• ປະທານສູນກາງແນວລາວສ້າງຊາດ ເຄື່ອນໄຫວເຮັດວຽກຢູ່ ແຂວງຜົ້ງສາລີ

ໂດຍ: ແມວດຳ 26 ຕຸລາ 2018 (10.51 ນ.) Read : 171

ທ່ານ ປອ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ໄດ້ເຄື່ອນໄຫວຢ້ຽມຢາມ ແລະເຮັດວຽກຢູ່ແຂວງຜົ້ງສາລີ ໃນລະຫວ່າງວັນທີ 18-20 ຕຸລາ 2018, ໃຫ້ກຽດຕ້ອນຮັບໂດຍ ທ່ານ ຄຳເຈນ ວົງໂພສີ ເຈົ້າແຂວງ ແຂວງຜົ້ງສາລີ ພ້ອມດ້ວຍຄະນະ.

ໃນໂອກາດດັ່ງກ່າວ ທ່ານ ປອ ໄຊສົມພອນ ພົມວິຫານ ໄດ້ໂອ້ລົມຕໍ່ພະນັກງານຫຼັກແຫຼ່ງພາຍໃນແຂວງຫຼາຍດ້ານໂດຍສະເພາະແມ່ນປະຫວັດມູນເຊື້ອ, ພາລະບົດບາດ, ສິດ ແລະໜ້າທີ່ຂອງແນວລາວສ້າງຊາດແຕ່ລະຂັ້ນ, ເຊິ່ງແນວລາວສ້າງຊາດໄດ້ສືບທອດ ແລະຂະຫຍາຍມູນເຊື້ອອັນສະຫງ່າລາສີຂອງແນວລາວອິດສະຫຼະ, ໄດ້ເຕົ້າໂຮມຄວາມສາມັກຄີຂອງປະຊາຊົນບັນດາເຜົ່າ, ຊັ້ນຄົນ, ສາສະໜາ ເຂົ້າໃຈການຕໍ່ສູ້ໃນເມື່ອກ່ອນ ແລະປະຕິບັດສອງໜ້າທີ່ຍຸດທະສາດ ຄື: ປົກປັກຮັກສາ ແລະສ້າງສາພັດທະນາປະເທດຊາດ.
ພ້ອມດຽວກັນນັ້ນ, ທ່ານຍັງໄດ້ເນັ້ນໃຫ້ອົງຄະນະພັກແຂວງແຕ່ລະຂັ້ນ ຈົ່ງເອົາໃຈໃສ່ວຽກງານສຶກສາອົບຮົມການເມືອງ-ແນວຄິດຖັນແຖວພະນັກງານຫຼັກແຫຼ່ງ, ບັນດາສະມາຊິກພັກໃຫ້ກຳແໜ້ນ ແລະເຊື່ອມຊຶມແນວທາງຂອງພັກຢ່າງເລິກເຊິ່ງ, ຕ້ານ ແລະສະກັດກັ້ນທຸກປະກົດການຫຍໍ້ທໍ້ໃນສັງຄົມໃຫ້ໄດ້ຢ່າງຂາດຕົວ, ເອົາໃຈໃສ່ວຽກງານປ້ອງກັນຄວາມສະຫງົບ, ມີສະຕິລະວົງຕົວຕໍ່ການເຄື່ອນໄຫວຂອງກຸ່ມຄົນບໍ່ດີທີ່ຈະສວຍໃຊ້ຊົນເຜົ່າ, ສາສະໜາ ເພື່ອເຄື່ອນໄຫວແຕກແຍກຄວາມສາມັກຄີພາຍໃນ, ເຂົ້າຮ່ວມການປະຕິບັດແນວທາງນະໂຍບາຍຂອງພັກ, ປະຕິບັດຫຼັກຄຳສອນທີ່ກ້າວໜ້າ, ເພີ່ມທະວີຄວາມສາມັກຄີ ແລະເຊີດຊູສິດເປັນເຈົ້າຂອງປະຊາຊົນບັນດາເຜົ່າ ແລະບັນດາຊັ້ນຄົນໃນເງື່ອນໄຂໃໝ່ແຫ່ງການເຊື່ອມໂຍງໃນພາກພື້ນ ແລະສາກົນເພື່ອຮັບປະກັນສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພ.

ນອກຈາກນີ້, ທ່ານປະທານສູນກາງແນວລາວສ້າງຊາດ ຍັງໄດ້ນຳເອົາເຄື່ອງອຸປະໂພກຈຳນວນໜຶ່ງມາມອບໃຫ້ ແນວລາວສ້າງຊາດແຂວງ ເຊິ່ງກ່າວຮັບໂດຍ ທ່ານ ຄຳເຈນ ວົງໂພສີ.


ທີ່ມາ: ຄວາມສະຫງົບລາຍວັນ Lao Security News
  • ແທັກທີ່ກ່ຽວຂ້ອງ