• ຕຳນານນ້ຳຕົກຕາດຮ້ອຍຄົວ

ໂດຍ: ແມວດຳ 07 ມິຖຸນາ 2018 (04.36 ນ.) Read : 839

ປະເທດລາວມີນ້ຳຕົກຕາດຫຼາຍແຫ່ງທີ່ໄດ້ຮັບການພັດທະນາໃຫ້ກາຍເປັນແຫຼ່ງທ່ອງທ່ຽວຈົນໄດ້ຮັບຄວາມນິຍົມຈາກແຂກທັງພາຍໃນ ແລະຕ່າງປະເທດ. ໜຶ່ງໃນນັ້ນກໍມີນ້ຳຕົກຕາດຮ້ອຍຄົວ.

ນ້ຳຕົກຕາດຮ້ອຍຄົວມີທີ່ຕັ້ງຢູ່ບ້ານປາກຫຼືງ, ເມືອງຈອມເພັດ, ແຂວງຫຼວງພະບາງ. ຕາດດັ່ງກ່າວມີຕຳນານເລົ່າຂານກັນວ່າ: ແຕ່ກີ້ແຕ່ກ່ອນ ໃນບໍລິເວນນ້ຳຕົກຕາດແຫ່ງນີ້ມີຖ້ຳທີ່ບໍ່ໃຫຍ່ຫຼາຍ ແລະມີປະຊາຊົນອາໄສຢູ່ໃນຖ້ຳຈຳນວນ 100 ຄົວເຮືອນ, ຕໍ່ມາເກີດໄພພິບັດທາງທຳມະຊາດເຮັດໃຫ້ມີກ້ອນຫີນໃຫຍ່ເຈື່ອນລົງມາທັບຖົມປາກຖ້ຳເຮັດໃຫ້ທຸກຄົວເຮືອນທີ່ຢູ່ໃນຖ້ຳຈົບຊີວິດລົງພ້ອມກັນ. ດັ່ງນັ້ນ ປະຊາຊົນຈຶ່ງຕັ້ງຊື່ນ້ຳຕົກຕາດນີ້ວ່າ: “ນ້ຳຕົກຕາດຮ້ອຍຄົວ”. ເຊິ່ງໃນປັດຈຸບັນນ້ຳຕົກຕາດດັ່ງກ່າວກໍເປັນສະຖານທີ່ທ່ອງທ່ຽວທາງທຳມະຊາດທີ່ກຳລັງໄດ້ຮັບຄວາມນິຍົມທັງແຂກພາຍໃນ ແລະຕ່າງປະເທດ, ຈຸດພິເສດຂອງນ້ຳຕົກຕາດແຫ່ງນີ້ແມ່ນມີຄວາມສູງເຖິງ 30 ແມັດ, ເປັນນ້ຳຕົກຕາດທີ່ມີ 9 ຊັ້ນ ແຕ່ລະຊັ້ນມີຫຍ້າສີຂຽວປົກຄຸມຄືກັບນ້ຳຕົກຕາດທີ່ຢູ່ໃນເທບນິຍາຍ, ຫຍ້າດັ່ງກ່າວຈະປົກຄຸມພະລານຫີນທີ່ແຕ່ລະຊັ້ນໄວ້ຕະຫຼອດປີບໍ່ມີຫ່ຽວແຫ້ງ. ໃນລະດູແລ້ງຈະມີນໍ້າໄຫຼລົງມາເບື້ອງຂວາພຽງເບື້ອງດຽວ, ແຕ່ໃນລະດູຝົນໄລຍະເດືອນກໍລະກົດ ຫາ ເດືອນ ຕຸລາຈະມີນ້ຳຫຼາຍ ແລະງາມທີ່ສຸດ. ຈຸດພິເສດອີກຢ່າງໜຶ່ງກໍຄື ໃນປັດຈຸບັນສະຖານທີ່ແຫ່ງນີ້ບໍ່ໄດ້ມີພຽງນ້ຳຕົກຕາດ ແຕ່ຍັງມີສວນດອກໄມ້ທີ່ສວຍງາມໄວ້ໃຫ້ນັກທ່ອງທ່ຽວໄດ້ຊົມ ແລະເປັນຈຸດຖ່າຍຮູບສຳລັບຄົນທີ່ມັກຮັກການຖ່າຍຮູບ, ເໝາະສົມແກ່ການເດີນທາງໄປພັກຜ່ອນເພາະເປັນສະຖານທີ່ ທີ່ອຳນວຍຄວາມສະດວກທາງດ້ານຮ້ານອາຫານ, ທີ່ພັກຕ່າງໆ ແລະຍັງມີກິດຈະກຳຂີ່ສະລິງ, ຍ່າງເລາະປ່າທີ່ເໝາະກັບນັກທ່ອງທ່ຽວທີ່ມັກການປະຈົນໄພ.

ສຳລັບການເດີນທາງແມ່ນສາມາດເດີນທາງໄປຫານ້ຳຕົກຕາດໄດ້ດ້ວຍທາງນ້ຳ ແລະທາງບົກ. ສາມາດໃຊ້ລົດສ່ວນຕົວ ຫຼືລົດໂດຍສານກໍໄດ້. ສະນັ້ນ ຖ້າຫາກນັກທ່ອງທ່ຽວທ່ານໃດໄດ້ໄປທ່ຽວຊົມແຂວງຫຼວງພະບາງກໍຢ່າລືມໄປແວ່ນ້ຳຕົກຕາດຮ້ອຍຄົວແຫ່ງນີ້ນຳເດີ!.

ຂໍ້ມູນ ແລະຮູບພາບ: Green Jungle Park. ສວນດອກໄມ້ໃນປ່າໃຫ່ຍທີ່ນໍ້າຕົກຕາດຮ້ອຍຄົວ. www.chillpainai.com




ທີ່ມາ: Green Jungle Park. ສວນດອກໄມ້ໃນປ່າໃຫ່ຍທີ່ນໍ້າຕົກຕາດຮ້ອຍຄົວ. www.chillpainai.com
  • ແທັກທີ່ກ່ຽວຂ້ອງ