• ສປຊ ເຕືອນທົ່ວໂລກເລັ່ງຫຼຸດພາວະໂລກຮ້ອນ ກ່ອນພົບຫາຍະນະ

ໂດຍ: ແມວດຳ 09 ຕຸລາ 2018 (16.12 ນ.) Read : 70

ສໍານັກຂ່າວຕ່າງປະເທດລາຍງານເມື່ອ ວັນທີ 8 ຕຸລາ 2018 ວ່າ: ຄະນະກໍາມະການລະຫວ່າງລັດຖະບານວ່າດ້ວຍການປ່ຽນແປງສະພາບພູມອາກາດ ຂອງສະຫະປະຊາຊາດ (IPCC) ອອກລາຍການພິເສດ ຫຼັງຈາກການສຶກສາງານວິໄຈມາດົນກວ່າ 3 ປີ IPCC ໄດ້ຮຽກຮ້ອງໃຫ້ລັດຖະບານທົ່ວໂລກຕ້ອງຮີບດໍາເນີນການຢ່າງເລັ່ງດ່ວນ ເພື່ອຄວບຄຸມພາວະໂລກຮ້ອນໃຫ້ສໍາເລັດພາຍໃນ 12 ປີນີ້ ຫຼືຈົນເຖິງປີ 2030 ບໍ່ດັ່ງນັ້ນ ມະນຸດເທິງໂລກຈະປະເຊີນຄວາມສ່ຽງຈາກໄພພິບັດທັງຈາກພາວະແຫ້ງແລງ, ໄຟໄໜ້ປ່າ, ນໍ້າຖ້ວມ ແລະຂາດແຄນສະບຽງອາຫານຢ່າງຮຸນແຮງ.

ບີບີຊີ ແລະເວັບໄຊເດລີ່ເມລ ແຈ້ງວ່າ: ຕາມລາຍງານພິເສດຂອງ IPCC ທີ່ນໍາສະເໜີລະຫວ່າງມີການຮ່ວມປະຊຸມກັບຕົວແທນລັດຖະບານ ແລະນັກວິທະຍາສາດທີ່ປະເທດເກົາຫຼີໃຕ້ ໄດ້ລະບຸວ່າ ຂະນະນີ້ອຸນຫະພູມໂລກໄດ້ເພີ່ມສູງຂຶ້ນເກີນກວ່າ 1.5 ອົງສາ ຕາມເປົ້າໝາຍທີ່ເຄີຍຕັ້ງໄວ້ຮຽບຮ້ອຍແລ້ວ ເຊິ່ງປັດຈຸບັນເພີ່ມສູງຂຶ້ນເຖິງ 3 ອົງສາ. ດ້ວຍເຫດນີ້ລັດຖະບານທົ່ວໂລກຈຶ່ງຈໍາເປັນຕ້ອງເຮັດການປ່ຽນແປງແບບທີ່ບໍ່ເຄີຍເຮັດມາກ່ອນ ເພື່ອທີ່ຈະເຮັດໃຫ້ອຸນຫະພູມໂລກສູງຂຶ້ນນ້ອຍກວ່າເປົ້າໝາຍທີ່ຕັ້ງໄວ້, ບໍ່ວ່າຈະເປັນການປ່ຽນແປງດ້ານພະລັງງານ, ອຸດສະຫະກໍາ, ການຄົມມະນາຄົມຂົນສົ່ງ, ໄປຈົນເຖິງການກໍ່ສ້າງ ແລະການໃຊ້ຊີວິດປະຈໍາວັນໂດຍສະເພາະການບໍລິໂພກຊີ້ນໃຫ້ໜ້ອຍລົງ.

ນອກຈາກນີ້, ການລາຍງານຂອງ IPCC ຊີ້ວ່າ: ປັດໄຈທີ່ຈະຄວບຄຸມອຸນຫະພູມໂລກບໍ່ໃຫ້ສູງເກີນກວ່າ 1.5 ອົງສາ ຕ້ອງເລີ່ມຈາກຫຼຸດຜ່ອນການໃຊ້ພະລັງງານຈາກຖ່ານຫີນ ເຊິ່ງປັດຈຸບັນທົ່ວໂລກສະເລ່ຍຢູ່ທີ່ 38% ຈໍາເປັນຕ້ອງເຫຼືອເປັນສູນ ໝາຍວ່າ ບໍ່ມີການໃຊ້ພະລັງງານຈາກຖ່ານຫີນອີກເລີຍພາຍໃນປີ 2050 ແລະປະລິມານກ໊າສຄາຣບອນໄດອອກໄຊທີ່ປ່ອຍສູ່ຊັ້ນບັນຍາກາດຄວນຫຼຸດລົງ 45% ຈາກປີ 2010-2030 ແລະຄວນຫຼຸດລົງເຫຼືອສູນໃນປີ 2050.

ທີ່ມາ: ABC Laos News ສຳນັກຂ່າວເອບີຊີລາວ / www.RAOSUKUNGFUNG.com
  • ແທັກທີ່ກ່ຽວຂ້ອງ