• QR KBank ກະເປົ໋າເງິນອອນລາຍ ໃຊ້ຈ່າຍທີ່ຕະຫຼາດໜອງຈັນ

ໂດຍ: ສີເປື້ອນມື 11 ທັນວາ 2018 (10.34 ນ.) Read : 934

ໃນວັນທີ 11 ທັນວາ 2018 ທາງທະນາຄານກະສິກອນໄທ ຮ່ວມກັບ ບໍລິສັດ ລຽງເຮັງການຄ້າ-ບໍລິການຈັດສັນຕະຫຼາດ ຈໍາກັດ ເປີດການນໍາໃຊ້ລະບົບຈ່າຍ-ຮັບເງິນທາງອອນລາຍ ຜ່ານແອັບຂອງ QR KBank ເພື່ອຄວາມສະດວກສະບາຍໃນການຊື້-ຂາຍ ສິນຄ້າທີ່ຕະຫຼາດໜອງຈັນ (ຕະຫຼາດຂົວດິນ) ນະຄອນຫຼວງວຽງຈັນ. ໃຫ້ກຽດເຂົ້າຮ່ວມໄດ້ແກ່: ທ່ານ ສຸລິສັກ ທໍານຸວົງ ວ່າການຫົວໜ້າກົມຄຸ້ມຄອງລະບົບ ຊໍາລະສະສາງ ທະນາຄານແຫ່ງ ສປປ ລາວ, ທ່ານ ໄຂ່ແກ້ວ ລວງສີວິໄລ ຫົວໜ້າກົມ ເຕັກໂນໂລຊີ ຂໍ້ມູນຂ່າວສານ ທະນາຄານແຫ່ງ ສປປ ລາວ, ທ່ານ ວິສິດ ແສງດາລາ ຜູ້ອໍານວຍການ ບໍລິສັດ ລຽງເຮັງການຄ້າ-ບໍລິການຈັດສັນຕະຫຼາດ ຈໍາກັດ ແລະທ່ານ ພັດທະນະພົງ ຕັນສົມບູນ ປະທານສະພາບໍລິຫານ ທະນາຄານກະສິກອນໄທ ຈໍາກັດ ພ້ອມດ້ວຍແຂກທີ່ຖືກເຊີນ.

ການນໍາໃຊ້ລະບົບການຊື້-ຂາຍຜ່ານ QR KBank ແລະ QR KBank Shop ເຂົ້າໃນຕະຫຼາດໜອງຈັນ ເພື່ອເພີ່ມອີກຕົວເລືອກໜຶ່ງໃຫ້ກັບ ພໍ່ຄ້າ-ແມ່ຄ້າ ແລະລູກຄ້າ ໃນການໃຊ້ຈ່າຍ ໃຫ້ມີຄວາມສະດວກສະບາຍ, ເຮັດການຄ້າຢ່າງສະດວກ ແລະມີຄວາມປອດໄພຫຼາຍຂຶ້ນ.

ຂັ້ນຕອນຂອງການເປີດນໍາໃຊ້  QR KBank ພຽງແຕ່ທ່ານມີສະມາດໂຟນ ບໍ່ວ່າຈະເປັນລະບົບແອນດຣອຍ ຫຼື iOS ກໍສາມາດທີ່ຈະດາວໂຫຼດແອັບຂອງ QR KBank ມາໄດ້ຢ່າງງ່າຍດາຍ. ຫຼັງຈາກນັ້ນ, ໂດຍໃຊ້ ບັດປະຈໍາຕົວ, ສໍາມະໂນຄົວ ຫຼືໜັງສືເດີນທາງ (Passport) ໃນການລົງທະບຽນບັນຊີຕາມໜ່ວຍບໍລິການ ແລະຕື່ມເງິນໃສ່ບັນຊີ ພຽງເທົ່ານີ້ທ່ານກໍສາມາດຊື້ສິນຄ້າພາຍໃນຕະຫຼາດໜອງຈັນ ໃນຈຸດທີ່ມີ QR KBank ໄດ້ຢ່າງສະດວກສະບາຍ ໂດຍທີ່ບໍ່ຕ້ອງພົກພາເງິນສົດເປັນຈໍານວນຫຼາຍ.

ໃນອະນາຄົດທາງທະນາຄານກະສິກອນໄທ ໄດ້ມີແຜນທີ່ຈະນໍາໃຊ້ QR KBank ແລະ QR KBank Shop ເພື່ອຍົກລະດັບການຊໍາລະເງິນຜ່ານຊ່ອງທາງດິຈິຕອນຂອງພັນທະມິດທຸລະກິດທາງທະນາຄານ ໂດຍມີແຜນການໃຊ້ບໍລິການໃນຕົ້ນປີ 2019. ນອກນັ້ນ, ຍັງແນມເຫັນຄວາມເປັນໄປໄດ້ ໃນການຂະຫຍາຍຮູບແບບການບໍລິການ QR KBank ໃຫ້ສາມາດຕອບໂຈດຜູ້ຊົມໃຊ້ໃນຫຼາຍຂະແໜງການ ເຊັ່ນ: ການຕື່ມເງິນໃນໂທລະສັບ, ການຂະຫຍາຍຈຸດຮັບຊໍາລະສິນຄ້າໃນຮູບແບບອື່ນໆໃຫ້ມີຄວາມຫຼາກຫຼາຍ ແລະຂະຫຍາຍຊ່ອງທາງໃນການນໍາເງິນເຂົ້າ-ອອກໃຫ້ຄວບຄຸມຢ່າງທົ່ວເຖິງ.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ

  • #QR KBank