• 45 ປີ ແຫ່ງການເຕີບໃຫຍ່ ບໍລິສັດເບຍລາວ

ໂດຍ: ແມວດຳ 11 ທັນວາ 2018 (16.58 ນ.) Read : 382

ໃນຄ່ຳຄືນວັນທີ 07 ທັນວາ 2018 ບໍລິສັດ ເບຍລາວ ຈຳກັດ ໄດ້ຈັດການສະເຫຼີມສະຫຼອງ ການສ້າງຕັ້ງ ບໍລິສັດ ເບຍລາວ ຈຳກັດ ຄົບຮອບ 45 ປີ ຂຶ້ນທີ່ພັດຕະຄານແກ້ວມີໄຊ, ໂດຍການເປັນປະທານຂອງ ທ່ານ ສູນທອນ ພົມມະຈັກ ປະທານ ບໍລິສັດ ເບຍລາວ ຈຳກັດ, ເປັນກຽດເຂົ້າຮ່ວມມີ ທ່ານ ສົມດີ ດວງດີ ຮອງນາຍົກລັດຖະມົນຕີແຫ່ງ ສປປ ລາວ, ທ່ານ ເຮັນຣິກ ແອນເດີສັນ ຜູ້ອຳນວຍການໃຫຍ່ ບໍລິສັດ ເບຍລາວ ຈຳກັດ, ມີບັນດາທ່ານລັດຖະມົນຕີ, ຮອງລັດຖະມົນຕີກະຊວງອ້ອມຂ້າງ, ຄະບໍລິຫານ ແລະພະນັກງານພາຍໃນບໍລິສັດເຂົ້າຮ່ວມ.

ທ່ານ ສູນທອນ ພົມມະຈັກ ປະທານ ບໍລິສັດ ເບຍລາວ ຈຳກັດ ໄດ້ມີຄຳເຫັນວ່າ: ຕະຫຼອດໄລຍະການສ້າງຕັ້ງ ຈົນຮອດປັດຈຸບັນຄົບຮອບ 45 ປີ (1973-2018) ບໍລິສັດເບຍລາວມີການເຕີບໃຫຍ່ຂະຫຍາຍຕົວໃນທຸກໆດ້ານພ້ອມໆກັບການເຕີບໃຫຍ່ຂະຫຍາຍຕົວຂອງປະເທດຊາດ ເນື່ອງຈາກ ບໍລິສັດ ເບຍລາວ ຈຳກັດ ໄດ້ກາຍເປັນຫົວໜ່ວຍທຸລະກິດໜຶ່ງທີ່ເຂັ້ມແຂງຂອງຊາດ, ແຕ່ລະປີບໍລິສັດໄດ້ມອບພັນທະໃຫ້ກັບລັດຖະບານນັບມື້ສູງຂຶ້ນ ສະແດງອອກໃນປີ 2017 ໄດ້ມອບພັນທະໃຫ້ລັດຖະບານເຖິງ 1,800 ຕື້ກີບ. ພ້ອມນີ້ ບໍລິສັດ ເບຍລາວ ຈຳກັດ ຍັງເປັນບໍລິສັດດີເດັ່ນຢູ່ໃນເຄືອຂອງ ບໍລິສັດ ຄາສເບີກ ທີ່ມີຢູ່ຫຼາຍກວ່າ 170 ປະເທດ ແລະໃຫຍ່ເປັນອັນດັບ 3 ຂອງໂລກ. ທ່ານຍັງໄດ້ກ່າວຕື່ມວ່າ: ເຖິງແມ່ນວ່າ ໃນປັດຈຸບັນ ບໍລິສັດ ເບຍລາວ ຈຳກັດ ໄດ້ຮ່ວມທຶນກັບຕ່າງປະເທດ ແຕ່ກໍຍຶດໝັ້ນໃນການດຳເນີນທຸກລະກິດພາຍໃຕ້ແນວທາງນະໂຍບາຍຂອງພັກປະຊາຊົນປະຕິວັດລາວ, ປະຕິບັດຕາມລະບຽບກົດໝາຍຂອງລັດ ແລະຄຽງຄູ່ກັບການສົ່ງເສີມຮີດຄອງປະເພີນີອັນດີງາມຂອງຊາດລາວເຮົາຕະຫຼອດມາ.

ນອກຈາກນີ້, ໃນພິທີສະເຫຼີມສະຫຼອງດັ່ງກ່າວ ຍັງໄດ້ມີການມອບຫຼຽນນາມມະຍົດແຫ່ງຊາດດີເດັ່ນ ໃຫ້ກັບ ບໍລິສັດ ເບຍລາວ ຈຳກັດ, ກຸ່ມ ບໍລິສັດ ຄາສເບີກ, ມອບຫຼຽນໄຊແຮງງານ ແລະໃບຍ້ອງຍໍປະເພດບຸກຄົນໃຫ້ກັບຄະນະບໍລິຫານ ແລະພະນັກງານພາຍໃນບໍລິສັດອີກດ້ວຍ.

ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ