• ຄະນະຜູ້ແທນ ສປປ ລາວ ຮ່ວມວາງພວງມາລາແດ່ອາດີດປະທານປະເທດຫວຽດນາມ

ໂດຍ: ແມວດຳ 27 ກັນຍາ 2018 (10.59 ນ.) Read : 804

ໃນລະຫວ່າງວັນທີ 26-27 ກັນຍາ 2018, ສະຫາຍ ພັນຄຳ ວິພາວັນ, ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ, ຕາງໜ້າຄະນະບໍລິຫານງານສູນກາງພັກປະຊາຊົນປະຕິວັດລາວ, ສະພາແຫ່ງຊາດ, ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະສູນກາງແນວລາວສ້າງຊາດ ພ້ອມດ້ວຍ ປະຊາຊົນລາວບັນດາເຜົ່າ, ໄດ້ນຳພາຄະນະເດີນທາງໄປເຂົ້າຮ່ວມພິທີໄຫວ້ອາໄລແດ່ ສະຫາຍ ເຈິ່ນ ດ໋າຍ ກວາງ, ກໍາມະການກົມການເມືອງສູນກາງພັກກອມມູນິດຫວຽດນາມ, ປະທານປະເທດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ, ທີ່ເຖິງແກ່ມໍລະນະກຳ ຢູ່ນະຄອນຫຼວງຮ່າໂນ້ຍ.

ໃນຕອນເຊົ້າຂອງວັນທີ 26 ກັນຍາ 2018, ຄະນະ ໄດ້ໄປວາງພວງມາລາ ແລະຂຽນປື້ມໄຫວ້ອາໄລທີ່ຫໍຊາປະນະກິດສົບແຫ່ງຊາດ, ເຮືອນເລກທີ 5 ເຈິ່ນ ແຖງ ຕົງ, ນະຄອນຫຼວງຮ່າໂນ້ຍ, ເພື່ອສະແດງຄວາມໄຫວ້ອາໄລ ແລະເສຍໃຈຢ່າງສຸດຊຶ້ງ ຕໍ່ການຈາກໄປຂອງ ສະຫາຍ ເຈິ່ນ ດ໋າຍ ກວາງ, ປະທານປະເທດ ແຫ່ງ ສສ. ຫວຽດນາມ, ຜູ້ທີ່ບໍ່ພຽງແຕ່ເປັນຜູ້ນຳທີ່ສຳຄັນຂອງ ສສ. ຫວຽດນາມ ເທົ່ານັ້ນ, ແຕ່ຍັງເປັນເພື່ອນມິດທີ່ໃກ້ຊິດສະໜິດສະໜົມ ຂອງ ສປປ ລາວ. ການຈາກໄປຂອງ ສະຫາຍ ເຈິ່ນ ດ໋າຍ ກວາງ ທີ່ບໍ່ມີວັນຫວນຄືນມາ ເປັນການສູນເສຍອັນໃຫຍ່ຫຼວງ ບໍ່ພຽງແຕ່ຂອງພັກ-ລັດ ແລະປະຊາຊົນຫວຽດນາມອ້າຍນ້ອງເທົ່ານັ້ນ, ແຕ່ຍັງເປັນການສູນເສຍເພື່ອນມິດສະຫາຍຂອງພັກ-ລັດ ແລະ ປະຊາຊົນລາວອີກດ້ວຍ.

ໃນວັນດຽວກັນນີ້, ສະຫາຍ ພັນຄຳ ວິພາວັນ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ສະຫາຍ ຫງວຽນ ຝູ ຈ໋ອງ, ເລຂາທິການໃຫຍ່ພັກກອມມູນິດຫວຽດນາມ, ເພື່ອສະແດງຄວາມເສົ້າໂສກເສຍໃຈອາໄລຮັກຢ່າງສຸດຊຶ້ງ ຕໍ່ການຈາກໄປຂອງ ສະຫາຍ ເຈິ່ນ ດ໋າຍ ກວາງ, ພ້ອມທັງນຳເອົາຄຳຢື້ຢາມຖາມຂ່າວ ແລະຄວາມເສົ້າສະຫຼົດໃຈຈາກ ສະຫາຍ ເລຂາທິການໃຫຍ່, ປະທານປະເທດ ບຸນຍັງ ວໍລະຈິດ ແລະບັນດາການນຳຂັ້ນສູງ ພັກ-ລັດ ແຫ່ງ ສປປ ລາວ ມາຍັງ ພັກ-ລັດ ແລະປະຊາຊົນຫວຽດນາມ ຕໍ່ການສູນເສຍອັນໃຫຍ່ຫຼວງໃນຄັ້ງນີ້, ໂດຍສະເພາະ ແມ່ນຄອບຄົວ ແລະເພື່ອນມິດຂອງ ສະຫາຍ ເຈິ່ນ ດ໋າຍ ກວາງ.

ໃນຕອນເຊົ້າຂອງວັນທີ 27 ກັນຍາ 2018, ຄະນະ ພ້ອມກັບການນຳຂັ້ນສູງ ພັກ-ລັດ ແຫ່ງ ສສ. ຫວຽດນາມ ໄດ້ເຂົ້າຮ່ວມພິທີໄຫວ້ອາໄລຢ່າງເປັນທາງການ ແດ່ ສະຫາຍ ເຈິ່ນ ດ໋າຍ ກວາງ ກ່ອນທີ່ຈະເຄື່ອນສົບໄປຈັດພິທີສົ່ງສະການຕາມປະເພນີຢູ່ບ້ານເກີດຂອງເພິ່ນ ທີ່ ແຂວງນິງບິ່ງ.


ທີ່ມາ: ກົມຂ່າວກະຊວງການຕ່າງປະເທດ
  • ຮູບພາບ

  • ແທັກທີ່ກ່ຽວຂ້ອງ