• ສົນທະນາການຄ້າທາງດ້ານອີເລັກໂຕຣນິກ ຄັ້ງທີສາມ

ໂດຍ: ແມວດຳ 14 ທັນວາ 2018 (17.18 ນ.) Read : 99

ເພື່ອເປັນການສົ່ງເສີມບົດບາດການຄ້າທາງດ້ານເອເລັກໂຕຣນິກ ແລະນະໂຍບາຍທີ່ຕ້ອງການໃຫ້ເສດຖະກິດທາງດ້ານດີຈິຕອລຈະເລີນເຕີບໂຕ. ສະຖານທູດສະຫະລັດອາເມລິກາປະຈຳ ສປປ ລາວ ຮ່ວມກັບ ກະຊວງອຸດສາຫະກຳ ແລະການຄ້າ ແລະ GIZ ຈຶ່ງໄດ້ເປີດເວທີສົນທະນາ Lao Digital Forum ຄັ້ງທີ່ສາມ ຂຶ້ນໃນຕອນບ່າຍຂອງວັນທີ 14 ທັນວາ 2018 ທີ່ ໂຮງແຮມ ຄລາວ ພລາຊາ ວຽງຈັນ. ໂດຍການເປັນປະທານຂອງ ທ່ານນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະການຄ້າ, ທ່ານນາງ ຣີນາ ບິດເຕີ ເອກອັກຄະລັດຖະທູດ ສະຫະລັດອາເມລິກາປະຈໍາລາວ, ທ່ານ ເຈັນ ປີເຕີ ລູເກັນເຮີມ ເອກອັກຄະລັດຖະທູດ ເຢຍລະມັນປະຈຳລາວ. ມີທ່ານແຂກຕ່າງໜ້າຈາກບັນດາກະຊວງ, ບໍລິສັດເອກະຊົນທັງພາຍໃນ ແລະຕ່າງປະເທດເຂົ້າຮ່ວມຫຼາຍກວ່າ 150 ທ່ານ.

ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະການຄ້າ ໄດ້ໃຫ້ຮູ້ວ່າ: ການຄ້າເອເລັກໂຕຣນິກເປັນສ່ວນໜຶ່ງຂອງແຜນແມ່ບົດປະຊາຄົມເສດຖະກິດອາຊຽນ ປີ 2025 ແລະໄດ້ຊີ້ໃຫ້ເຫັນເຖິງເປົ້າໝາຍຂອງລັດຖະບານລາວໃນການສ້າງກອບແຜນວຽກທາງດ້ານກົດໝາຍສຳລັບການຄ້າທາງເອເລັກໂຕຣນິກໃນປີໜ້າ.

ທ່ານຍັງໄດ້ກ່າວຕື່ມອີກວ່າ: ສຳລັບການຄ້າດັ່ງກ່າວພວກເຮົາເນັ້ນໃສ່ສອງບັນຫາຄື: 1)ຕ້ອງການໃຫ້ຜູ້ຜະລິດ ແລະຜູ້ໃຫ້ບໍລິການພາຍໃນມີສ່ວນຮ່ວມໃນຕະຫຼາດທີ່ໃຫຍ່ຂຶ້ນ, 2) ເຮັດໃຫ້ຜູ້ຊົມໃຊ້ພາຍໃນສາມາດເຂົ້າເຖິງຜະລິດຕະພັນ ແລະບໍລິການທີ່ຫຼາກຫຼາຍ.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ