• ເມແບັງ ສ້າງອາຄານທີ່ພັກ ແລະຝຶກອົບຮົມ ສົ່ງເສີມການຕໍ່າແຜ່ນແພ

ໂດຍ: ສີເປື້ອນມື 16 ຕຸລາ 2018 (16.49 ນ.) Read : 489

ໃນວັນທີ 12 ຕຸລາ 2018 ທາງມູນນິທິເມແບັງ ຮ່ວມກັບບໍລິສັດ ປູກມອນລ້ຽງມ້ອນ ສາວໄໝ ຈໍາກັດ ໄດ້ຈັດພິທີເປີດນໍາໃຊ້ອາຄານທີ່ພັກ ແລະຝຶກອົບຮົມ ເອົາເຕັກນິກດ້ານວິຊາການໃໝ່ໆໃນດ້ານການປູກມອນລ້ຽງມ້ອນ ສາວໄໝ ອິນຊີແບບຄົບວົງຈອນສໍາລັບແມ່ຍິງຕໍ່າແຜ່ນ ໃນໂຄງການ “MayBank Women Eco-Weavers Hostel ຫຼືໂຄງການ ແມ່ຍິງ ຕໍ່າແຜ່ນແພ ເມແບັງ ຢ່າງເປັນທາງການ ຢູ່ທີ່ສວນມອນ ເມືອງ ແປກ ແຂວງ ຊຽງຂວາງ. ໃຫ້ກຽດເຂົ້າຮ່ວມພິທີ ໄດ້ແກ່: ທ່ານ ບຸນໂຮມ ເທບທານີ ຕາງໜ້າເຈົ້າແຂວງໆ ຊຽງຂວາງ, ທ່ານ ນາງ ດາຕຸກ ໂມຮາຍຢານີ ແຊມສູດິນ ປະທານ ທະນາຄານ ເມແບັງ ແລະມູນນິທິເມແບັງ, ທ່ານ ນາງ ກົມມະລີ ຈັນທະວົງ ປະທານ ບໍລິສັດ ປູກມອນລ້ຽງມ້ອນ ສາວໄໝ ຈໍາກັດ ແລະທ່ານ ຊາຣິວ ອາຊວາ ຈີມິນ ພ້ອມດ້ວຍແຂກທີ່ຖືກເຊີນຈາກພາກລັດ ແລະເອກະຊົນ.

ອາຄານໄດ້ເລີ່ມກໍ່ສ້າງຕັ້ງແຕ່ເດືອນ ເມສາ 2018 ເປັນຕົ້ນມາ ໂດຍໃຊ້ງົບປະມານ 60.000 ໂດລາສະຫະລັດ. ມີ 2 ຫ້ອງນອນ ແຍກເປັນຫ້ອງຍິງ-ຊາຍ; ໃນຫ້ອງໜຶ່ງສາມາດພັກໄດ້ 10 ຄົນ, ມີຫ້ອງຮຽນ 1 ຫ້ອງ ທີ່ໃຊ້ສໍາລັບການຝຶກອົບຮົມ. ເພື່ອສ້າງຄວາມສະດວກສະບາຍ ໃຫ້ກັບຜູ້ທີ່ສົນໃຈຢາກຝຶກອົບຮົບໃນດ້ານການຕໍ່າແຜ່ນ ໂດຍສະເພາະແມ່ຍິງທີ່ອາໄສຢູ່ໃນຂົງເຂດຊົນນະບົດ ບໍ່ຄ່ອຍໄດ້ມີໂອກາດໄດ້ ສຶກສາ, ຍັງຂາດສະຖານທີ່ພັກ ແລະຝຶກອົບຮົມ ທາງມູນນິທິເມແບັງ ຈຶ່ງໄດ້ເຫັນເຖິງຄວາມສໍາຄັນດັ່ງກ່າວ ແລະດໍາເນີນການສ້າງຫໍພັກເຊົາສໍາລັບຜູ້ທີ່ຈະມາຝຶກອົບຮົມການຕໍ່າແຜ່ນແພ.

ໂຄງການສົ່ງເສີມຕໍ່າແຜ່ນແນວອະນຸລັກ ຂອງມູນນິທິເມແບັງ ໄດ້ເລີ່ມຕັ້ງແຕ່ປີ 2016 ເຊິ່ງສົ່ງເສີມໂຄງການຕໍ່າແຜ່ນແພໃນ 4 ປະເທດ ໄດ້ແກ່: ລາວ, ກໍາປູເຈຍ, ອິນໂດເນເຊຍ, ມາເລເຊຍ. ໂຄງການດັ່ງກ່າວໄດ້ເຮັດໃຫ້ແມ່ຍິງມີວຽກເຮັດງານທໍາ ແລະມີລາຍໄດ້ທີ່ກຸ້ມຕົນເອງ. ທັງນີ້ກໍເປັນການຊ່ວຍເຫຼືອສ້າງຄວາມຍືນຍົງໃຫ້ແກ່ມໍລະດົກ ແລະວັດທະນະທໍາທ້ອງຖິ່ນ, ໃຫ້ຜູ້ສຶກສາໄດ້ຮຽນຮູ້ວິທີການໃໝ່ໆ ແລະສົ່ງເສີມຜະລິດຕະພັນຕໍ່າແຜ່ນແພພື້ນເມືອງອອກສູ່ສາກົນ.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ