• ຟິລິປິນ ເສຍຫາຍໜັກຈາກພາຍຸໄຕ້ຝຸ່ນ “ມັງຄຸດ”

ໂດຍ: ແມວດຳ 17 ກັນຍາ 2018 (11.46 ນ.) Read : 69

ສໍານັກຂ່າວຕ່າງປະເທດລາຍງານຈາກນະຄອນມະນິລາ ປະເທດຟິລິປິນ ເມື່ອວັນທີ 17 ກັນຍາ ວ່າ ທ່ານ ມານູເອລ ມັມບາ ເຈົ້າແຂວງ ແຂວງຄາກາຢັນ ເທິງເກາະລູຊອນ ທາງພາກເໜືອຂອງຟິລິປິນ ເຊິ່ງເປັນບໍລິເວນໄດ້ຮັບຄວາມເສຍຫາຍຫຼາຍທີ່ສຸດຈາກອິດທິພົນຂອງໄຕ້ຝຸ່ນມັງຄຸດ ປະກາດຄໍາສັ່ງສະຖານະການໄພພິບັດຄວບຄຸມທັງ 28 ເຂດຂອງແຂວງ ເພື່ອເພີ່ມປະສິດທິພາບໃນການສົ່ງມອບຄວາມຊ່ວຍເຫຼືອທັງຈາກລະດັບທ້ອງຖິ່ນ ແລະລັດຖະບານກາງໃນນະຄອນມະນິລາ.

ທັງນີ້ລະບົບສາທາລະນຸປະໂພກເກືອບທັງໝົດໃນ ແຂວງຄາກາຢັນ ຖືກຕັດຂາດດ້ວຍອິດທິພົນຂອງພາຍຸ, ລະບົບສາຍສົ່ງກະແສໄຟຟ້າຫຼັກທັງ 6 ສາຍຍັງບໍ່ສາມາດໃຊ້ການໄດ້ ແລະສັນຍານໂທລະທັດຖືກຕັດຂາດໃນຫຼາຍພື້ນທີ່ ຂະນະທີ່ທາງການ ແຂວງຄາລິງກາ ເຊິ່ງຕັ້ງຢູ່ທາງຕອນໃຕ້ຂອງ ແຂວງຄາກາຢັນ ກໍໄດ້ປະກາດພາວະໄພພິບັດເຊັ່ນກັນ. ດ້ານລາຍງານໂດຍສໍານັກງານບໍລິຫານຈັດການ ແລະຫຼຸດຄວາມສ່ຽງໄພພິບັດແຫ່ງຊາດຂອງຟິລິປິນ (NDRRNC) ລະບຸຈໍານວນປະຊາຊົນ 250,036 ຄົນ ໃນເມືອງ 332 ແຫ່ງຂອງ 30 ແຂວງເທີງເກາະລູຊອນ ໄດ້ຮັບຜົນກະທົບໂດຍກົງຈາກອິດທິພົນມັງຄຸດ ໃນຈໍາວນນີ້ 34.169 ຄົວເຮືອນ ຫຼືຄິດເປັນປະຊາກອນ 133,457 ຄົນສະໝັກໃຈອົບພະຍົບໄປອາໄສຢູ່ສູນພັກພິງຊົ່ວຄາວເຊິ່ງທາງການຈັດກຽມໄວ້ໃຫ້ 1,190 ແຫ່ງ.

ຢ່າງໃດກໍຕາມ NDRRNC ຍັງບໍ່ເປີດເຜີຍຈໍານວນຜູ້ເສຍຊີວິດຢ່າງເປັນທາງການໂດຍໃຫ້ເຫດຜົນວ່າ “ເຈົ້າໜ້າທີ່ຕ້ອງປະເມີນສະຖານະການກ່ອນ” ແຕ່ສື່ຫຼາຍແຫ່ງທັງໃນ ແລະຕ່າງປະເທດລາຍງານຈໍານວນຜູ້ເສຍຊີວິດໄວ້ທີ່ຢ່າງໜ້ອຍລະຫວ່າງ 59 ເຖິງ 64 ຄົນ ແລະໜ່ວຍກູ້ໄພກໍາລັງເລັ່ງຄົ້ນຫາຜູ້ສູນຫາຍອີກເກືອບ 100 ຄົນ ຫຼັງເກີດເຫດດິນຖະຫລົ່ມລົງທັບເໝືອງແຫ່ງໜຶ່ງ ທີ່ແຂວງແບງເກັດ ທາງຕາເວັນອອກຂອງເກາະລູຊອນ.

ສໍາລັບໄຕ້ຝຸ່ນມັງຄຸດຖືເປັນພາຍຸທີ່ມີຄວາມໄວລົມສູງທີ່ສຸດໃນໂລກປະຈໍາປີນີ້ ຂື້ນຝັ່ງທີ່ແຂວງຄາກາຢັນ ເທິງເກາະລູຊອນຂອງຟິລິປິນ ເມື່ອວັນທີ່ 14 ກັນຍາ ທີ່ຜ່ານມາ ດ້ວຍຄວາມຮຸນແຮງໃນລະດັບ “ຊຸບເປີໄຕ້ຝຸ່ນ” ໂດຍມີຄວາມໄວສູງສຸດໃກ້ສູນກາງປະມານ 255 ກິໂລແມັດຕໍ່ຊົ່ວໂມງ ແລະຄວາມໄວລົມຖະຫລົ່ມປະມານ 300 ກິໂລແມັດຕໍ່ຊົ່ວໂມງ

ທີ່ມາ: ABC Laos News ສຳນັກຂ່າວເອບີຊີລາວ / www.RAOSUKUNGFUNG.com
  • ຮູບພາບ

  • ແທັກທີ່ກ່ຽວຂ້ອງ