• ບຸບເຟ່ ຊີ້ນດາດ ນົກນ້ອຍ ບໍລິການດ້ວຍໃຈ ໃສ່ໃຈລູກຄ້າ

ໂດຍ: ສີເປື້ອນມື 28 ພະຈິກ 2018 (13.31 ນ.) Read : 536

ໃນປັດຈຸບັນ ຖ້າເວົ້າເລື່ອງຮ້ານອາຫານ ແມ່ນມີຢ່າງຫຼວງຫຼາຍ ໃນຂອບເຂດທົ່ວປະເທດ ໂດຍສະເພາະແມ່ນນະຄອນຫຼວງວຽງຈັນ ໄດ້ມີຈໍານວນຮ້ານອາຫານເພີ່ມຂຶ້ນເລື້ອຍໆ ເຊິ່ງກໍໄດ້ມີຫຼາຍຮູບແບບທີ່ແຕກຕ່າງກັນໄປ ເຊັ່ນ: ຮ້ານອາຫານແບບລານເບຍ, ຮ້ານອາຫານທີ່ເຮັດເປັນໂຊນ, ຮ້ານອາຫານຕາມສັ່ງ, ສວນອາຫານ, ຮ້ານຄາລາໂອເກະ, ຮ້ານບຸບເຟ່ທະເລ ແລະຮ້ານບຸບເຟ່ຊີ້ນດາດ ປັດຈຸບັນຮ້ານອາຫານເຫຼົ່ານີ້ ກໍາລັງເປັນທີ່ນິຍົມຂອງບຸກຄົນທົ່ວໄປ.

ທ່ານ ນາງ ພອນສະຫວັນ ທະນູສິງ ຜູ້ບໍລິຫານ/ເຈົ້າຂອງຮ້ານ ບຸບເຟ່ ຊີ້ນດາດ ນົກນ້ອຍ ໄດ້ສໍາພາດວ່າ: ຮ້ານຂອງພວກເຮົາໄດ້ເປີດມາຕັ້ງແຕ່ວັນທີ 25 ທັນວາ 2009 ເຊິ່ງໃນເມື່ອກ່ອນ ໄດ້ມີການເຮັດຮ່ວມກັນກັບແມ່ ເປັນໄລຍະເວລາ 2-3 ປີ ຫຼັງຈາກນັ້ນ, ເມື່ອເພິ່ນວາງມື ຕົນເອງຈຶ່ງໄດ້ມາສືບຕໍ່ຮັບຊ່ວງຕໍ່ຈາກເພິ່ນ ນັບແຕ່ນັ້ນມາ ຮ້ານບຸບເຟ່ ຊີ້ນດາດ ແມ່ນໄດ້ເປີດບໍລິການໃຫ້ກັບລູກຄ້າມາເປັນເວລາ 9 ປີ. ນັບຕັ້ງແຕ່ຊ່ວງທີ່ເປີດຮ້ານໃນໄລຍະ 2-3 ປີທໍາອິດ ແມ່ນໄດ້ຮັບກະແສຕອບຮັບເປັນຢ່າງດີຈາກສັງຄົມ ເນື່ອງຈາກຕອນນັ້ນຍັງບໍ່ທັນມີຮ້ານບຸບເຟ່ຫຼາຍຄືໃນປັດຈຸບັນ ເຮັດໃຫ້ໃນໄລຍະຕໍ່ມາເຮັດໃຫ້ມີອຸປະສັກເລັກນ້ອຍ. ດ້ວຍເຫດນັ້ນ, ຕົນເອງຈະໄດ້ພະຍາຍາມຊອກຫາທຸກວິທີທາງ ເພື່ອທີ່ເຮັດໃຫ້ລູກຄ້າກັບມາຫຼາຍຕາມປົກກະຕິ ບໍ່ວ່າຈະເປັນການຫາວັດຖຸດິບໃໝ່ໆເຂົ້າມາ ພ້ອມທັງການຈັດຫາໂປຼໂມຊັ່ນຕ່າງໆ ເຮັດໃຫ້ຮ້ານເຮົາສາມາດຢູ່ໄດ້ຈົນເຖິງທຸກວັນນີ້.

ຮ້ານພວກເຮົາໄດ້ເອົາໃຈໃສ່ທຸກລາຍລະອຽດຂອງການບໍລິການ ບໍ່ວ່າຈະເປັນວັດຖຸດິບທີ່ເອົາເຂົ້າມາໃຫ້ລູກຄ້າບໍລິໂພກ ຕ້ອງແມ່ນສິນຄ້າທີ່ມີຄວາມສົດໃໝ່ ແລະໃຫ້ພຽງພໍກັບຄວາມຮຽກຮ້ອງຕ້ອງການຂອງລູກຄ້າ. ຍ້ອນການລົງມືເຮັດດ້ວຍຕົນເອງ ຈຶ່ງເຮັດໃຫ້ເຮົາໝັ້ນໃຈວ່າລູກຄ້າຈະໄດ້ບໍລິໂພກແຕ່ສິ່ງດີໆຈາກພວກເຮົາ ນັບຕັ້ງແຕ່ການອອກຕະຫຼາດ, ການຄັດເລືອກວັດຖຸດິບ, ການປຸງແຕ່ງ ແລະໃສ່ໃຈໃນວຽກບໍລິການ ເພື່ອເຮັດໃຫ້ລູກຄ້າເກີດຄວາມປະທັບໃຈ.

ຮ້ານບຸບເຟ່ ຊີ້ນດາດ ນົກນ້ອຍ ມີຫຼາກຫຼາຍຢ່າງໃຫ້ລູກຄ້າເລືອກຮັບປະທານໄດ້ຕາມໃຈ ເຊັ່ນ: ປະເພດຊີ້ນດາດຄົບວົງຈອນ, ອາຫານທະເລ ຄື: ກຸ້ງ, ຫອຍ, ປູ, ປາ... ມາແບບຈັດເຕັມ, ອາຫານປຸງແຕ່ງສໍາເລັດ, ອາຫານຫວານ, ໝາກໄມ້ ທີ່ມີໄວ້ຄອຍບໍລິການທ່ານແບບມື້ຕໍ່ມື້ ເຮັດໃຫ້ທ່ານໝັ້ນໃຈໄດ້ວ່າ ໄດ້ກິນອາຫານສົດໃໝ່ ແລະປອດໄພຕໍ່ສຸຂະພາບອີກດ້ວຍ.

ຊ່ວງທີ່ຮ້ານມີລູກຄ້າຫຼາຍທີ່ສຸດແມ່ນ ໃນຍາມລະດູແລ້ງ ທີ່ມາອາກາດເຢັນຜູ້ຄົນຈະນິຍົມກັນໄປກິນອາຫານຮ້ອນໆ ເພື່ອໃຫ້ຮ່າງກາຍອົບອຸ່ນ. ນອກນັ້ນ, ກໍຍັງມີຊ່ວງເທດສະການງານບຸນຕ່າງໆ ແລະວັນພັກລັດຖະການ. ລູກຄ້າທີ່ເຂົ້າມາໃຊ້ບໍລິການສ່ວນຫຼາຍຈະເປັນຄອບຄົວ, ນັກສຶກສາຕ່າງປະເທດ, ກຸ່ມຄົນ ແລະມາຈັດງານລ້ຽງ. ສ່ວນເຄັດລັບທີ່ເຮັດໃຫ້ລູກຄ້າປະທັບໃຈ ແລະເປັນລູກຄ້າຂາປະຈໍາຂອງຮ້ານ ສ່ວນຫຼາຍແມ່ນຈະຕິດໃຈນໍ້າແຈ່ວທີ່ສູດເດັດສະເພາະຈາກທາງເຈົ້າຂອງຮ້ານເປັນຜູ້ປຸງແຕ່ງດ້ວຍຕົນເອງ ບໍ່ວ່າຈະເປັນແຈ່ວຊີ້ນດາດ (ສຸກກີ້) ຫຼືແຈ່ວຊີຟູດ ພ້ອມທັງເສີບອາຫານທີ່ສົດໃໝ່ທຸກມື້.

ອຸປະສັກໃນການເຮັດທຸລະກິດ ຮ້ານບຸບເຟ ຊີ້ນດາດ ຫຼັກໆແລ້ວຈະແມ່ນຈໍານວນຄູ່ແຂ່ງ ທີ່ເພີ່ມທະວີຂຶ້ນເລື້ອຍໆ ເຮັດໃຫ້ເຮົາຈໍາຕ້ອງດິ້ນຮົນຊອກຫາວິທີການໃໝ່ ເພື່ອເຮັດໃຫ້ລູກຄ້າເກົ່າ-ໃໝ່ ໃຫ້ຄວາມສົນໃຈ ແລະຢູ່ຄຽງຄູ່ກັບຮ້ານເຮົາ. ເຖິງແມ່ນວ່າສິ່ງທີ່ພະຍາຍາມເຮັດນັ້ນ ຜົນອອກມາມັນຈະເປັນແນວໃດ ພວກເຮົາກໍພູມໃຈ ເພາະວ່າໄດ້ເຮັດມັນດີທີ່ສຸດແລ້ວ ເພື່ອໃຫ້ລູກຄ້າໄດ້ຮັບແຕ່ສິ່ງດີດີ ແລະລົດຊາດຖືກໃຈ.

ສ່ວນລາຄາສໍາລັບ ບຸບເຟ່ ຊີ້ນດາດ ແລະທະເລ 59.000 ກີບ/ຄົນ, ເດັກນ້ອຍທີ່ມີລວງສູງ 80-120 cm ແມ່ນ 25.000 ກີບ/ຄົນ ແລະຖ້າຫຼຸດ 80 cm ລົງມາຮ້ານພວກເຮົາໃຫ້ກິນຟຣີ. ນອກນັ້ນ, ກໍຍັງມີການຂາຍເປັນກິໂລ ສໍາລັບທ່ານໃດທີ່ຕ້ອງການຢາກຊື້ໄປກິນຢູ່ເຮືອນ ລວມທຸກຢ່າງ 1 ກິໂລ ລາຄາ 80.000 ກີບ ແຖມຜັກ, ນໍ້າແຈ່ວ, ນໍ້າຊຸບ ແລະເຄື່ອງດາດໃຫ້ແບບຄົບຊຸດ.

ສຸດທ້າຍກໍຂໍຂອບໃຈລູກຄ້າທ່ານທີ່ມາອຸດໜູນ ທາງຮ້ານຕະຫຼອດມາ ພວກເຮົາກໍຍິນດີຕ້ອນຮັບສະເໝີ ບໍ່ຈະເປັນລູກຄ້າເກົ່າ ແລະໃໝ່ ຖ້າມີສິ່ງໃດທີ່ຂາດຕົກບົກຜ່ອງ ກໍສາມາດຕໍານິຕິຊົມໄດ້ ພວກເຮົາຈະນໍາເອົາໄປປັບປຸງໃຫ້ດີຂຶ້ນ. ຮ້ານ ບຸບເຟ່ ຊີ້ນດາດ ນົກນ້ອຍ ເປີດໃຫ້ບໍລິການທຸກໆວັນ ເລີ່ມຕັ້ງແຕ່ເວລາ 17:00-23:00 ໂມງ. ສະຖານທີ່ຕັ້ງຢູ່ບ້ານ ຄໍາຮຸ່ງ ເມືອງ ໄຊທານີ ນະຄອນຫຼວງວຽງຈັນ. ເບີໂທລະສັບ: 020 5885 7882.

 ໂດຍ: ສີເປື້ອນມື


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ