• ສົກແລ້ວ ແຂວງເຊກອງເກັບລາຍຮັບໄດ້ 76 ຕື້ກວ່າກີບ

ໂດຍ: Admin Mahason 06 ພະຈິກ 2017 (12.20 ນ.) Read : 523

ໃນສົກງົບປະມານ 2015-2016 ຜ່ານມາ ພະແນກການເງິນແຂວງເຊກອງ ສາມາດຍາດໄດ້ຜົນງານທີ່ພົ້ນເດັ່ນໃນຫຼາຍໆດ້ານ ແລະ ໜຶ່ງໃນນັ້ນກໍຄືວຽກງານການເກັບລາຍຮັບເຂົ້າງົບປະມານ ຊຶ່ງສາມາດປະຕິບັດໄດ້ 76 ຕື້ກວ່າກີບລື່ນແຜນ 25% ໂດຍສ່ວນໃຫຍ່ໄດ້ຈາກສ່ວຍສາອາກອນ. ຂະນະທີ່ໃນໄລຍະ 9 ເດືອນ ຫຼື ໃນ 3 ໄຕມາດປີ 2017 ປະຕິບັດໄດ້ 78% ຄາດໝົດປີຈະເກັບໄດ້ຕາມແຜນການທີ່ວາງໄວ້.

ວັນທີ 3 ພະຈິກ 2017 ທີ່ຜ່ານມາ ພະແນກການເງິນແຂວງເຊກອງ ໄດ້ຈັດພິທີຮັບຮອງເອົາໜ່ວຍພັກພະແນກສ່ວຍສາອາກອນ, ໜ່ວຍພັກພະແນກການເງິນ ແລະ ໜ່ວຍພັກຄັງເງິນ-ຫ້ອງບັນຊີເປັນໜ່ວຍພັກແຂງ-ຮູ້ນຳພາຮອບດ້ານ ໂດຍແມ່ນສະຫາຍ ສີດາ ສຸວັນນະສາຍ ຮອງເລຂາພັກແຂວງ, ຮອງເຈົ້າແຂວງເຊກອງເປັນຜູ້ມອບ ແລະ ຕາງໜ້າຄະນະໜ່ວຍພັກທັງ 3 ໜ່ວຍເປັນຜູ້ຮັບ ໂດຍມີຂະແໜງການກ່ຽວຂ້ອງ, ແຂກຖືກເຊີນ ແລະ ສະມາຊິກພັກສົມບູນ-ສຳຮອງເຂົ້າຮ່ວມ.

ໃນພິທີຕາງໜ້າຄະນະໜ່ວຍພັກທັງ 3 ໜ່ວຍ ກໍໄດ້ຜັດປ່ຽນກັນຂຶ້ນລາຍງານການປະຕິບັດແຜນກໍ່ສ້າງໜ່ວຍພັກແຂງ-ຮູ້ນຳພາຮອບດ້ານປະຈຳປີ 2016 ຊຶ່ງຍາມໃດຄະນະໜ່ວຍພັກ ກໍໄດ້ເອົາໃຈໃສ່ສຶກສາອົບ¬ຮົມການ¬ເມືອງນຳພາແນວຄິດໃຫ້ສະ¬ມາ¬ຊິກພັກຢ່າງເປັນປົກກະຕິຕໍ່ເນື່ອງໄປພ້ອມໆກັບການດຳ¬ເນີນຊີ¬ວິດການເມືອງພາຍໃນພັກ ຕິດພັນກັບການກວດ¬ກາຕີລາ¬ຄາໜ່ວຍພັກແຂງຮູ້ນຳ¬ພາຮອບ¬ດ້ານ ໂດຍທັງ 3 ໜ່ວຍພັກ ມີສະມາຊິກພັກທັງໝົດ 89 ສະຫາຍ,ຍິງ 20 ສະຫາຍ, ສຳຮອງ 4 ສະຫາຍ.

ຜ່ານການຊີ້ນຳໆພາຂອງໜ່ວຍພັກ ແລະ ຄວາມເອົາໃຈໃສ່ປະຕິບັດໜ້າທີ່ວຽກງານວິຊາສະເພາະຂອງສະມາຊິກພັກ ກໍຄືພະນັກງານ-ລັດຖະກອນຕາມພາລະບົດບາດ, ຂອບເຂດສິດ ແລະ ໜ້າທີ່ຄວາມຮັບຜິດຊອບຂອງຕົນ ຊຶ່ງໃນສົກປີ 2015-2016 ຜ່ານມາ ສາມາດເກັບລາຍຮັບເຂົ້າງົບປະມານໄດ້ 76 ຕື້ກວ່າກີບເທົ່າກັບ 125,26% ຂອງແຜນປີ, ໃນນີ້ໄດ້ຈາກສ່ວຍສາອາກອນ 55,8 ຕື້ກວ່າກີບ, ຊັບສິນຂອງລັດ 7,8 ຕື້ກວ່າກີບ, ລາຍຮັບວິຊາການ 2,8 ຕື້ກວ່າກີບ, ພາສີ (ດ່ານທ້ອງຖິ່ນ-ດ່ານປະເພນີ) 1 ຕື້ກວ່າກີບ ແລະ ລາຍຮັບຈາກຄ່າທໍານຽມນໍາໃຊ້ທີ່ດິນ 931 ລ້ານກວ່າກີບ.

ສ່ວນດ້ານລາຍຈ່າຍ 375 ຕື້ກວ່າກີບເທົ່າກັບ 94,76% ຂອງແຜນປີ ໃນນີ້ປະກອບມີລາຍຈ່າຍເງິນເດືອນ 164 ຕື້ກີບ, ຮອງມາເງິນລົງທຶນກໍ່ສ້າງ 104 ຕື້ກວ່າກີບ, ເງິນອຸດໜູນເກືອບ 29 ຕື້ກີບ, ເງິນບໍລິຫານ 21,9 ຕື້ກວ່າກີບ, ເງິນດັດສົມ-ສົ່ງເສີມ 10 ຕື້ກວ່າກີບ, ເງິນບຳເນັດເກີນແຜນ 40 ຕື້ກວ່າກີບ ແລະ ອີກ 2 ຕື້ກວ່າກີບແມ່ນຈ່າຍຊື້ຊັບສົມບັດຮັບໃຊ້ບໍລິຫານ.

ເພື່ອຢັ້ງຢືນຜົນງານດັ່ງກ່າວ ສະຫາຍ ທອນສົມມັກ ຈັນທະສີດາ ເລຂາຄະນະພັກຮາກຖານ, ຫົວໜ້າພະແນກ ການເງິນແຂວງ ໄດ້ຂຶ້ນຜ່ານມະຕິຕົກລົງຂອງຄະນະປະຈຳພັກແຂວງວ່າດ້ວຍຕົກລົງຮັບຮອງເອົາ 3 ໜ່ວຍພັກ ເປັນໜ່ວຍພັກແຂງ-ຮູ້ນຳພາຮອບດ້ານປະຈຳປີ 2016 ແລະ ມະຕິຕົກລົງຂອງຄະນະປະຈຳພັກແຂວງວ່າດ້ວຍການມອບບັດໃຫ້ສະມາຊິກພັກສົມບູນທີ່ສັງກັດຢູ່ໜ່ວຍພັກພະແນກການເງິນຈຳນວນ 6 ສະຫາຍ.


ທີ່ມາ: ຂ່າວ-ພາບ : ສັນຍາ ແກ້ວໄຊຍະວົງ ແຂວງເຊກອງ
  • ແທັກທີ່ກ່ຽວຂ້ອງ