ເປົ້າໝາຍຊີວິດຂອງໜຸ່ມສາວໄວລຸ້ນຕອນປາຍຄືຕ້ອງການ ມີຄອບຄົວສົມບູນແບບ ແລະປັດໄຈທີ່ເອື້ອອຳນວຍຄວາມສະດວກໃນການໃຊ້ຊີວິດເຊັ່ນ ເຮືອນ, ລົດຍົນ,... ທີ່ສໍາຄັນຄືມີໜ້າທີ່ວຽກງານທີ່ໝັ້ນຄົງ ເຊິ່ງອາດຈະເປັນຂໍ້ຫຼັກໆ ທີ່ນຳພາຄວາມສຳເລັດຂໍ້ອື່ນໆມາສູ່ຕົນ. ແຕ່ການຊອກວຽກເຮັດງານທໍາດີໆທີ່ມີຄວາມໝັ້ນຄົງກໍຍາກຊາຍິ່ງກວ່າງົມເຂັມໃນມະຫາສະໝຸດ ແລ້ວທ່ານເຄີຍໃຫ້ນິຍາມກັບຕົນເອງແລ້ວຫຼືຍັງວ່າວຽກທີ່ໝັ້ນຄົງແມ່ນວຽກແນວໃດ?

ວຽກທີ່ມີຄວາມໝັ້ນຄົງ ຄືການໄດ້ເປັນຜູ້ບໍລິຫານບໍລິສັດໃຫຍ່ໂຕຂອງຄອບຄົວ ຫຼືການໄດ້ເຂົ້າເຮັດວຽກໃນກະຊວງ ຫຼືໜ່ວຍງານຂອງລັດຖະບານທີ່ມີສະຫວັດດີການຮອບດ້ານທັງບຳເນັດບຳນານຄົບຊຸດແມ່ນຫຼືບໍ່?

ສຳລັບຜູ້ຂຽນ ວຽກທີ່ໝັ້ນຄົງຄືການປະກອບອາຊີບທີ່ສາມາດໃຫ້ຄ່າຕອບແທນຢ່າງຕໍ່ເນື່ອງ ຄ່າຕອບແທນທີ່ວ່ານີ້ບໍ່ແມ່ນສະເພາະເງິນ ແຕ່ໝາຍເຖິງຄວາມຮູ້ໃນວິຊາຊີບນັ້ນໆ ຕົວຢ່າງ ນາງ ກ ໄປເປັນແມ່ຄົວຢູ່ຮ້ານອາຫານຝຣັ່ງ 5ປີຕໍ່ມາ ຮ້ານດັ່ງກ່າວໄດ້ປິດລົງຂະນະທີ່ ນາງ ກ ໄດ້ຄວາມຮູ້ການປຸງແຕ່ງອາຫານຝຣັ່ງ ສາມາດໄປເປັນແມ່ຄົວຢູ່ໃນໂຮງແຮມອື່ນໆ ຫຼືນໍາເອົາເງິນທ້ອນກ້ອນໜຶ່ງໄປເປີດຮ້ານເປັນຂອງຕົນເອງ (ເຈົ້າຂອງກິດຈະການຫຼາຍຄົນຖືກກຳເນີດຈາກເຫດການລັກສະນະນີ້).

ປະການທີສອງ ວຽກທີ່ໝັ້ນຄົງຄືຄວາມຊ່ຽວຊານຢ່າງເລິກເຊິ່ງໃນສາຍອາຊີບນັ້ນໆ ຕົວຢ່າງ ທ້າວ ຂ ມັກຮັກໃນການຖ່າຍຮູບ ລາວເລີ່ມຕົ້ນຈາກການເລາະຖ່າຍຮູບຢູ່ສວນສາທາລະນະ ຕໍ່ມາເລີ່ມຮັບຖ່າຍຮູບຕາມງານແຕ່ງດອງ ແລະອີເວັ້ນຕ່າງໆ ລາວພັດທະນາຝີມືຕົນເອງເລື້ອຍໆຈົນການເປັນຜູ້ຊ່ຽວຊານໃນການຖ່າຍຮູບເປັນທີ່ຮູ້ຈັກຂອງສັງຄົມ, ມີຄົນຈ້າງເປັນເປັນວິທະຍາກອນສອນການຖ່າຍຮູບ; ມີຄວາມສາມາດເປີດສະຕູດິໂອເປັນຂອງຕົນເອງ ລວມເຖິງຈັດຫຼັກສູດສອນການຖ່າຍຮູບ ເຖິງແມ່ນວ່າລາວຈະແກ່ຊະລາຈົນບໍ່ມີແຮງອອກໄປເລາະຖ່າຍຮູບແຕ່ລາວກໍຍັງມີລາຍໄດ້ຈາກການເປັນວິທະຍາກອນນັ້ນເອງ.

ປະການທີສາມ ວຽກທີ່ໝັ້ນຄົງຄືການມີລາຍໄດ້ຫຼາຍຊ່ອງທາງ ຕົວຢ່າງ ນາງ ສ ຮຽນຈົບພາສາອັງກິດ ປັດຈຸບັນເຮັດວຽກເປັນອາຈານສອນພາສາອັງກິດຢູ່ໂຮງຮຽນແຫ່ງໜຶ່ງ. ນອກຈາກນັ້ນ, ນາງກໍຍັງຮັບແປເອກະສານຕ່າງໆເປັນລາຍໄດ້ສຳຮອງ ຫຼືຫຼັງເລີກການກັບເມືອເຮືອນກໍຊ່ວຍຜົວທອດເຂົ້າໜົມໄປສົ່ງຂາຍຕາມຮ້ານຄ້າ ຖືເປັນລາຍໄດ້ຊ່ອງທາງທີສາມ.

ສຳລັບວຽກທີ່ບໍ່ໝັ້ນຄົງແບບເຫັນເປັນຮູບປະທຳຄື ການເຮັດວຽກທີ່ໃຫ້ລາຍໄດ້ເທົ່າກັບລາຍຈ່າຍ(ບໍ່ເຫຼືອເງິນໄວ້ເກັບທ້ອນເພື່ອການໃຊ້ຈ່າຍສຸກເສີນ), ວຽກທີ່ສ່ຽງຕໍ່ການເສຍສຸຂະພາບ ຫຼືເສຍຊີວິດ, ວຽກທີ່ຜູ້ເຮັດວຽກຂີ້ຄ້ານພັດທະນາສັກກະຍະພາບການເຮັດວຽກຂອງຕົນເອງເປັນຕົ້ນ.

ສັດຈະທຳຂອງໂລກນີ້ຄືບໍ່ມີຄົງຢູ່ຢ່າງຈີລັງ ສິ່ງທີ່ແນ່ທີ່ສຸດຄືຄວາມບໍ່ແນ່ນອນ. ຕັກກະຂໍ້ນີ້ສາມາດໃຊ້ໄດ້ ເຊັ່ນດຽວກັບການເຮັດວຽກຫັ້ນລະ! ບໍ່ມີວຽກໃດທີ່ໝັ້ນຄົງ ຖ້າຫາກຄົນເຮົາບໍ່ມີສະຕິຮັບມືຕໍ່ການປ່ຽນແປງ ແລະຮູ້ຈັກປັບຕົວໃຫ້ເໝາະສົມເພື່ອການຢູ່ລອດ. ຫວັງວ່າຈະເປັນຂໍ້ຄິດໜຶ່ງທີ່ຊ່ວຍໃຫ້ທ່ານຜູ້ອ່ານນຳໄປໝູນໃຊ້ໃນການດຳລົງຊີວິດ ແລະປະຕິບັດໜ້າທີ່ວຽກງານໃຫ້ມີຄວາມຜາສຸກ.