• ສັນຍາກໍ່ສ້າງ ໂຮງໝໍ ກະເສມຣາດ ອິນເຕີເນຊັ່ນເນວ ວຽງຈັນ

ໂດຍ: ສີເປື້ອນມື 09 ມັງກອນ 2019 (14.43 ນ.) Read : 436

ໃນວັນທີ 08 ມັງກອນ 2019 ຜ່ານມາທາງບໍລິສັດ ບາງກອກເຊນ ອິນເຕີເນຊັ່ນເນວ (ລາວ) ຈໍາກັດ ຮ່ວມກັບ ບໍລິສັດ ປະຊາໂຊກ ກໍ່ສ້າງເຄຫະສະຖານ ຈໍາກັດ ໄດ້ຈັດພິທີເຊັນສັນຍາກໍ່ສ້າງ ໂຮງໝໍ ກະເສມຣາດ ອິນເຕີເນຊັ່ນເນວ ວຽງຈັນ ທີ່ໂຮງແຮມ ຄລາວ ພລາຊາ ວຽງຈັນ. ໃຫ້ກຽດເຂົ້າຮ່ວມໄດ້ແກ່: ທ່ານ ຮສ. ດຣ. ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ, ທ່ານ ຊັດສະວັນ ສາຄອນສິນ ອຸປະທູດຮັກສາການເອກອັກຄະລັດຖະທູດແຫ່ງຣາຊອານາຈັກໄທ ປະຈໍາ ສປປ ລາວ, ທ່ານ ຮສ. ດຣ. ນາຍແພດ ສະເຫຼີມ ຫານພານິດ ຜູ້ອໍານວຍການໃຫຍ່ ບໍລິສັດ ບາງກອກເຊນ ອິນເຕີຣ໌ເນຊັ່ນເນວ (ລາວ) ຈໍາກັດ, ທ່ານ ຄິດຕະພອນ ສຸພາບ ຜູ້ອໍານວຍການ ບໍລິສັດ ປະຊາໂຊກ ກໍ່ສ້າງເຄຫະສະຖານ ຈໍາກັດ, ທ່ານ ຄໍາພັນ ສຸພາບ ຜູ້ອໍານວຍການ ບໍລິສັດ ມະຫານະຄອນ ຈໍາກັດ ແລະທ່ານ ນາງ ວະລີ ເວດສະພົງ ຮອງຜູ້ອໍານວຍການໃຫຍ່ ບໍລິສັດ ບາງກອກເຊນ ອິນເຕີເນຊັ່ນເນວ (ລາວ) ຈໍາກັດ ແລະແຂກທີ່ຖືກເຊີນ ເພື່ອເຂົ້າຮ່ວມເປັນສັກຂີພະຍານ.

ບໍລິສັດ ບາງກອກເຊນ ອິນເຕີເນຊັ່ນເນວ (ລາວ) ຈໍາກັດ ໃນນາມຜູ້ບໍລິຫານ ໂຮງໝໍ ກະເສມຣາດ ອິນເຕີເນຊັ່ນເນວ ວຽງຈັນ ໄດ້ມອບໝາຍໃຫ້ ບໍລິສັດ ປະຊາໂຊກ ກໍ່ສ້າງເຄຫະສະຖານ ຈໍາກັດ ເປັນຜູ້ຮັບເໝົາກໍ່ສ້າງໂຮງໝໍດັ່ງກ່າວ ເຊິ່ງເປັນໂຮງໝໍທີ່ມີຂະໜາດໃຫຍ່ ແລະທັນສະໄໝທຽບເທົ່າສາກົນ. ໂຮງໝໍ ກະເສມຣາດ ອິນເຕີເນຊັ່ນເນວ ວຽງຈັນ ຕັ້ງຢູ່ບ້ານ ດອນນົກຂຸ້ມ ເມືອງ ສີສັດຕະນາກ ນະຄອນຫຼວງວຽງຈັນ, ມີເນື້ອທີ່ 1.92 ຮຕ, ມີຂະໜາດ 12 ຊັ້ນ, ມີ 144 ຫ້ອງ ແລະ 254 ຕຽງ. ສໍາລັບການກໍ່ສ້າງໄດ້ແບ່ງອອກເປັນ 2 ໄລຍະ ແລະການກໍ່ສ້າງໄລຍະທໍາອິດຈະສໍາເລັດໃນປີ 2020 ມີມູນຄ່າການກໍ່ສ້າງເກືອບ 160 ຕື້ກີບ ສະເພາະໂຄງສ້າງ ແລະການຕົບແຕ່ງພາຍນອກ-ໃນ. ເມື່ອສໍາເລັດໄລຍະທໍາອິດແລ້ວ ກໍຈະສືບຕໍ່ກໍ່ສ້າງໄລຍະທີ 2 ເພື່ອເຮັດໃຫ້ໂຄງການກໍ່ສ້າງສໍາເລັດຢ່າງສົມບູນ ແລະໄດ້ເປີດໃຫ້ມວນຊົນໄດ້ເຂົ້າໄປນໍາໃຊ້.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ