• ນາຍົກກ່າວ!! ເຫດຜົນທີ່ຕ້ອງຫຼຸດໂກຕ້າລັດຖະກອນລົງ

ໂດຍ: ສີເປື້ອນມື 29 ພະຈິກ 2018 (11.05 ນ.) Read : 1,417

ເມື່ອມີການປະກາດວ່າ ທາງລັດຖະບານ ຈະມີການປັບຫຼຸດໂກຕ້າລັດຖະກອນລົງ ຈາກ 3.000 ຄົນ ໃນປີ 2018 ໃຫ້ເຫຼືອພຽງ 1.500 ຄົນ ໃນປີ 2019 ເຊິ່ງໄດ້ເຮັດໃຫ້ບັນດາບັນດິດໃໝ່ ແລະອາສາສະໝັກທີ່ກໍາລັງລໍຖ້າໂກຕ້າບັນຈຸເຂົ້າລັດຖະກອນຕ້ອງຮູ້ສຶກບໍ່ຄ່ອຍພໍໃຈ ເຊິ່ງທາງລັດຖະບານໄດ້ໃຫ້ເຫດຜົນວ່າ: ເປັນການປະຢັດລາຍຈ່າຍຂອງລັດຖະບານ ທັງຈະເປັນການປັບປຸງແກ້ໄຂພະນັກງານທີ່ບັນຈຸລັດຖະກອນທີ່ມີລັກສະນະຫຼາຍກວ່າວຽກ ຫຼືເຫຼືອບໍ່ພໍ.

ພະນະທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໄດ້ລາຍງານຕໍ່ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດຊຸດທີ VIII ວ່າ: ສໍາລັບໂກຕ້າລັດຖະກອນໃໝ່ ປະຈໍາປີ 2019 ລັດຖະບານເປັນເອກະພາບຈະຮັບພະນັກງານໃໝ່ ພຽງແຕ່ 1.500 ຄົນ ເຊິ່ງເປັນຈໍາໜ້ອຍກວ່າປີຜ່ານມາ. ລັດຖະບານຮັບຮູ້ຄວາມຕ້ອງການໂກຕ້າ ລັດຖະກອນເພື່ອບັນຈຸພະນັກງານເຂົ້າໃນຫຼາຍຕໍາແໜ່ງທັງສູນກາງ ແລະທ້ອງຖິ່ນ ແຕ່ຜ່ານການຄົ້ນຄວ້າ, ວິເຄາະ-ວິໄຈ ແລະປຽບທຽບກັບຫຼາຍປະເທດໃນພາກພື້ນ ສປປ ລາວ ມີອັດຕາລັດຖະກອນທຽບໃສ່ພົນລະເມືອງເຫັນວ່າຍັງສູງ ຈັດຢູ່ໃນອັນດັບ 3 ໃນອາຊຽນ. ພ້ອມກັນນີ້, ງົບປະມານທີ່ຈັດສັນສໍາລັບເງິນເດືອນພະນັກງານ, ລັດຖະກອນ ໃນ 2 ປີຜ່ານມາ ກໍກວມເອົາເຖິງ 50% ຂອງລາຍຮັບພາຍໃນປົກກະຕິ ຖືເປັນຕົວເລກທີ່ຂ້ອນຂ້າງສູງກວ່າເກນທີ່ກໍານົດໄວ້ທີ່ 35-40% ເທົ່ານັ້ນ.

ລັດຖະບານຍັງເນັ້ນອີກວ່າ ຈໍານວນໂກຕ້າລັດຖະກອນສ່ວນໃຫຍ່ ແມ່ນຈະໃຫ້ບຸລິມະສິດແກ່: ແພດ-ໝໍ, ຄູ-ອາຈານ, ວິຊາສົ່ງເສີມການຜະລິດ ແລະອື່ນໆ. ພ້ອມທັງຕິດຕາມ-ກວດກາຕື່ມ ເພື່ອແກ້ໄຂບັນຫາປະກົດການຫຍໍ້ທໍ້ ໃນການຈັກແບ່ງໂກຕ້າທີ່ມີຈໍາກັດໃຫ້ໄປເຖິງເປົ້າໝາຍທີ່ຈໍາເປັນແທ້. ນອກນັ້ນ, ທາງລັດຖະບານ ຈະກວດຄືນບັນຫາພະນັກງານເຫຼືອ ຫຼືບໍ່ພໍ, ຄົ້ນຄວ້າຄວາມດຸ່ນດ່ຽງ ນໍາເອົາພະນັກງານທີ່ເຫຼືອຍ້າຍໄປສູ່ບ່ອນທີ່ຂາດເຂີນ ແລະຫັນພະນັກງານລັດຖະກອນລົງສູ່ທ້ອງຖິ່ນໃຫ້ຫຼາຍຂຶ້ນ.

ຂໍ້ມູນ: ໜສພ ເສດຖະກິດ-ການຄ້າ.


ທີ່ມາ: https://laoedaily.com.la/40090/?fbclid=IwAR2GNviMsuKcpmNVkNFeH-DG8rN54PdO38wKP9gsfEMeaom_qYO3exJxAis
  • ຮູບພາບ

  • ແທັກທີ່ກ່ຽວຂ້ອງ