• ຖະແຫລງຂ່າວ ຜົນສຳເລັດກອງປະຊຸມຄັງທີ 41 ປະຈໍາປີ 2019 ຂອງຄະນະກຳມາທິການຮ່ວມມືລາວ-ຫວຽດນາມ

ໂດຍ: Admin Mahason 08 ມັງກອນ 2019 (09.24 ນ.) Read : 144

     ຂປລ. ວັນທີ 6 ມັງກອນ 2019, ທີ່ນະຄອນຫລວງຮ່າໂນ້ຍ ສສ ຫວຽດນາມ; ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ຮ່ວມຖະແຫລງຂ່າວກັບທ່ານ ຫງວຽນ ຊວັນ ຟຸກ ນາຍົກລັດຖະມົນຕີ ແຫ່ງ ສສ ຫວຽດນາມ ພາຍຫລັງສຳເລັດກອງປະຊຸມຄະນະກຳມາທິການຮ່ວມມື ລາວ-ຫວຽດນາມ ຄັ້ງທີ 41 ໂດຍໄດ້ຕີລາຄາສູງເຖິງຜົນສຳເລັດຂອງກອງປະຊຸມດັ່ງກ່າວ ເຊິ່ງກ່ອນອື່ນໝົດແມ່ນທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ສະແດງຄວາມປິຕິຍິນດີ ທີ່ໄດ້ເດີນທາງມາຢ້ຽມຢາມ ສສ ຫວຽດນາມ ອີກຄັ້ງໜຶ່ງ ແລະໄດ້ຮ່ວມກັບສະຫາຍ ນາຍົກລັດຖະມົນຕີ ຫງວຽນ ຊວັນ ຟຸກ ເປັນປະທານຮ່ວມຊີ້ນຳກອງປະຊຸມ ຄັ້ງທີ 41 ຂອງຄະນະກຳມະການຮ່ວມມືທະວີພາຄີ ລະຫວ່າງ ລັດຖະບານແຫ່ງ ສປປ ລາວ ແລະລັດຖະບານ ແຫ່ງ ສສ ຫວຽດນາມ ປະຈຳປີ 2019; ສະແດງຄວາມຂອບໃຈ ພັກ, ລັດ ແລະປະຊາຊົນ ຫວຽດນາມ ທີ່ໄດ້ໃຫ້ການຕ້ອນຮັບຢ່າງອົບອຸ່ນທີ່ສຸດ.

     ທ່ານ ທອງລຸນ ສີສຸລິດ ຍັງໄດ້ສະແດງຄວາມເປັນເອກະພາບກັບການຖະແຫລງຂອງນາຍົກລັດຖະມົນຕີ ຫງວຽນ ຊວັນ ຟຸກ ແລະ ມີຄຳເຫັນເພີ່ມໃນບາງຈຸດຄື: ສອງຝ່າຍຕີລາຄາຕໍ່ບັນດາຜົນສຳເລັດຂອງການຈັດຕັ້ງປະຕິບັດຂໍ້ຕົກລົງແຜນການຮ່ວມມືໃນປີ 2018 ກໍຄື ທິດທາງແຜນການຮ່ວມມື ໃນປີ 2019; ເອົາໃຈໃສ່ເພີ່ມທະວີ ຍົກສູງປະສິດທິຜົນການຮ່ວມມື ທີ່ດີຢູ່ແລ້ວ ໃຫ້ຢູ່ໃນລະດັບສູງໃໝ່ ທີ່ດີຂຶ້ນກວ່າເກົ່າ; ມູນຄ່າການຄ້າຂອງສອງປະເທດໃນປີ 2018 ບັນລຸໄດ້ 1 ຕື້ໂດລາ, ເພີ່ມຂຶ້ນ 13% ທຽບໃສ່ປີ 2017 ລື່ນຄາດໝາຍຕາມການຕົກລົງຂອງລັດຖະບານ ແລະໃນປີ 2019 ນີ້ ກໍ່ໄດ້ວາງຄາດ ໝາຍສູ້ຊົນເພີ່ມຂຶ້ນ 10% ຂຶ້ນໄປ; ການລົງທຶນຂອງວິສາຫະກິດຫວຽດນາມຢູ່ລາວ ມາຮອດປັດຈຸບັນຈັດຢູ່ໃນອັນດັບແຖວໜ້າໃນບັນດາປະເທດ ທີ່ເຂົ້າມາລົງທຶນໃນລາວ, ສິ່ງທີ່ໜ້າຊົມເຊີຍ ແມ່ນເຂື່ອນໄຟຟ້າເຊຂະໝານ 1 ແລະເຊຂະໝານຊານໄຊ ໄດ້ດຳເນີນການຜະລິດຂາຍກະແສໄຟຟ້າໄປຫວຽດນາມ ແລະ ສ້າງລາຍຮັບເຂົ້າງົບປະມານໃຫ້ແກ່ລາວຈຳນວນໜຶ່ງ; ສປປ ລາວ ຕີລາຄາສູງຄວາມພະຍາຍາມຂອງສອງຝ່າຍໃນການຮ່ວມມືກັນຈັດຕັັ້ງຜັນຂະຫຍາຍໂຄງການຮ່ວມມືພັດທະນາທ່າທຽບເຮືອ ຫວຸງອ່າງ 1,2,3 ແລະການຕົກລົງຊື້-ຂາຍໄຟຟ້າ. ເຊື່ອໝັ້ນວ່າ ຫລັງສອງຝ່າຍໄດ້ມີການຊື້ຂາຍໄຟຟ້າຮ່ວມກັນຈະເຮັດໃຫ້ມູນຄ່າການຄ້າສອງຝ່າຍເພີ່ມຫລາຍຂຶ້ນ. ຂະແໜງພະລັງງານເປັນຂະແໜງທີ່ມີຄວາມບົ່ມຊ້ອນຂອງການຮ່ວມມືສອງຝ່າຍ ທີ່ຈະເຮັດໃຫ້ມູນຄ່າການຄ້າສອງປະເທດປະຕິບັດໄດ້ລື່ນຄາດໝາຍ; ປີ 2018, ລັດຖະບານຫວຽດນາມ ໄດ້ຊ່ວຍທຶນກໍ່ສ້າງບຸກຄະລາກອນໄປຮຽນຢູ່ຫວຽດນາມ 1.271 ທຶນ ແລະແຜນປີ 2019 ກໍຍັງສືບຕໍ່ຊ່ວຍພັດທະນາຊັບພະຍາກອນມະນຸດໃຫ້ແກ່ລາວ 1.273 ທຶນ. ສອງຝ່າຍຈະຮ່ວມກັນເອົາໃຈໃສ່ຍົກຄຸນນະພາບການຄັດເລືອກນັກສຶກສາໄປຮຽນຕໍ່ຢູ່ຫວຽດນາມໃນຮູບແບບທຶນແລກປ່ຽນລະຫວ່າງແຂວງ ແລະທຶນສ່ວນຕົວ. ສະແດງຄວາມຂອບໃຈຝ່າຍຫວຽດນາມທີ່ໄດ້ໃຫ້ເງິນກູ້ດອກເບ້ຍຜ່ອນຜັນເພື່ອໄປຈັດຕັ້ງໂຄງການພັດທະນາພື້ນຖານໂຄງລ່າງຢູ່ບັນດາແຂວງທີ່ເສັ້ນທາງຍັງມີຄວາມຫຍຸ້ງຍາກ.


     ສອງນາຍົກລັດຖະມົນຕີ ໄດ້ເຂົ້າຮ່ວມເປັນສັກຂີພິຍານໃນການລົງນາມເອກະສານຮ່ວມມື 7 ສະບັບ. ນອກນັ້ນຝ່າຍຫວຽດນາມໄດ້ມອບໃບຢັ້ງຢືນຮັບຊື້ໄຟຟ້າຈາກໂຄງການໄຟຟ້ານໍ້າຊໍາ (ລາວ).
ສອງຝ່າຍເຊື່ອໝັ້ນວ່າ, ຜົນສຳເລັດກອງປະຊຸມຄັ້ງນີ້ລວມທັງບັນດາເອກະສານທັງໝົດທີ່ໄດ້ລົງນາມໃນໂອກາດນີ້ຈະປະກອບສ່ວນສຳຄັນໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລາວ-ຫວຽດນາມ ທີ່ຢູ່ໃນລະດັບສູງສຸດຢູ່ແລ້ວຈະຮັບການຍົກສູງຂຶ້ນສູ່ລະດັບສູງໃໝ່ໃນປີ 2019.

ຂໍ້ມູນຈາກ: ປະເທດລາວ

 


ທີ່ມາ: ຂໍ້ມູນຈາກ: ປະເທດລາວ
  • ແທັກທີ່ກ່ຽວຂ້ອງ