• ຈີໂນ່ ໜຸ່ມນ້ອຍຜູ້ທີ່ຫຼາກຫຼາຍຄວາມສາມາດ ກັບຜົນງານເພງແຈ້ງເກີດ"ຮັກສອງເຮົາ"

ໂດຍ: ສີເປື້ອນມື 12 ກຸມພາ 2020 (14.52 ນ.) Read : 1,173

ທ້າວ ບຸນເລີມ ຈັນທະສັກ ຫຼື ຈີໂນ່ ເປັນໜຸ່ມນ້ອຍຄົນໜຶ່ງທີ່ມີຖິ່ນຖານບ້ານເກີດຢູ່ເມືອງ ນໍ້າບາກ ແຂວງ ຫຼວງພະບາງ ເຊິ່ງປັດຈຸບັນກໍາລັງຮຽນຢູ່ຊັ້ນມັດທະຍົມ ປີທີ 6. ຈີໂນ່ ມີຄວາມສາມາດຢ່າງຫຼວງຫຼາຍ ບໍ່ວ່າຈະເປັນການແຕ່ງເພງ ແລະຮ້ອງເພງ. ນອກນັ້ນ, ຍັງມີພອນສະຫວັນດ້ານການແຕ້ມຮູບພາບອີກດ້ວຍ ເຊິ່ງໄດ້ເດີນທາງແຂ່ງຂັນຢູ່ທັງພາຍໃນ ແລະຕ່າງປະເທດ ພ້ອມທັງໄດ້ຮັບລາງວັນຢ່າງຫຼວງຫຼາຍ.

ຈີໂນ່ ເປັນຄົນທີ່ມີໃຈຮັກໃນດ້ານສິລະປະ ໂດຍສະເພາະກໍແມ່ນການແຕ້ມຮູບ ແລະຮ້ອງເພງ. ດັ່ງນັ້ນ, ຈີໂນ່ ຈຶ່ງໄດ້ເຂົ້າຮ່ວມກິດຈະກໍາການແຂ່ງຂັນປະກວດນັກຮ້ອງສຽງດີຂອງເພຈ ໂຕເອງ ສະຕູດິໂອ ທີ່ໄດ້ຈັດຂຶ້ນຄັ້ງທໍາອິດ ໃນປີຜ່ານມາ ເຊິ່ງເປັນການປະກວດຮ້ອງເພງຜ່ານທາງອອນລາຍ,​ ມີຜູ້ເຂົ້າຮ່ວມແຂ່ງຂັນທັງໝົດ 100 ກວ່າຄົນ ແລະ ຈີໂນ່ ກໍໄດ້ຮັບລາງວັນຮອງຊະນະເລີດ ອັນດັບ 1 ຈາກການປະກວດດັ່ງກ່າວ. ໃນທີ່ສຸດ ຈີໂນ່ ກໍໄດ້ມີຜົນງານທໍາອິດເປັນຂອງຕົນເອງ ນັ້ນກໍຄືເພງ ຮັກສອງເຮົາ ເຊິ່ງໄດ້ປ່ອຍອອກອາກາດທາງຢູທູບຂອງ Toeng Studio ແລະວິທະຍຸທຸກຄື້ນທົ່ວປະເທດ ໃນວັນທີ 10 ກຸມພາ 2020 ຜ່ານມາ. ຜົນງານເພງດັ່ງກ່າວແມ່ນ ຈີໂນ່ ເປັນຄົນແຕ່ງເອງ ແລະຖ່າຍທອດຜ່ານອາລົມຕົນເອງໄດ້ດີທີ່ສຸດ. ຜົນງານເພງ ຮັກສອງເຮົາ ຄວບຄຸມການຜະລິດໂດຍ ໜຸ່ມ ໂຊນ່ານ ແຈັກເກັດ ເຈົ້າຂອງຊ່ອງຢູທູບ ແລະເພຈ ໂຕເອງ ສະຕູດິໂອ (Toeng Studio). ເນື້ອເພງດັ່ງກ່າວ ໄດ້ສ່ອງແສງໃຫ້ເຫັນເຖິງຄວາມຮັກລະຫວ່າງບ່າວ-ສາວທີ່ຢູ່ເຂດນອກ ຫຼືຊົນນະບົດ ເຊິ່ງໃນເມື່ອກ່ອນອາດຈະເຄີຍຢູ່ນໍາກັນຕາມທົ່ງໄຮ່ທົ່ງນາ ແລະຫາເຊົ້າກິນຄໍ່າຕາມວິຖີຊີວິດຂອງຄົນໃນຂົງເຂດຊົນນະບົດ. ເມື່ອມາຮອດມື້ທີ່ຝ່າຍຍິງໄດ້ມາຮໍ່າຮຽນສຶກສາຢູ່ເມືອງໃຫຍ່ຝ່າຍຊາຍກໍຄິດຮອດຫ່ວງຫາ ແລະຫວັງຢາກໃຫ້ຝ່າຍຍິງນໍາຄວາມຮູ້ກັບມາພັດທະນາບ້ານເກີດຕົນເອງ. ເພງດັ່ງກ່າວມີຈັງຫວະມ່ວນອອນຊອນ ແບບສະໄຕລ໌ເພງຮິບຮ໋ອບບ້ານນາ ຟັງແລ້ວຮູ້ສຶກເພີດເພີນໄປກັບສຽງເພງ.

ສຸດທ້າຍກໍຝາກຕິດຕາມຜົນງານຂອງນ້ອງ ຈີໂນ່ ໄວ້ກັບທຸກຄົນ ແລະໃນໄວໄວນີ້ຈະມີມິວສິກວີດິໂອຮູບແບບເຕັມອອກມາໃຫ້ໄດ້ຮັບຊົມກັນຢ່າງແນ່ນອນ. ສາມາດຕິດຕາມຜົນງານການເຄື່ອນໄຫວຂອງສິລະປິນໄດ້ທີ່ເພຈ ແລະຢູທູບ: Toeng Studio.




ທີ່ມາ:
  • ແທັກທີ່ກ່ຽວຂ້ອງ