• ຄົບຮອບ 22 ປີ ການສ້າງຕັ້ງກຸ່ມການສຶກສາ ແສງສະຫວັນ (18/08/1998-18/08/2020)

ໂດຍ: ສີເປື້ອນມື 19 ສິງຫາ 2020 (15.43 ນ.) Read : 204

ໃນວັນທີ 18 ສິງຫາ 2020 ຜ່ານມາ ໄດ້ມີພິທີເປີດສະຖາບັນ ທຸລະກິດ ວິທະຍາເຂດ ຫຼັກ 21 ແຫ່ງໃໝ່ ແລະເປີດການນໍາໃຊ້ ສະໜາມກີລາເຕະບານຫຍ້າທຽມ ພ້ອມສະເຫຼີມສະຫຼອງການສ້າງຕັ້ງກຸ່ມການສຶກສາ ແສງສະຫວັນ ຄົບຮອບ 22 ປີ ທີ່ສະຖາບັນ ທຸລະກິດ ແສງສະຫວັນ (ຫຼັກ 21) ນະຄອນຫຼວງວຽງຈັນ. ໂດຍການເປັນປະທານຂອງທ່ານ ປອ. ຄໍາແສນ ສີສະວົງ ປະທານກຸ່ມການສຶກສາ ແສງສະຫວັນ ແລະໃຫ້ກຽດເຂົາຮ່ວມໂດຍ ທ່ານ ອາລຸນໄຊ ສູນນະລາດ, ກໍາມະການສໍາຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ, ທ່ານ ຮສ. ປອ ພຸດ ສິມມາລາວົງ, ຮອງລັດຖະມົນຕີກະຊວງສຶກສາທິການ ແລະ ກີລາ, ບັນດາທ່ານອະດີດລັດຖະມົນຕີ, ຮອງລັດຖະມົນຕີ, ທ່ານຫົວໜ້າກົມ, ຫົວໜ້າຫ້ອງການກະຊວງສຶກສາທິການ ແລະ ກີລາ, ຫົວໜ້າພະແນກການ ແລະກະຊວງອ້ອມຂ້າງ, ບັນດາເອກອັກຄະລາສະທູດ, ບັນດາທ່ານຈາກອົງການທາງພັກ-ລັດ ແລະເອກະຊົນ ເຂົ້າຮ່ວມຢ່າງຫຼວງຫຼາຍ.

ກຸ່ມການສຶກສາ ແສງສະຫວັນ ໄດ້ສ້າງຕັ້ງຂຶ້ນໃນວັນທີ 18 ສິງຫາ 1998 ໂດຍໄດ້ຮັບອະນຸຍາດຈາກກະຊວງສຶກສາທິການ ແລະ ກີລາ ໃຫ້ສ້າງຕັ້ງເປັນສູນພາສາຕ່າງປະເທດ, ມາຮອດປີ 2000 ກໍໄດ້ພັດທະນາຍົກຖານະເປັນວິທະຍາໄລ ບໍລິຫານທຸລະກິດ ແສງສະຫວັນ (ໄດ້ສິດສອນລະດັບຊັ້ນສູງ, ປະລິນຍາຕີ, ປະລິນຍາໂທ ສອນຫຼັກສູດບໍລິຫານທຸລະກິດ ແລະ ຫຼັກສູດພາສາອັງກິດ). ພ້ອມດຽວກັນນັ້ນ, ໃນປີ 2003 ກຸ່ມການສຶກສາ ແສງສະຫວັນ ກໍ່ໄດ້ສ້າງຕັ້ງໂຮງຮຽນສາມັນສຶກສາຕັ້ງແຕ່ຊັ້ນອະນຸບານ ຈົນເຖິງ ມັດທະຍົມຕອນປາຍອີກລວມມີ 5 ແຫ່ງຄື: ປະຖົມ-ມັດທະຍົມສົມບູນສອງພາສາ ແສງສະຫວັນ 1, 2, 3, 4 ແລະ ໂຮງຮຽນ ນານາຊາດ ອົດສະຕາລີ (Australian International School) ທີ່ຕັ້ງຢູ່ 5 ຕົວເມືອງໃນນະຄອນຫຼວງວຽງຈັນ, ແຕ່ລະແຫ່ງກໍ່ໄດ້ມີການເຕີບໃຫຍ່ຂະຫຍາຍຕົວ ທັງປະລິມານ ແລະ ຄຸນນະພາບ ມັນສະແດງອອກເຖິງຈໍານວນນັກຮຽນມີການເພີ່ມຂຶ້ນແຕ່ລະປີ ລວມທັງນັກຮຽນ-ນັກສຶກສາທີ່ຮຽນຢູ່ໃນກຸ່ມຂອງແສງສະຫວັນມີ 4,250 ຄົນທີ່ຮຽນຢູ່, ມີຄູ-ອາຈານ, ພະນັກງານທັງໝົດ 207 ຄົນ, ລະດັບປະລິນຍາເອກ 09 ທ່ານ, ປະລິນຍາໂທ 60 ທ່ານ, ປະລິນຍາຕີ 100 ທ່ານ, ຊັ້ນສູງວິຊາຊີບ 35 ທ່ານແມ່ນພະນັກງານບໍລິຫານ, ມີສະຖານທີ່ຕັ້ງຢູ່ 06 ແຫ່ງ, ມີພື້ນຖານໂຄງລ່າງ ແລະ ອຸປະກອນຮັບໃຊ້ການຮຽນ-ການສອນຕາມ 5 ຫຼັກມູນຢ່າງຄົບຖ້ວນເຊັ່ນວ່າ: ແຕ່ລະບ່ອນມີອາຄານຫ້ອງຮຽນແໜ້ນໜາຖາວອນ, ມີເດີ່ນກິລາບານເຕະ, ບານສົ່ງ, ບານບ້ວງ, ຫ້ອງທົດລອງ, ຫໍສະໝຸດຢ່າງຄົບຖ້ວນ.

ພ້ອມກັນນີ້, ກຸ່ມການສຶກສາ ແສງສະຫວັນກໍ່ຍົກສູງວຽກງານການຮ່ວມມືກັບພາຍໃນ ແລະຕ່າງປະເທດເປັນສໍາຄັນ. ໃນໄລຍະຜ່ານມາກໍ່ໄດ້ຮ່ວມມືທາງດ້ານວິຊາການ, ການຮຽນ-ການສອນ, ການຄົ້ນຄວ້າວິໄຈ, ການບໍລິຫານຄຸ້ມຄອງ ລວມໄປເຖິງການແລກປ່ຽນນັກຮຽນ-ນັກສຶກສາ ແລະ ສົ່ງນັກຮຽນໄປຮຽນຝຶກງານ, ຮຽນງານ, ໄປຮຽນຕໍ່ລະດັບປະລິນຍາໂທ, ປະລິນຍາເອກ ກັບບັນດາມະຫາວິທະຍາໄລຢູ່ປະເທດພາກພື້ນ ແລະ ສາກົນ.




ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ