• ພຣະພຸດທະຮູບເກົ່າແກ່ຫຼາຍອົງຖືກລັກທີ່ ນະຄອນຫລວງພຣະບາງ

ໂດຍ: ແມວດຳ 27 ພະຈິກ 2018 (15.21 ນ.) Read : 136

ໃນຄ່ຳຄືນວັນທີ 24 ພະຈິກ 2018 ເວລາ 02:17 ໂມງ ມີໂຈນໃຈບາບໄດ້ເຂົ້າໄປລັກເອົາພຣະພຸດທະຮູບເກົ່າແກ່ ພາຍໃນສິມ ວັດໂພນໄຊ ນະຄອນຫລວງພຣະບາງ ແຂວງຫລວງພຣະບາງ.

ເຊິ່ງປະກອບດ້ວຍພຣະພຸດທະຮູບຂະໜາດໃຫຍ່ 02 ອົງ ແລະອົງນ້ອຍອີກຫຼາຍອົງ. ພຣະພຸດທະຮູບໃຫຍ່ປະກອບມີ:

- ອົງທີ່ 1 ເປັນພຣະພຸດທະຮູບທອງດໍາ ຂະໜາດໜ້າຕັກປະມານ 50 ຊມ ປະດິດສະຖານຢູ່ທີ່ໜ້າພຣະເຈົ້າໃຫຍ່
- ອົງທີ່ 2 ເປັນພຣະພຸດທະຮູບນັ່ງສະມາທິ ປະດິດສະຖານຢູ່ແທ່ນຕໍ່າ ຂ້າງພຣະເຈົ້າໃຫຍ່ເບື້ອງຊ້າຍ ຫຼືເບື້ອງນໍ້າຂອງ ( ພຣະພຸດທະຮູບທັງ 2 ອົງ ບໍ່ໄດ້ຂຶ້ນທະບຽນ).

ນອກນັ້ນຍັງມີພຣະພຸດທະຮູບອົງນ້ອຍໆ ທີ່ຕັ້ງລຽນຢູ່ອ້ອມແທ່ນພະເຈົ້າໃຫຍ່ຖືກກວາດຕົກລົງຊະຊາຍເຕັມພື້ນ ບາງອົງກໍຄໍຫັກ ບາງອົງກໍແຕກ-ບິ່ນ ແລະຕູ້ບໍລິຈາກ 2 ໜ່ວຍ ຖືກງັດເອົາເງິນ.

ເມື່ອເກີດເຫດການຄືແບບນັ້ນໃນຕອນເຊົ້າວັນທີ 25 ພະຈິກ 2018 ທາງວັດກໍໄດ້ແຈ້ງໃຫ້ອໍານາດການປົກຄອງ ບ້ານປ່າຂາມ ນະຄອນຫລວງພຣະບາງ ໃຫ້ຮັບຊາບ ດັ່ງນັ້ນ, ອໍານາດການປົກຄອງບ້ານປ່າຂາມ ພ້ອມດ້ວຍເຈົ້າໜ້າທີ່ຕໍາຫຼວດ ໄດ້ເຂົ້າກວດສອບ ແລະບັນທຶກຫຼັກຖານ.

ຕາມສອບຖາມຂໍ້ມູນເບື້ອງຕົ້ນໄດ້ໃຫ້ຮູ້ວ່າ: ມີກຸ່ມຄົນໃຈມານປະມານ 3-4 ຄົນ ໄດ້ຕັດກະແຈເຂົ້າທາງປະຕູໜ້າເບື້ອງຂວາເພື່ອເຂົ້າໄປລັກເອົາພຣະພຸດທະຮູບພາຍໃນອາຮາມ(ສີມ) ແລະອອກໄປທາງປະຕູຂ້າງເບື້ອງຂວາທາງນໍ້າຂອງ ໂດຍມີລົດກະບະຟອດ ມາຈອດຢູ່ເສັ້ນທາງຫຼັງວັດໃນການຂົນເອົາພຣະພຸດທະຮູບ ໂດຍປ້າຍທະບຽນໃນຕອນນັ້ນ ແມ່ນເຂົາໄດ້ເອົາເຈ້ຍ A4 ປິດບັງໄວ້.
ນອກຈາກນີ້, ເຈົ້າໜ້າທີ່ກໍໄດ້ຂໍຮຽກຮ້ອງໃຫ້ພໍ່ແມ່ປະຊາຊົນ ຊາວຫຼວງພະບາງ ກໍຄືຄົນລາວທົ່ວປະເທດຈົ່ງເປັນຫູເປັນຕາຊ່ວຍກັນ ແລະສຳລັບປະຊາຊົນທີ່ຢູ່ໃກ້ຄຽງກັບວັດດັ່ງກ່າວຖ້າຫາກບ້ານເຮືອນໃດ ທີ່ມີກ້ອງວົງຈອນປິດ ຊ່ວຍເປີດເບິ່ງ ແລະສັງເກດລົດຟອດສີຂາວ ທີ່ມີເຈ້ຍປິດບັງປ້າຍທະບຽນໄວ້ນັ້ນ ຈະເປັນເບາະແສໃຫ້ທາງວັດ ທາງການອີກແຮງຫນຶ່ງ.

ສຳລັບໂຈນທັງຫລາຍທີ່ລັກພຣະອົງດັ່ງກ່າວໄປ ຫລືລັກຈາກວັດອື່ນໄປກ່ອນແລ້ວນັ້ນ ຈົ່ງນຳກັບມາຄືນທາງວັດ ດ່ວນ ເພາະກັມທີ່ກະທຳໄວ້ ມັນຈະເກີດຂຶ້ນເຮັດໃຫ້ຊີວິດມີອັນວິບັດ ຜົນກະທຳຈະເຮັດໃຫ້ທົນທຸກທໍລະມານທັງຊາດນີ້ ແລະຊາດຫນ້າ.
ຖ້າຫາກທ່ານໃດມີຂ່າວຄາວ ຫລືຂໍ້ມູນທີ່ເປັນປະໂຫຍດ ກະລຸນາແຈ້ງທາງວັດ, ອໍານາດການປົກຄອງ, ເຈົ້າຫນ້າທີ່ ຫຼືທາງເພຈ Art and Culture of Laos


ທີ່ມາ: Art and Culture of Laos
  • ຮູບພາບ

  • ແທັກທີ່ກ່ຽວຂ້ອງ