• ຝົນມາຜິດລະດູ ຜົ້ງສາລີ ຝົນຕົກໜັກຖ້ວມເຮືອນປະຊາຊົນ

ໂດຍ: Admin Mahason 09 ມັງກອນ 2019 (12.59 ນ.) Read : 1,206

     ໄລຍະວັນທີ 7 – 8 ມັງກອນ ປີ 2019 ຢູ່ແຂວງພາກເໜືອ ມີຫລາຍພື້ນທີ່ເກີດຝົນຕົກຕິດຕໍ່ກັນໂດຍສະເພາະແມ່ນຢູ່ ແຂວງຜົ້ງສາລີ ຈົນເກີດມີນໍ້າຖ້ວມເຮືອນປະຊາຊົນຈໍານວນໜື່ງ, ອຸຕຸລາຍງານວັດປະລິມານນໍ້າຝົນຂອງວັນທີ 8 ມັງກອນຜ່ານມາຢູ່ທີ່ 58,0 ມິນລີແມັດ.

     ທີມຂ່າວຫນັງສືພີມ ເສດຖະກິດ - ການຄ້າ ໄດ້ໂທສຳພາດ ພໍ່ ໄມ່ແພງ ປະຊາຊົນບ້ານງາຍເໜືອ ເມືອງບຸນເໜືອ ແຂວງຜົ້ງສາລີ ໃຫ້ຮູ້ວ່າ: ເກີດຝົນຕົກຫນັກຕິດຕໍ່ກັນເປັນເວລາ 2 ວັນ ຢູ່ເຂດບ້ານງາຍເໜືອ ເຮັດໃຫ້ປະລິມານນໍ້າງາຍເພີ່ມຂື້ນເປັນຈຳນວນຫຼາຍຈົນໄຫຼເຂົ້າຖ້ວມເຮືອນປະຊາຊົນເປັນຈຳນວນ 6 ຫລັງຄາເຮືອນແລ້ວ ແລະ ມາຮອດປະຈຸບັນ ( ວັນທີ 8 ມັງກອນ ) ຝົນຍັງບໍ່ມີທ່າທີຈະຢຸດ ຖ້າເປັນແບບນີ້ຄາດວ່ານໍ້າຈະສືບຕໍ່ຖ້ວມເຮືອນປະຊາຊົນອີກຫຼາຍຫຼັງຄາເຮືອນ.

     ດ້ານ ທ່ານ ພອນພະຈັນ ກົດສີດາ ວິຊາການຂະແໜງຊັບພະຍາກອນນໍ້າ ແລະ ອຸຕຸ ແຂວງຜົ້ງສາລີ ໃຫ້ຮູ້ວ່າ: ທີ່ແຂວງຜົ້ງສາລີ ໄດ້ມີຝົນຕົກ ແລະ ຟ້າຮ້ອງ ມາແຕ່ວັນທີ7 ມັງກອນ ຊີ່ງເລີ້ມແຕ່ເວລາປະມານ 18:00 ໂມງ ຝົນໄດ້ຕົກລົງມາ ແລະ ຕິດຕໍ່ກັນຈົນຮອດປະຈຸບັນ ເວລາ 15:30 ໂມງ ວັນທີ 8 ມັງກອນ ກໍຍັງບໍ່ຢຸດເຊົາ ແລະ ຕາມການວັດປະລິມານນໍ້າຝົນ ເລີ່ມແຕ່ 7:00 – 12:00 ໂມງ ວັດໄດ້ປະລິມານ 19,0 ມິນລີແມັດ ເຊີ່ງເຫດການຝົນຕົກຫນັກໃນລະດູແລ້ງແບບນີ້ ແມ່ນບໍ່ເຄີຍປາກົດເຫັນມາກ່ອນ. ພ້ອມດຽວກັນນີ້, ກໍຄາດວ່າທີ່ ແຂວງຜົ້ງສາລີ ຍັງຈະມີຝົນຕົກຕໍ່ອີກໃນ 2 ວັນຕໍ່ຫນ້າ.

     ໃນຂະນະທີ່ກົມອຸຕຸນິຍົມ ແລະ ອຸທົກກະສາດ ລາຍງານການວັດປະລິມານນໍ້າຝົນແຂວງຜົ້ງສາລີ ໃນວັນທີ 7 ຫາ 10 ມັງກອນນີ້ ຈະມີຝົນຕົກ, ຟ້າຮ້ອງໃນລະດັບຄ່ອຍ ຫາ ປານກາງຢູ່ບາງທ້ອງຖິ່ນແຂວງຜົ້ງສາລີ, ຫົວພັນ ແລະ ຊຽງຂວາງ.


ທີ່ມາ: ເສດຖະກິດການຄ້າ
  • ຮູບພາບ

  • ແທັກທີ່ກ່ຽວຂ້ອງ