• ທ່ຽວຊົມສວນດອກໄມ້ພາກໃຕ້ເຂດໜາວ

ໂດຍ: ແມວດຳ 07 ມິຖຸນາ 2018 (05.06 ນ.) Read : 1,859

“ປາກຊ່ອງ” ເປັນເມືອງດຽວໃນພາກໃຕ້ທີ່ມີອາກາດເຢັນຕະຫຼອດປີ, ມີສະຖານທີ່ທ່ອງທ່ຽວທາງທຳມະຊາດຫຼາຍແຫ່ງທີ່ດຶງດູດນັກທ່ອງທ່ຽວ. ນອກຈາກນີ້ ຍັງມີແຫຼ່ງທ່ອງທ່ຽວແຫ່ງໜຶ່ງທີ່ນັກທ່ອງທ່ຽວຄວນໄປທ່ຽວຊົມນັ້ນກໍຄືສວນດອກໄມ້ “ມົນຕາຈຳປາລາວ”.

ສວນດັ່ງກ່າວນີ້ ຕັ້ງຢູ່ບ້ານ ຫຼັກ 11, ເມືອງປາກຊ່ອງ, ແຂວງຈຳປາສັກ. ເຊິ່ງຫ່າງຈາກເທດສະບານເມືອງປາກຊ່ອງພຽງ 11 ກິໂລແມັດ. ຍ້ອນຄວາມພິເສດທາງດ້ານພູມອາກາດທີ່ໜາວເຢັນເຊິ່ງເໝາະສົມໃນການເພາະພັນດອກໄມ້ນາໆພັນ. ສວນມົນຕາຈໍາປາລາວໄດ້ເລີ່ມເປີດໃຫ້ນັກທ່ອງທ່ຽວເຂົ້າທ່ຽວຊົມໃນຕົ້ນປີ 2017, ພ້ອມທັງກາຍເປັນສວນດອກໄມ້ຮວບຮວມເອົາບັນດາດອກໄມ້ນາໆພັນມາປູກໄວ້ໃນເນື້ອທີ່ ທີ່ກວ້າງເຖິງ 30 ເຮັກຕາ ເພື່ອໃຫ້ນັກທ່ອງທ່ຽວໂດຍສະເພາະປະຊາຊົນລາວທີ່ສາມາດມາທ່ຽວຊົມໄດ້ແບບບໍ່ຕ້ອງໄປໄກເຖິງຕ່າງປະເທດກັນເລີຍ! ເຊິ່ງຈຸດເດັ່ນຫຼັກໆຂອງສວນແຫ່ງນີ້ ແມ່ນທົ່ງດອກ ເຊນທັນຄອລ ຫຼາກຫຼາຍສີທີ່ນຳເຂົ້າມາຈາກຕ່າງປະເທດ, ມີຟາມດອກກ້ວຍໄມ້ ແລະດອກກຸຫຼາບຫຼາກຫຼາຍສາຍພັນ, ສວນສະຕໍເບີລີ, ສວນຜັກ ເຊິ່ງນັກທ່ອງທ່ຽວສາມາດເກັບຜັກ ແລະໝາກສະຕໍເບີລີໄດ້ແບບສົດໆ. ຖ້າຫາກນັກທ່ອງທ່ຽວທ່ານໃດຢາກສຳຜັດກັບບັນຍາກາດແບບເຕັມອິ່ມຜູ້ຂຽນຂໍແນະນຳວ່າຄວນພັກແຮມຄືນຢູ່ພາຍໃນສວນ ເພາະວ່າໃນຕອນກາງຄືນຕົ້ນໄມ້ພາຍໃນສວນຈະຖືກຕົບແຕ່ງດ້ວຍຫຼອດໄຟເພື່ອໃຫ້ເຂົ້າກັບບັນຍາກາດພ້ອມທັງເພີ່ມຄວາມສວຍງາມໃຫ້ແກ່ສວນໃນຍາມລາຕີ ແລະການເລາະຊົມສວນໃນຍາມຄ່ຳຄືນຍັງເໝາະສົມສຳລັບນັກທ່ອງທ່ຽວທີ່ມັກການຊົມດາວ, ເຊິ່ງທ່ານຈະສາມາດເບິ່ງເຫັນດາວໄດ້ຢ່າງແຈ່ມແຈ້ງ. ນອກຈາກນີ້, ນັກທ່ອງທ່ຽວຍັງຈະໄດ້ພົບກັບອຸມົງຫຼອດໄຟຂະໜາດໃຫຍ່ທີ່ມີຄວາມສວຍງາມ ແລະສາມາດພົບເຫັນໄດ້ແຫ່ງດຽວໃນປະເທດລາວກໍຄືຢູ່ໃນສວນ “ມົນຕາຈຳປາລາວ” ແຫ່ງນີ້ແຫ່ງດຽວເທົ່ານັ້ນ. 

ສວນດອກໄມ້ ມົນຕາຈຳປາລາວແຫ່ງນີ້ ເໝາະສຳລັບນັກທ່ອງທ່ຽວທີ່ມັກຮັກໃນການທ່ອງທ່ຽວແບບການກະສິກຳ ແລະຍັງເປັນຣີສອດທີ່ຖືກອອກແບບໃຫ້ແຕກຕ່າງ, ເຊິ່ງນັກທ່ອງທ່ຽວສາມາດພັກຜ່ອນຢູ່ທ່າມກາງດອກໄມ້ ແລະທຳມະຊາດໄດ້, ບໍ່ວ່າທ່ານຈະມາແບບຄູ່ຮັກ ຫຼືແບບຄອບຄົວກໍສະດວກໃນການພັກເຊົາ.

ຂໍຂອບໃຈຂໍ້ມູນ ແລະຮູບພາບ: ຈາກສວນມົນຕາຈຳປາລາວ



ທີ່ມາ: ຈາກສວນມົນຕາຈຳປາລາວ