• ເຈົ້າໜ້າທີ່ ຍຶດສັດປ່າ ແລະຊິ້ນສ່ວນສັດປ່າ ທີ່ແຂວງບໍ່ແກ້ວ

ໂດຍ: ສີເປື້ອນມື 18 ທັນວາ 2018 (13.07 ນ.) Read : 193

ຜົນສະຫຼຸບໂດຍລວມ ຈາກກອງກວດກາປ່າໄມ້ ແຂວງບໍ່ແກ້ວ ກ່ຽວກັບການເຂົ້າກວດຄົ້ນຮ້ານຄ້າເປົ້າໝາຍ ໃນເຂດເສດຖະກິດພິເສດ ສາມລ່ຽມຄໍາ ແລະ ຮ້ານຄ້າ ເຂດເມືອງຕົ້ນເຜິ້ງ ແຂວງບໍ່ແກ້ວ ລວມທັງໝົດມີ 5 ຮ້ານ ພ້ອມຍຶດຂອງກາງທັ້ງໝົດ 32 ຢ່າງ ສ່ວນໃຫຍ່ເປັນຊິ້ນສ່ວນສັດປ່າ ທີ່ຜິດກົດໝາຍ.

ໃນເວລາປະມານ 2 ໂມງສວຍ ຂອງວັນທີ 13.12.2018 ທີ່ຜ່ານມາ ໜ່ວຍງານບັງຄັບໃຊ້ກົດໝາຍ ວ່າດ້ວຍສັດນໍ້າ-ສັດປ່າ ແຂວງບໍ່ແກ້ວ ພ້ອມເຈົ້າໜ້າທີ່ຈາກກົມກວດກາປ່າໄມ້ ແລະ ພາກສ່ວນທີ່ກ່ຽວຂ້ອງ ຈໍານວນ 50 ທ່ານ ເຂົ້າກວດຄົ້ນ 5 ຮ້ານເປົ້າໝາຍ; 3 ຮ້ານໃນຕະຫຼາດຈີນ (Chinatown) ເຂດເສດຖະກິດພິເສດ, ອີກ 2 ຮ້ານແມ່ນຢູ່ເຂດເມືອງຕົ້ນເຜິ້ງ ແລະ ຕະຫຼາດດອນຊາວ ຕິດກັບເຂດເສດຖະກິດພິເສດ ສາມລ່ຽມຄໍາ.

ນໍາໂດຍກອງກວດກາປ່າໄມ້ ແຂວງ ບໍ່ແກ້ວ, ການເຂົ້າກວດໃນຄັ້ງນີ້ສາມາດກວດພົບ ແລະຍຶດ ຂອງກາງລວມມີ ໜັງຊ້າງ, ເຂົາກວາງ ແລະ ຟານ, ແຂ້ວສັດປ່າ ເຫຼົ້າບອງກະດູກສັດ (ຄາດວ່າເປັນກະດູກເສືອ) ແລະ ດອງໂຕລິ່ນ, ຊິ້ນສ່ວນຈາກໂຕກະທິງ, ຈາກໂຕເໝັ້ນ ແລະ ເສືອ. ລິ່ນທີ່ຍັງມີຊີວິດ 1 ໂຕ ແລະ ອື່ນໆ ລວມນໍ້າໜັກຊິ້ນສ່ວນສັດປ່າທີ່ຍຶດໄດ້ ເກືອບ 10 ກິໂລ ແລະ ເຫຼົ້າບອງຢາ ປະສົມຊິ້ນສ່ວນສັດປ່າ ຫຼາຍກ່ວາ 20 ໂຖ ແລະ ອື່ນໆ.

ຂອງກາງທັງໝົດແມ່ນຖືກເກັບຮັກສາໄວ້ທີ່ກອງກວດກາປ່າໄມ້ ແຂວງບໍ່ແກ້ວ ເພື່ອຖ້າທິດຊີ້ນໍາຈາກກົມກວດກາປ່າໄມ້ ກະຊວງກະສິກໍາ ແລະ ປ່າໄມ້ ໃນຂັ້ນຕອນຕໍ່ໄປ. ສ່ວນຜູ້ກະທໍາຜິດແມ່ນໄດ້ເຮັດບົດບັນທຶກ ແລະ ຈະຖືກດໍາເນີນຄະດີ ຕາມລະບຽບກົດໝາຍ.

ການຈັດຕັ້ງປະຕິບັດດັ່ງກ່າວ ແມ່ນເພື່ອສຸມໃສ່ຄໍາສັ່ງຂອງທ່ານນາຍົກລັດຖະມົນຕີ ເລກທີ 05/ນຍ ລົງວັນທີ 8 ພຶດສະພາ 2018 ວ່າດ້ວຍການເພີ່ມທະວີຄວາມເຂັ້ມງວດ ໃນການຄຸ້ມຄອງ ແລະ ກວດກາສັດປ່າ ແລະ ພືດປ່າ ປະເພດຫວງຫ້າມ ທົ່ວປະເທດ.

ອົງການ ກອງທຶນອະນຸຮັກທໍາມະຊາດໂລກ ປະຈໍາ ສປປ ລາວ (WWF-Laos) ຂໍຊົມເຊີຍເຈົ້າໜ້າທີ່ ຕໍ່ການເອົາໃຈໃສ່ ວຽກງານບັງຄັບໃຊ້ກົດໝາຍ ໂດຍສະເພາະການຈັດຕັ້ງປະຕິບັດ ຄໍາສັ່ງເລກທີ 05/ນຍ ໃຫ້ເກີດຜົນ ເພື່ອການອະນຸຮັກທໍາມະຊາດ ສັດປ່າ ແລະ ຢຸດການຄ້າຂາຍສັດປ່າທີ່ຜິດກົດໝາຍ ທັ້ງພາຍໃນ, ຂ້າມຊາດ ແລະ ທີ່ໄກ້ຈະສູນພັນ ໃນລາວ ເຮົາ.

ຂໍ້ມູນ: WWF-Laos


ທີ່ມາ: WWF-Laos
  • ຮູບພາບ

  • ແທັກທີ່ກ່ຽວຂ້ອງ