• ນອນຫຼາຍເກີນໄປ ທໍາລາຍສຸຂະພາບແທ້ບໍ?

ໂດຍ: Admin Mahason 28 ກຸມພາ 2020 (10.39 ນ.) Read : 347

ຖ້າເວົ້າເຖິງເລື່ອງການນອນ ແນ່ນອນວ່າໃຜໆກໍມັກ ໂດຍສະເພາະໃນຊ່ວງວັນພັກຜ່ອນ ຫຼາຍຄົນອາດຈະນອນຍາວຈົນບໍ່ຢາກຕື່ນ ແຕ່ຮູ້ ຫຼືບໍ່ວ່າ ການນອນອາດຈະນໍາພະຍາດຮ້າຍມາສູ່ເຮົາໄດ້ ບໍ່ວ່າຈະເປັນການນອນຫຼັບພັກຜ່ອນບໍ່ພຽງພໍ ຫຼືການນອນຫຼາຍເກີນໄປກໍຕາມ. ຕາມປົກກະຕິແລ້ວ ຄົນເຮົາຄວນນອນໃຫ້ໄດ້ຢ່າງໜ້ອຍ 8 ຊົ່ວໂມງຕໍ່ຄືນ ແຕ່ຖ້າຫາກນອນຫຼາຍກວ່ານີ້ ກໍອາດຈະເຮັດໃຫ້ພະຍາດຮ້າຍມາຫາເຮົາໄດ້ງ່າຍໆ ແລະຕໍ່ໄປນີ້ຄື ຜົນເສຍຈາກການນອນຫຼາຍເກີນໄປ.

1.  ຕຸ້ຍງ່າຍ: ຖ້າຫາກເຮົາເປັນຄົນທີ່ຕຸ້ຍຢູ່ແລ້ວ ແລະຖ້ານອນຫຼາຍ ກໍຈະເຮັດໃຫ້ເຮົາຍິ່ງຕຸ້ຍຂຶ້ນຕື່ມ ເພາະການທີ່ເຮົານອນຫຼາຍເກີນໄປ ເຮັດໃຫ້ຮ່າງກາຍບໍ່ໄດ້ຮັບການເຜົາຜານໄຂມັນເທົ່າທີ່ຄວນ ແລະຍັງເຮັດໃຫ້ລະບົບເຜົາຜານເຮັດວຽກບໍ່ໄດ້ເຕັມທີ່ ຈຶ່ງເຮັດໃຫ້ນໍ້າໜັກຕົວເຮົາເພີ່ມຂຶ້ນໄດ້ງ່າຍນັ້ນເອງ ເຖິງແມ່ນວ່າເຮົາຈະກິນອາຫານໜ້ອຍກໍຕາມ.

2. ຖືພາຍາກ: ຜູ້ຍິງທີ່ນອນຫຼາຍເກີນ 8-10 ຊົ່ວໂມງຕໍ່ຄືນ ອາດຈະສົ່ງຜົນໃຫ້ມີລູກຍາກ ເຊິ່ງຕ່າງຈາກຜູ້ຍິງທີ່ນອນມື້ລະ 7-8 ຊົ່ວໂມງ ເພາະຮໍໂມນຈະມີຄວາມສົມດຸນຫຼາຍກວ່າ ຈຶ່ງເຮັດໃຫ້ຖືພາໄດ້ງ່າຍ ແລະບໍ່ມີບັນຫາເລື່ອງການມີລູກ. ນອກຈາກນີ້, ການນອນຫຼາຍ ອາດຈະສົ່ງຜົນໃຫ້ປະຈໍາເດືອນມາບໍ່ປົກກະຕິ ແລະສໍາລັບໃຜທີ່ກໍາລັງພົບກັບບັນຫານີ້ ກໍລອງກວດເບິ່ງວ່າເປັນຍ້ອນເຮົານອນຫຼາຍເກີນໄປ ຫຼືບໍ່?

3. ພະຍາດຊຶມເສົ້າ: ການນອນຫຼາຍເກີນໄປ ຈະເຮັດໃຫ້ເຮົາເປັນພະຍາດຊຶມເສົ້າໄດ້ ເນື່ອງຈາກຮ່າງກາຍຫຼັ່ງສານເອັນໂດຼຟິນ ແລະສານຊີໂຣໂທນິນ ເຊິ່ງເປັນສານແຫ່ງຄວາມສຸກໜ້ອຍລົງ ຈຶ່ງເຮັດໃຫ້ເຮົາມີອາລົມບໍ່ປົກກະຕິ, ຫງຸດງິດງ່າຍ ແລະຮູ້ສຶກວ່າຊີວິດບໍ່ມີຄວາມສຸກ ຈົນອາດຈະເຖິງຂັ້ນຂ້າຕົວຕາຍ.

4. ສະໝອງເຮັດວຽກຊ້າ: ການນອນຫຼາຍເກີນໄປກໍບໍ່ສົ່ງຜົນດີຕໍ່ກັບສະໝອງ ໂດຍອາດຈະສົ່ງຜົນເຮັດໃຫ້ສະໝອງເຮັດວຽກຊ້າ ແລະສົ່ງຜົນຕໍ່ການໃຊ້ຊີວິດປະຈໍາວັນ ໂດຍສະເພາະຄົນທີ່ຕ້ອງເຮັດວຽກໃຊ້ສະໝອງ ຫຼືໃຊ້ຄວາມຄິດ. ດັ່ງນັ້ນ, ຄວນຫັນມານອນແບບພໍດີພໍງາມ.

5. ສ່ຽງເປັນພະຍາດເບົາຫວານ: ການນອນຫຼາຍເກີນໄປ ບວກກັບປັດໄຈຫຼາຍຢ່າງ ທີ່ສົ່ງຜົນເຮັດໃຫ້ຮ່າງກາຍຜິດປົກກະຕິ ເຮັດໃຫ້ຕັບອ່ອນເຮັດວຽກໜັກຂຶ້ນ ເນື່ອງຈາກຕັບອ່ອນເປັນຕົວສ້າງສານອິນຊູລີນ ຈຶ່ງສ່ຽງຕໍ່ການເກີດພະຍາດເບົາຫວານໄດ້ສູງກວ່າຄົນທີ່ນອນພັກຜ່ອນປົກກະຕິ. ດັ່ງນັ້ນ, ສໍາລັບໃຜທີ່ມັກນອນຫຼາຍເກີນໄປ ຄວນທີ່ຈະປັບປ່ຽນພຶດຕິກໍາຄືນໃໝ່.

ທຸກຄົນສາມາດປັບປ່ຽນພຶດຕິກໍາການນອນຂອງຕົນເອງໄດ້ ຢ່າລືມວ່າການນອນຄືປັດໄຈສໍາຄັນຫຼາຍທີ່ເຮັດໃຫ້ເຮົາມີສຸຂະພາບທີ່ດີ ແລະຫ່າງໄກຈາກພະຍາດຮ້າຍ. ດັ່ງນັ້ນ, ຄວນນອນພັກຜ່ອນໃຫ້ພຽງພໍ ແລະບໍ່ນອນຫຼາຍເກີນໄປ.




ທີ່ມາ:
  • ແທັກທີ່ກ່ຽວຂ້ອງ