• ລາວ-ຫວຽດນາມ ເພີ່ມທະວີການຮ່ວມມືຮອບດ້ານ

ໂດຍ: ແມວດຳ 09 ຕຸລາ 2018 (15.50 ນ.) Read : 504

ວັນທີ 8 ຕຸລາ 2018 ນີ້, ສະຫາຍ ພັນຄຳ ວິພາວັນ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ ແຫ່ງ ສປປ ລາວ ໄດ້ພົບປະສອງຝ່າຍ ກັບ ສະຫາຍ ເຈິ່ນ ກວັກ ເວືອງ ກຳມະການກົມການເມືອງ ຜູ້ປະຈຳການຄະນະເລຂາທິການສູນກາງພັກກອມມູນິດຫວຽດນາມ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະເຮັດວຽກ ຢູ່ ສປປ ລາວ ໃນລະຫວ່າງວັນທີ 8-10 ຕຸລາ 2018 ນີ້. ໃນການພົບປະຄັ້ງນີ້, ທັງສອງຝ່າຍໄດ້ແຈ້ງໃຫ້ກັນຊາບກ່ຽວກັບສະພາບການທີ່ພົ້ນເດັ່ນຂອງແຕ່ລະພັກ, ແຕ່ລະປະເທດ, ພ້ອມກັນສັງເກດຕີລາຄາ ແລະແລກປ່ຽນຄຳຄິດຄຳເຫັນນຳກັນຢ່າງເລິກເຊິ່ງ ກ່ຽວກັບການພົວພັນຮ່ວມມືລະຫວ່າງສອງພັກ, ສອງລັດ ໃນໄລຍະຜ່ານມາ. ພ້ອມນັ້ນ, ທັງສອງຝ່າຍ ຍັງໄດ້ພ້ອມກັນຢືນຢັນວ່າ: ຈະສືບຕໍ່ເພີ່ມທະວີສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ ແລະປະຊາຊົນສອງຊາດ ລາວ-ຫວຽດນາມ ໃຫ້ນັບມື້ນັບມີປະສິດທິຜົນ.

ພ້ອມດຽວກັນນັ້ນ, ຍັງໄດ້ປຶກສາຫາລືກັນກ່ຽວກັບທິດທາງການຮ່ວມມືກັນໃນຕໍ່ໜ້າ ເພື່ອສືບຕໍ່ຈັດຕັ້ງຜັນຂະຫຍາຍເນື້ອໃນຂໍ້ຕົກລົງຂອງການນຳຂັ້ນສູງຂອງສອງພັກ-ລັດ ລາວ-ຫວຽດນາມ. ໃນວັນດຽວກັນ ກໍໄດ້ມີພິທີເຊັນບົດບັນທຶກການຮ່ວມມືລະຫວ່າງ ລາວ-ຫວຽດນາມ ໃນຂົງເຂດວຽກງານການກໍ່ສ້າງ ໂດຍເປັນການລົງນາມລະຫວ່າງ ສະຫາຍ ບຸນຈັນ ສິນທະວົງ ກຳມະການສູນກາງພັກ ປະຊາຊົນ ປະຕິວັດລາວ ລັດ ຖະມົນຕີກະຊວງໂຍທາທິການ ແລະຂົນສົ່ງ ແລະ ສະຫາຍ ຟາມ ຮົ່ງ ຮ່າ ກຳມະການສູນກາງພັກກອມມູນິດຫວຽດນາມ, ລັດຖະມົນຕີກະຊວງກໍ່ສ້າງ, ໂດຍມີ ສະຫາຍ ພັນຄຳ ວິພາວັນ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ ແລະ ສະຫາຍ ເຈິ່ນ ກວັກ ເວືອງ ກຳມະການກົມການເມືອງ, ຜູ້ປະຈຳການຄະນະເລຂາທິການສູນກາງພັກກອມມູນິດຫວຽດນາມ ໃຫ້ກຽດເຂົ້າຮ່ວມເປັນສັກຂີພິຍານ.

ໃນບົດບັນທຶກດັ່ງກ່າວ, ທັງສອງຝ່າຍ ໄດ້ຕົກລົງຮ່ວມມືກັນຊຸກຍູ້ໂຄງການກໍ່ສ້າງສະພາແຫ່ງຊາດ ຂອງ ສປປ ລາວ ໃຫ້ປະຕິບັດໄປຕາມແຜນການທີ່ວາງໄວ້, ຮ່ວມມືກັນໃນຂົງເຂດຄຸ້ມຄອງລັດ ໂດຍສະເພາະແມ່ນຂົງເຂດວຽກງານກໍ່ສ້າງ, ວາງແຜນຜັງຕົວເມືອງ ແລະຮ່ວມມືໃນຂົງເຂດພັດທະນາບຸກຄະລາກອນ, ຮ່ວມກັນຄົ້ນຄວ້າເພື່ອສ້າງເງື່ອນໄຂອຳນວຍຄວາມສະດວກ ໂດຍສະເພາະກ່ຽວກັບຂັ້ນຕອນລະບຽບການໃນຂົງເຂດການຮ່ວມມື ແລະລົງທຶນໃນການກໍ່ສ້າງ, ຊຸກຍູ້ການຮ່ວມມືຂອງສອງກະຊວງເຂົ້າໃນແຜນການຮ່ວມມືປະຈຳປີຂອງຄະນະຮ່ວມມືທະວີພາຄີລະຫວ່າງສອງລັດຖະບານ ລາວ-ຫວຽດນາມ, ຫວຽດນາມ-ລາວ.



ທີ່ມາ: ຂປລ
  • ແທັກທີ່ກ່ຽວຂ້ອງ