• ສາຍຝົນ ແດນເມືອງຊ່ອນ ນັກຮ້ອງໃໝ່ໃນສັງກັດໂຕເອງ

ໂດຍ: ສີເປື້ອນມື 06 ກຸມພາ 2020 (15.20 ນ.) Read : 350

ໜຸ່ມ ສາຍຝົນ ແດນເມືອງຊ່ອນ ເປັນສິລະປິນນ້ອງໃໝ່ໃນສັງກັດ ໂຕເອງ ສະຕູດິໂອ (Toeng Studio) ໄດ້ປ່ອຍຜົນງານເພງໃໝ່ ເປັນການແຈ້ງເກີດໃນວົງການບັນເທີງ ນັ້ນກໍຄື ຜົນງານເພງ ຄິດວ່າເຂົາຮັກແທ້ ແລະປັດຈຸບັນ ກໍໄດ້ປ່ອຍໃຫ້ໄດ້ຮັບຟັງກັນໄປເປັນທີ່ຮຽບຮ້ອຍທາງຊ່ອງຢູທູບຂອງ Toeng Studio ແລະວິທະຍຸທຸກຄື້ນທົ່ວປະເທດ.

ສາຍຝົນ ແດນເມືອງຊ່ອນ ເປັນຄົນຖິ່ນຖານກໍາເນີດຈາກເມືອງ ຊ່ອນ ແຂວງ ຫົວພັນ ເຊິ່ງເປັນໜຶ່ງໃນຜູ້ທີ່ມີໃຈມັກຮັກໃນດ້ານການຮ້ອງເພງ ແລະຫຼິ້ນດົນຕຣີ. ຜູ້ກ່ຽວຈຶ່ງໄດ້ສະໝັກເຂົ້າຮ່ວມກິດຈະກໍາການແຂ່ງຂັນປະກວດນັກຮ້ອງສຽງດີທາງອອນລາຍ ຄັ້ງທີ 1 ທີ່ທາງຄ້າຍເພງ ໂຕເອງ ສະຕູດິໂອ “Toeng Studio” ຈັດຂຶ້ນ ເຊິ່ງຜູ້ກ່ຽວກໍສາມາດຍາດໄດ້ລາງວັນຊະນະເລີດມາຄອບຄອງ ແລະໄດ້ເປັນນັກຮ້ອງນ້ອງໃໝ່ໃນສັງກັດ ພ້ອມດ້ວຍເປີດໂຕຜົນງານເພງທໍາອິດໃນຊີວິດ ຄິດວ່າເຂົາຮັກແທ້ ເພງດັ່ງກ່າວແມ່ນ ໜຸ່ມ ໂຊນ່ານ ແຈັກເກັດ ເຈົ້າຂອງຄ້າຍເພງ ໂຕເອງສະຕູດິໂອ ເປັນຜູ້ປະພັນໃຫ້. ເປັນແນວເພງລູກທົ່ງອິນດີ້,​ ຈັງຫວະຊ້າໆຊື້ງກິນໃຈ ແລະມີເນື້ອຫາອົກຫັກ ຍ້ອນຄິດວ່າເຂົາຮັກແທ້ ແຕ່ໃນຄວາມຈິງຄືເຂົາອີຕົນເຮົາເທົ່ານັ້ນ. ໃນໄວໄວນີ້ຈະໄດ້ຮັບຊົມມິວສິກວີດິໂອ ຫຼືການສະແດງລະຄອນປະກອບເພງໃຫ້ອອກມາໄດ້ຮັບຊົມກັນ.​

ສຸດທ້າຍນີ້ກໍຂອງຝາກຕິດຕາມຜົນງານຂອງນັກຮ້ອງນ້ອງໃໝ່ ສາຍຝົນ ແດນເມືອງຊ່ອນ ແນ່ເດີ ເພາະອາດຈະມີຜົນງານເພງໃໝ່ອອກມາໃຫ້ໄດ້ຮັບຊົມ ແລະຮັບຟັງເລື້ອຍໆ. ສາມາດຕິດຕາມການເຄື່ອນໄຫວຂອງສິລະປິນໄດ້ທາງເຟສບຸກສ່ວນຕົວ: ສາຍຝົນ ແດນເມືອງຊ່ອນ, ເພຈເຟສບຸກ Toeng Studio ແລະຢູທູບຂອງ Toeng Studio.




ທີ່ມາ:
  • ແທັກທີ່ກ່ຽວຂ້ອງ