• ໂຄງການຮ່ວມປັນຮັກ Better Together ລະດົມທຶນສ້າງໂຮງຮຽນ

ໂດຍ: ສີເປື້ອນມື 31 ກໍລະກົດ 2020 (14.39 ນ.) Read : 138

ສະມາຄົມອາສາກູ້ໄພນະຄອນຫລວງວຽງຈັນ (1624) ຮ່ວມກັບ ໂຮງແຮມລາວເທວ ວຽງຈັນ, ບໍລິສັດກ້າວໜ້າລາວ ເອັນເຕີເທັນເມັນ ຈຳກັດ ແລະ ຫ້ອງເສື້ອ ຄຳເພົ້າ ສັ່ງໄດ້ ຈັດໂຄງການຮ່ວມປັນຮັກ Better Together ເພື່ອລະດົມທຶນຊ່ວຍເຫລືອສ້າງໂຮງຮຽນປະຖົມ ຢູ່ບ້ານຫ້ວຍຕັ້ງນາຍ ເມືອງກາສີ ແຂວງວຽງຈັນ ແລະ ໄດ້ຈັດພິທີຖະແຫລງຂ່າວເປີດໂຄງການ ໃນວັນທີ 29 ກໍລະກົດ 2020 ໂດຍຈຸດປະສົງຂອງໂຄງການ ກໍເພື່ອເຮັດໃຫ້ເດັກນ້ອຍຢູ່ເຂດຫ່າງໄກສອກຫລີກ ມີໂຮງຮຽນທີ່ດີໃນການຮ່ຳຮຽນ ແນໃສ່ເຮັດໃຫ້ເຂົາເຈົ້າໄດ້ຮັບການສຶກສາທີ່ດີຂຶ້ນໃນອະນາຄົດ.
      ທ່ານ ນາງ ວົງຈັນ ບົວແພງ ປະທານໂຄງການຮ່ວມປັນຮັກ Better Together ກ່າວວ່າ: ໂຄງການນີ້ຈະໄດ້ລະດົມທຶນຜ່ານງານແຟຊັນໂຊ ການກຸສົນ ເຊິ່ງຈະໄດ້ຈັດຂຶ້ນໃນລະຫວ່າງ ວັນທີ 29-30 ສິງຫາ 2020 ທີ່ໂຮງແຮມ ລາວເທວ ວຽງຈັນ ເວລາ 18:00 ໂມງ ເປັນຕົ້ນໄປ. ງານດັ່ງກ່າວ ຈະໄດ້ຂາຍບັດເຂົ້າຊົມໃນຈຳນວນທີ່ຈຳກັດ ຄືມີພຽງ 270 ບັດເທົ່ານັ້ນ ໃນລາຄາ 300.000 ກີບ ຫາ 500.000 ກີບ ໂດຍຈະເລີ່ມເປີດໃຫ້ຈອງໃນອາທິດໜ້າ ເຊິ່ງສາມາດຕິດຕໍ່ສອບຖາມຂໍ້ມູນເພີ່ມຕື່ມ (+85620 2825 9924 ຫລື +85620 2301 0143).
      ເງິນທຸກກີບທີ່ລະດົມໄດ້ຈາກງານໃນຄັ້ງນີ້, ຈະນໍາໄປເປັນທຶນໃນການສ້າງໂຮງຮຽນປະຖົມຢູ່ບ້ານຫ້ວຍຕັ້ງນາຍ, ພ້ອມຕິດຕັ້ງອຸປະກອນຮັບໃຊ້ໃນການຮຽນ ການສອນ ແລະ ສິ່ງອຳນວຍຄວາມສະດວກອື່ນໆ ເນື່ອງຈາກວ່າ ໂຮງຮຽນທີ່ມີຢູ່ໃນປັດຈຸບັນ ແມ່ນເກົ່າແກ່ຊຸດໂຊມຫລາຍ ແລະ ມີຄວາມຫຍຸ້ງຍາກຕໍ່ການຮຽນ ການສອນທີ່ສຸດ ໃນເວລາທີ່ມີຟ້າລົມຝົນຕົກ.
      ດັ່ງນັ້ນ, ຈຶ່ງຂໍເຊີນຊວນບັນດານັກທຸລະກິດ, ບັນດາບໍລິສັດ, ຫ້າງຮ້ານ, ສຳນັກງານ ອົງການຕ່າງໆ, ຜູ້ໃຈບຸນທັງຫລາຍໃນທົ່ວສັງຄົມ ຊ່ວຍກັນຄົນລະເລັກລະໜ້ອຍ ເພື່ອເປັນທຶນກ້ອນໃຫຍ່ມາສ້າງໂຮງຮຽນຫລັງດັ່ງກ່າວໃຫ້ສຳເລັດ ເພື່ອສ້າງອະນາຄົດທີ່ສົດໃສໃຫ້ເດັກນ້ອຍ ຢູ່ເຂດຫ່າງໄກສອກຫລີກ ກໍຄືເປັນການສ້າງພື້ນຖານທີ່ເຂັ້ມແຂງ ໃຫ້ແກ່ການສ້າງສາພັດທະນາປະເທດຊາດ ຂອງພວກເຮົາໃນອະນາຄົດ.




ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ