• ສະຖາບັນ ທຸລະກິດ ແສງສະຫວັນ ພ້ອມຮອງຮັບນັກສຶກສາທີ່ລົ້ນຈາກ ມຊ

ໂດຍ: ສີເປື້ອນມື 24 ກັນຍາ 2020 (15.18 ນ.) Read : 167

ໃນປີນີ້ ມະຫາວະທະຍາໄລແຫ່ງຊາດ ໄດ້ຈັດການສອບເສັງຄັດເລືອກເອົານັກສຶກສາໃໝ່ປະຈໍາສົກຮຽນ 2020-2021 ມີທັງໝົດ 14.300 ກວ່າຄົນ ແລະຈະຮັບເອົາພຽງ 9.300 ກວ່າຄົນ. ສ່ວນທີ່ເຫລືອຄາດວ່າອາດຈະໄປຊອກຮຽນໃນສາຂາວິຊາຊີບ, ວິທະຍາໄລພາກເອກະຊົນ ແລະສະຖານການສຶກສາເອກະຊົນທີ່ມີຮອງຮັບໄວ້ແລ້ວ.

ທ່ານ ປອ ຄຳແສນ ສີສະວົງ ປະທານ​ສະມາຄົມການສຶກສາພາກເອກະຊົນ ທັງເປັນປະທານກຸ່ມແສງສະຫວັນ ໄດ້ໃຫ້ສໍາພາດວ່າ: ຮູ້ສຶກດີໃຈ ແລະຮູ້ບຸນຄຸນຕໍ່ພັກ-ລັດຖະບານທີ່ມີນະໂຍບາຍເປີດກວ້າງສົ່ງເສີມການພັດທະນາການສຶກສາ ແລະສ້າງວຽກເຮັດງານທໍາໃຫ້ແກ່ປະຊາຊົນລາວ ລວມທັງລູກຫລານຂອງປະຊາຊົາສາມາດເຂົ້າເຖິງການສຶກສາໄດ້ຢ່າງທົ່ວເຖິງ. ໃນສົກຮຽນ 2020-2021 ພວກເຮົາໄດ້ຮັບອະນຸຍາດຈາກກະຊວງສຶກສາທິການ ແລະ ກີລາ ໃຫ້ຍົກລະດັບຈາກວິທະຍາໄລ ແສງສະຫວັນ ມາເປັນສະຖາບັນ ບໍລິຫານທຸລະກິດ ແສງສະຫວັນ ເຊິ່ງສາມາດສິດສອນລະດັບປະລິນຍາຕີ ແລະປະລິຍາໂທອີກດ້ວຍ.

      ປັດຈຸບັນ ລັດຖະບານ ໄດ້ອະນຸມັດໃຫ້ເປັນສະຖາບັນການສຶກສາພາກເອກະຊົນ ພຽງແຕ່ 2 ແຫ່ງ ຄື:  ສະຖາບັນບໍລິຫານທຸລະກິດແສງສະຫວັນ ແລະສະຖາບັນ ລັດຕະນະ ບໍລິຫານທຸລະກິດ ສາມາດສິດສອນໃນລະດັບປະລິນຍາຕີ ແລະປະລິນຍາໂທ. ແຕ່ລະສົກຮຽນ ເພີ່ນໄດ້ອະນຸມັດໃຫ້ຮັບນັກສຶກສາໃນຈໍານວນຈຳກັດ. ສໍາລັບ ແສງສະຫວັນ ແມ່ນຈະຮັບຕົວເລກສໍາລັບນັກຮຽນປະມານ 300 ຄົນ ເຊິ່ງມີ 5 ສາຂາວິຊາ ແລະປັດຈຸບັນປະຕິບັດໄດ້ແຕ່ 3-4 ສາຂາວິຊາຄື:  ຫລັກສູດປະລິນຍາຕີບໍລິຫານທຸລະກິດໂດຍຂະແໜ່ງດັ່ງກ່າວແມ່ນຮຽນຮອດປີ 4 ແມ່ນອາດຈະລົງເລິກໄປແຕ່ລະສາຍແຕກຕ່າງກັນເຊັ່ນ: ການຕະຫລາດ, ການບັນຊີ-ການເງິນ, ການບໍລິຫານຄຸ້ມຄ່ອງບຸກຄະລາກອນ ແລະຫລັກສູດຜູ້ປະກອບການ.

ສະຖາບັນ ແສງສະຫວັນ ແບ່ງອອກເປັນ 2 ວິທະຍາເຂດ ຄື: ວິທະຍາເຂດຫລັກ ແມ່ນຕັ້ງຢູ່ຫລັກ 21 ເມືອງ ໄຊທານີ ນະຄອນຫລວງວຽງຈັນ ເປັນເຂດຊານເມືອງ ແລະເປັນໂຮງຮຽນກິນນອນ ມີຫໍພັກຮັບໃຊ້ໃຫ້ແກ່ນັກສຶກສາຕ່າງແຂວງ, ມີສະໜາມກີລາ, ເຕະບານຫຍ້າທຽມຄົບວົງຈອນ, ມີຫ້ອງປະຊຸມ ແລະຫໍສະໝຸດ. ສ່ວນວິທະຍາເຂດ ທີ 2 ຕັ້ງຢູ່ບ້ານ ບ້ານສີສະຫວາດ ແມ່ນເປັນຄະນະວິຊາໜຶ່ງສ່ວນຫລາຍແມ່ນຈະຮຽນດ້ານເສດຖະກິດເປັນຫລັກ ເນື່ອງຈາກອີງໃສ່ສະຖານທີ່ແມ່ນຕັ້ງຢູ່ໃນເມືອງ ການໄປການມາຂ້ອນຂ້າງມີຄວາມສະດວກສະບາຍໃຫ້ແກ່ນັກສຶກສາ.

ການພັດທະນາປັບປຸງພື້ນຖານໂຄງລາງຫລັກສູດ, ພວກເຮົາກໍໄດ້ພັດທະນາແລ້ວມີ 5 ຫລັກສູດ 5ສາຂາວິຊາ ນອກນັ້ນ, ຍັງໄດ້ມີການຍົກລະດັບບັນດາຄູອາຈານ ແລະໄດ້ມີການຮ່ວມມືກັບມະຫາວິທະຍາໄລຕ່າງປະເທດ ເຖິງແມ່ນວ່າຈະຢູ່ໃນໄລຍະທີ່ພະຍາດໂຄວິດ-19 ລະບາດ ທາງເຮົາກໍຍັງມີການພົວພັນຮ່ວມມືທາງດ້ານໂຄງການຫລັກສູດ ການແລກປ່ຽນການຮຽນການສອນ ແລະການຄົ້ນຄວ້າທາງວິທະຍາສາດຕ່າງໆທາງອອນລາຍ ກັບບັນດາມະຫາວິທະຍາໄລທີ່ເປັນຄູ່ຮ່ວມມືຢູ່ໃນປະເທດອາຊຽນຂອງພວກເຮົາກັບຫລາຍໆມະຫາວິທະຍາໄລເຊັ່ນ: ມາເລເຊຍ,  ໄທ,  ສິງກະໂປ,  ອົດສະຕາລີ ແລະ ມະຫາວິທະຍາໄລອື່ນໆ.

ພິເສດຍັງມີການຮ່ວມມືກັບມະຫາວິທະຍາໄລຂອງປະເທດຫວຽດນາມ ທີ່ເຮົາສ້າງຫລັກສູດຊ໋ອບແວເຊຍຍະລິງ ນັ້ນແມ່ນການພັດທະນາພື້ນຖານໂຄງລ່າງ, ສະນັ້ນ, ເພື່ອຢັ້ງຢືນແກ່ຜູ້ປົກຄອງແກ່ສັງຄົມວ່າການສຶກສາເອກກະຊົນລາວ. ເວົ້າລວມ, ເວົ້າສະເພາະ ກໍຄືການສຶກສາຊັ້ນສູງຂອງພວກເຮົາ ກໍມີການສຶບຕໍ່ປັບປຸງພັດທະນາທັງປະລິມານ ແລະຄຸນນະພາບໃຫ້ດີຂຶ້ນຢ່າງໜັກແໜ້ນເພື່ອຕອບສະໜອງຄວາມຮຽກຮ້ອງຕ້ອງການຂອງນັກຮຽນນັກສຶກສາພາຍໃນປະເທດ.




ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ