• ແກ້​ໄຂ​ແນວ​ໃດ? ວັດທະນະ​ທໍາ​ລາວເສື່ອ​ມຍ້ອນ​ຄົນ​ກຸ່ມ​ນີ້

ໂດຍ: Admin Mahason 06 ພະຈິກ 2017 (12.02 ນ.) Read : 2,654

ໃນ​ຍຸກ​ປັດຈຸບັນ​ໂລກ​ມີ​ການ​ປ່ຽນ​ແປງ​ໄປ​ໄກຫຼາຍສົມຄວນ​ຈາກ​ສິ່ງ​ທີ່​ບໍ່​ເຄີຍ​ເປັນ​ມາ​ກ່ອນ ກໍ​ປະກົດ​ຂຶ້ນ​ໃຫ້​ເຫັນຫຼາຍ ​ເນື່ອງ​ຈາກ​ເຕັກ​ໂນ​ໂລ​ຊີ​ທີ່​ທັນ​ສະ​ໄໝທີ່​​ໃຫ້​ທຸກ​ຄົນ​ເຂົ້າ​ເລື່ອງ​ຂ່າວ ​ແລະ​ຮັບ​ຮູ້​ສິ່ງ​ຕ່າງໆ​ໄດ້​ໄວ​ຂຶ້ນ ​ເຊິ່ງມັນ​ກໍ​ມີ​ທັງ​ຜົນ​ດີ ​ແລະ​ບໍ່ດີ​ມາ​ພ້ອມ​ກັນ ​ແລ້ວ​ແຕ່​ບຸກຄົນ​ຈະ​ເລືອກ​​ເສບ​ຂ່າວ​ໃນ​ລັກສະນະ​ໃດ.

ການ​ເປັນ​ຄົນ​ດັງ ຫຼື​ເປັນ​ທີ່​ນິຍົມ​ຂອງຫຼາຍຄົນ​ເທິງ​ໂລກ​ອອນ​ໄລ​ນ໌ ​ເປັນ​ບ່ອນ​ທີ່​ຄົນ​ຈໍານວນໜຶ່ງ​​ເລືອກ​ຈະ​ໃຊ້​ວິທີ​ຕ່າງໆ​ເພື່ອ​ຮຽກຮ້ອງ​ຄວາມ​ສົນ​ໃຈ​ຈາກ​ຄົນ​ອື່ນ ​ເພື່ອ​ເຮັດ​ໃຫ້​ຕົນ​ເອງ​ມີ​ຊື່ສຽງ ​ແລະ​ເປັນ​ທີ່​ຮູ້ຈັກ​ໃນ​ສັງຄົມ​ອອນ​ໄລ​ນ໌. ​ແຕ່ວິທີ​ການ​ປະພຶດຂອງ​ແຕ່ລະຄົນ​ກໍ​ຈະ​ບໍ່ຄື​ກັນ ບາງ​ຄົນ​ກໍ​ໃຊ້​ຄວາມ​ງາມ, ຄວາມ​ສາມາດ, ການສະ​ແດງ ຫຼື ຄົນ​ທີ່​ມີ​ບົດບາດ​ໃນ​ສັງຄົມ ພວກ​ເຂົາ​ເຫຼົ່ານັ້ນ ຖືກ​ເອີ້ນ​ວ່າ: “​ເນັດ ​ໄອ ດໍ” ມີ​ຄວາມໝາຍວ່າ: “ບຸກຄົນ​ທີ່ສົມຄວນ​ເອົາ​ເປັນ​ແບບຢ່າງ” ສິ່ງ​ທີ່​ພວກ​ເຂົາ​ຈະ​ໄດ້​ຕອບ​ແທນ​ຈາກ​ການ​ເປັນ​ຄົນ​ດັງ​ໃນ​ໂລກ​ອອນ​ໄລ​ນ໌ກໍ​ຄື ລາຍ​ໄດ້​ຈາກ​ການ​ລີ​ວິວສິນຄ້າ​ປະ​ເພດ​ເຄື່ອງ​ສໍາອາງ, ​ເສື້ອຜ້າ ​ແລະ​ອາຫານ​ເສີມບໍາລຸງ​ຕ່າງໆ. ​ເພາະ​ຖ້າ​ຫາກ​ໃຜ​ທີ່​ມີ​ຍອດ​ຕິດຕາມ​ສູງ ຫຼືມີ​ຄົນ​ນິຍົມຫຼາຍກໍ​ຈະ​ມີ​ງານ​ເຂົ້າມາ​ຕະຫຼອດ ​ເຊິ່ງມັນ​ໄດ້​ສ້າງລາຍ​ໄດ້​ຈໍານວນໜຶ່ງ​ໃຫ້​ແກ່​ພວກ​ເຂົາ​ເຈົ້າ.

ນັ້ນກໍ​ແມ່ນ​ເຫດຜົນໜຶ່ງທີ່​ເຮັດ​ໃຫ້​ຄົນ​ຈໍານວນໜຶ່ງຢາກ​ສ້າງ​ໃຫ້​ຕົນ​ເອງ​ມີ​ບົດບາດ​ໃນ​ໂລກ​ອອນ​ໄລ​ນ໌ ​ເພື່ອ​ທີ່​ຈະ​ໄດ້​ສິ່ງ​ນັ້ນຕອຍບ​ແທນ​ມາ. ​ແຕ່​ກົງກັນຂ້າມ​ກັບ​ຄົນ​ກຸ່ມ​ທີ່​ຕ້ອງການ​ດັງ​ໃນ​ທາງ​ລົບ ປະ​ພຶດຕົວ​ທີ່​ບໍ່​ເໝາະສົມ ​ແລະ​ອອກ​ໃນ​ລັກສະນະ​ປະຈານ​ຕົນ​ເອງ​ອອກ​ທາງ​ສື່​ອອນ​ໄລ​ນ໌. ​ເລື່ອງ​ດັ່ງກ່າວ​ໄດ້​ກາຍ​ເປັນ​ທີ່​ວິພາກ​ວິຈານ​ຂອງ​ສັງຄົມ​ກ່ຽວກັບ​ການ​ໂປ້​ເປືອຍ​ຮ່າງກາຍ​ຕົນ​ລົງ​ສູ່​ທາງ​ເຟດສ໌ບຸກ ຍິ່ງ​ຊ່ວງ​ທີ່​ຜ່ານ​ມາ​ບັນຫາ​ດັ່ງກ່າວ​ຍິ່ງ​ພົ້ນ​ເດັ່ນ​ຂຶ້ນ​ເລື້ອຍໆ. ​ເລື່ອງ​ທີ່​ເກີດ​ຂຶ້ນທີ່​ພົ້ນ​ເດັ່ນ​ກໍ​ຄື: ຜູ້ຍິງ 3 ຄົນ​ທີ່​ອັດ​ຄລິບ​ເຕັ້ນ​ໂຊ​​ໂປ້​ເປືອຍ​ສ່ວນ​ເທິງ​ຮ່າງ​ກາຍຂອງ​ຕົນ​ລົງ ພ້ອມ​ທັງ​ບອກ​ວ່າ​ເປັນ​ການ​ເຮັດຫຼິ້ນ​ແບບ​ມ່ວນໆ ​ແຕ່​ຄວາມ​ຈິງ​ແລ້ວ​ມັນ​ເປັນ​ການ​ສ້າງ​ຄວາມ​ເສື່ອມ​ເສຍ​ໃຫ້​ແກ່​ວັດ​ທະນະ​ທໍາ​ລາວ​ຢ່າງ​ຮ້າຍ​ແຮງ ​ເພາະ​ແມ່​ຍິງ​ລາວ​ເປັນ​ຄົນຮຽບຮ້ອຍ​ຈົ່ງ​ຈຽມ ​ພາຍຫຼັງ​ພວກ​ເຂົາປ່ອຍພຶດຕິ​ກໍາ​ດັ່ງກ່າວ​ຂອງ​ຕົນ​ລົງກໍ​ເຮັດ​ໃຫ້ຊາວ​ເນັດ​ພາກັນ​ວິພາກ​ວິຈານ​ຢ່າງໜັກ ​ແລະ​ຮ້າຍ​ແຮງໄປ​ກວ່າ​ນັ້ນກໍ​ຄື​ສາວ​ປະ​ເພດ​ສອງ​ທີ່​ຊື່ວ່າ: ວິລະ​ພອນ (ປ້ອມ) ທີ່​ອອກ​ມາ​ໂຊ​ແບບ​ບໍ່​ເໝາະສົມ ພ້ອມ​ທັງ​ອານາ​ຈານ​ຕົນ​ເອງ​ລົງ​ສູ່​ອອນ​ໄລ​ນ໌ ​ເຊິ່ງກໍ​ໄດ້​ມີ​ຄົນ​ແຫ່​ປະຈານ​ຢ່າງ​ຖະຫຼົ່ມຖະລາຍຈົນ​ຜູ້ກ່ຽວຕ້ອງ​ໄດ້​ອອກ​ມາ​ຂໍ​ໂທດ ​ແລະ​ຍອມຮັບ​ຜິດ ​ໂດຍ​ອ້າງ​ວ່າ​ສິ່ງ​ທີ່​ເຮັດ​ລົງ​ໄປ​ຄື​ວຽກຢ່າງໜຶ່ງຂອງ​ຕົນ.

ຝາກ​ເຖິງ​ພາກສ່ວນ​ທີ່​ກ່ຽວຂ້ອງ​ຈັດການ ​ແລະ​ແກ້​ໄຂ​ບັນຫາ​ດັ່ງກ່າວ​ຢ່າງ​ຈິງ​ຈັງ ​ເພາະ​ຖ້າ​ປ່ອຍປະ​ລະ​ເລີຍ​ກໍ​ຈະ​ເຮັດ​ໃຫ້​ບັນຫາ​ມັນ​ໃຫຍ່​ຂຶ້ນ​ເລື້ອຍໆ ​ເພາະ​ບາງ​ຄົນ​ກໍ​​ເຮັດ​ແບບ​ບໍ່ຄິດ​ເຖິງ​ຜົນ​ກະທົບ​ໃດໆທີ່​ມັນ​ຈະ​ຕາມ​ມາ ​ແລະ​ບຸກຄົນ​ໃດ​ທີ່​ຈະ​ເຮັດ​ແບບ​ນີ້​ກໍ​ຄວນ​ຄິດ​ໃຫ້​ດີໆ ຖ້າ​ບໍ່ອາຍ​ຕົນ​ເອງ​ກໍ​ໃຫ້​ຄິດ​ເຖິງ​ໃບໜ້າ​ໃບ​ຕາ​ຂອງ​ພໍ່​ແມ່ ​ແລະ​ຍາດຕິ​ພີ່ນ້ອງ​ກໍ​ຄົງ​ຈະ​ດີ ​ເພາະ​ຕ້ອງ​ເສື່ອ​ມ​ເສຍ​ຍ້ອນ​ເລື່ອງ​ທີ່ໜ້າອາຍ​ແບບ​ນີ້.

ທີ່ມາ: ​ໂດຍ: ສີ​ເປື້ອນມື
  • ແທັກທີ່ກ່ຽວຂ້ອງ