງໃບອະນຸຍາດແລ່ນລົດ (ໃບສີບົວ) ຈົນເຖິງຂັ້ນຖືກປັບໃໝ ຢູ່ເສັ້ນທາງສະຫວັນນະເຂດຫາເມືອງທ່າແຂກ, ສະນັ້ນ ມື້ນີ້ ເຮົາເລີຍໄດ້ນຳເອົາຫົວຂໍ້ນີ້ນຳມາໃຫ້ທ່ານຜູ້ອ່ານທັງຫຼາຍໄດ້ທຳຄວາມເຂົ້າໃຈ ແລະ ຮັບຊາບນຳກັນດັ່ງລຸ່ມນີ້:

ຕຳຫຼວດຈະລາຈອນກັກລົດຈິບນັກທຸລະກິດດັງພ້ອມປັບໃໝ ອ້າງບໍ່ມີ “ໃບອະນຸຍາດແລ່ນລົດຂົນສົ່ງຮັບຈ້າງ”

     ຍ້ອນເບິ່ງການຕອບຄຳຖາມຂອງກົມຂົນສົ່ງຕໍ່ປະຊາຊົນ ເລື່ອງ ທີ່ມີຕໍ່ຂະແໜງ ຍທຂ ຜ່ານທາງໂທລະສັບສາຍດ່ວນ 1518 ໂດຍອີງຕາມການແຈ້ງການຂອງຫ້ອງການກະຊວງໂຍທາທິການ ແລະ ຂົນສົ່ງ ສະບັບເລກທີ 23427/ຫກ.ສລ ລົງວັນທີ 3 ພະຈິກ 2017 ກົມຂົນສົ່ງ ຂໍມີຄຳເຫັນຕໍ່ຄຳຖານຂອງປະຊາຊົນທີ່ຜ່ານທາງໂທລະສັບສາຍດ່ວນ 1518 ຕໍ່ຂະແໜງ ຍທຂ ດັ່ງນີ້: ປະຊາຊົນ ສອບຖາມເລື່ອງລົດປ້າຍຂາວ ຕົວໜັງສືສີດຳ (ລົດຜ່ອນ) ຕາມລະບຽບກົດໝາຍ ຕ້ອງມີໃບອະນຸຍາດແລ່ນລົດ (ບໍ່ແມ່ນນຳໃຊ້ລົດ) ຫຼື ບໍ່?

     ຕາມກົດໝາຍວ່າດ້ວຍການຂົນສົ່ງທາງບົກ ສະບັບເລກທີ 24/ສພຊ, ລົງວັນທີ 12 ທັນວາ 2012 ໄດ້ກຳນົດໃນມາດຕາ 17 ການຂົນສົ່ງສະເພາະ ຖືກຕ້ອງຕາມປະເພດ, ຂອບເຂດ ຂອງການຂົນສົ່ງ ແລະ ມາດຕະຖານເຕັກນິກຂອງລົດ ໃນກໍລະນີມີການປ່ຽນແປງປະເພດ ຫຼື ຂອບເຂດການຂົນສົ່ງ ຕ້ອງຂໍໃບອະນຸຍາດແລ່ນລົດໃໝ່, ເວົ້າລວມແລ້ວ ລົດທີ່ເຮັດການຜະລິດການຂົນສົ່ງທາງກົງ ຂອງການຂົນສົ່ງຮັບຈ້າງ ແລະ ການຂົນສົ່ງສະເພາະ ຕ້ອງມີໃບອະນຸຍາດແລ່ນ, ສ່ວນລົດບໍລິຫານປ້າຍຂາວ ຕົວໜັງສືສີດຳ ຮັບໃຊ້ບໍລິຫານເຊັ່ນ: ລົດເກງ, ລົດກະບະ, ລົດຈິບ ເຮັດການຜະລິດທາງອ້ອມ ແມ່ນບໍ່ມີໃບອະນຸຍາດແລ່ນລົດ.

     ປັດຈຸບັນ ກົມຂົນສົ່ງ ໄດ້ສົມທົບກັບກົມນິຕິກຳ ກະຊວງ ກຳລັງລົງເຜີຍແຜ່ ກົດໝາຍວ່າດ້ວຍການຂົນສົ່ງທາງບົກ ຢູ່ບັນດາແຂວງພາກເໜືອ, ພາກກາງ ແລະ ແຂວງພາກໃຕ້ ກໍ່ໄດ້ເນັ້ນບັນຫານີ້ເປັນພິເສດ ເພື່ອໃຫ້ເຈົ້າໜ້າທີ່ ທີ່ກວດກາເຂົ້າໃຈເປັນເອກະພາບກັນໃນຂອບເຂດທົ່ວປະເທດ.

     ສະຫຼຸບ: ລົດທີ່ຕ້ອງຂໍໃບອະນຸຍາດແລ່ນລົດປະກອບມີ ລົດຂົນສົ່ງຮັບຈ້າງ ເຊິ່ງເປັນລົດທີ່ໃຫ້ບໍລິການຂົນສົ່ງຜູ້ໂດຍສານ, ສິນຄ້າ, ວັດຖຸເຄື່ອງຂອງ, ສັດ ຢູ່ພາຍໃນປະເທດ ຫຼື ຂ້າມແດນ ໂດຍມີການຈ່າຍຄ່າຂົນສົ່ງ ຕົວຢ່າງ: ລົດເມໂດຍສານ, ລົດແທັກຊີ, ລົດຂົນສົ່ງສິນຄ້າ ເປັນຕົ້ນ ແລະ ອີກປະເພດໜຶ່ງທີ່ຕ້ອງມີໃບ 

     ອະນຸຍາດແລ່ນລົດແມ່ນ ລົດຂົນສົ່ງສະເພາະ ເຊິ່ງເປັນລົດທີ່ໃຊ້ຂົນສົ່ງຄົນ, ສິນຄ້າ, ວັດຖຸເຄື່ອງຂອງ, ສັດ ເພື່ອຮັບໃຊ້ພາຍໃນການຈັດຕັ້ງໃດໜຶ່ງ ຕົວຢ່າງ: ທຸລະກິດທ່ອງທ່ຽວ, ນໍ້າມັນເຊື້ອໄຟ, ລົດຂົນສົ່ງສິນຄ້າຂອງບໍລິສັດໃດໜຶ່ງ, ລົດຮັບສົ່ງພະນັກງານ ເປັນຕົ້ນ


ທີ່ມາ: https://update.kaomai.co/21255/?fbclid=IwAR1lKop6H2r5HNNSr-2d_09v0UfI9nWvNWHpMgrPo-vHJyRWIA8F2fcEseU
  • ແທັກທີ່ກ່ຽວຂ້ອງ