• 5 ພຶດຕິກໍາການອາບນໍ້າແບບຜິດໆ

ໂດຍ: Admin Mahason 30 ມັງກອນ 2020 (10.44 ນ.) Read : 502

     ເຖິງແມ່ນວ່າການອາບນໍ້າຈະເປັນການຊໍາລະລ້າງຮ່າງກາຍ ແລະກໍາຈັດສິ່ງເປິເປື້ອນອອກຈາກຜິວໄດ້ເປັນຢ່າງດີ ແຕ່ຮູ້ ຫຼືບໍ່ຖ້າເຮົາອາບນໍ້າແບບຜິດວິທີຈະເຮັດໃຫ້ເປັນການທໍາຮ້າຍຜິວໄດ້ຢ່າງງ່າຍດາຍ. ໃນສະບັບນີ້ ເຮົາມີ 5 ພຶດຕິກໍາ ທີ່ສ່ວນຫຼາຍມັກເຮັດແລ້ວບໍ່ຮູ້ວ່າມັນເປັນການອາບນໍ້າທີ່ຜິດ ແລະທໍາຮ້າຍຜິວຂອງເຮົາຢ່າງຮ້າຍແຮງ ລອງມາອ່ານເບິ່ງນໍາກັນວ່າມີຫຍັງແດ່?
1. ຍິ່ງມີຟອງຫຼາຍ ຍິ່ງທໍາຮ້າຍຜິວ: ຄົນສ່ວນຫຼາຍມັກຈະໃຊ້ຜະລິດຕະພັນຄຼີມອາບນໍ້າທີ່ມີຟອງຫຼາຍ ຍ້ອນຄິດວ່າ ຍິ່ງຟອງຫຼາຍຍິ່ງສະອາດ ແຕ່ໃນຄວາມເປັນຈິງແລ້ວຍິ່ງມີຟອງຫຼາຍ ຍິ່ງມີສານເຄມີສູງ ແລະສານເຄມີເຫຼົ່ານັ້ນ ຍັງເຂົ້າໄປທໍາລາຍສົມດຸນຂອງນໍ້າຫຼໍ່ລ້ຽງຜິວ ພ້ອມທັງນໍາເອົາຄວາມຊຸ່ມຊື່ນອອກໄປຈາກຜິວຈົນໝົດ ຈຶ່ງເຮັດໃຫ້ຜິວແຫ້ງ ແລະຫຍາບໃນທີ່ສຸດ. ດັ່ງນັ້ນ, ບໍ່ຄວນເລືອກໃຊ້ຄຼີມອາບນໍ້າທີ່ມີຟອງຫຼາຍເກີນໄປ ເພາະມັນຈະເຮັດໃຫ້ເຮົາຮູ້ສຶກວ່າຜິວແຫ້ງທັນທີຫຼັງຈາກໃຊ້ ຄວນເລືອກເປັນຜະລິດຕະພັນທີ່ຍັງຄົງໃຫ້ຄວາມຊຸ່ມຊື່ນ ແລະບໍ່ເຮັດໃຫ້ຜິວແຫ້ງ.
2. ອາບນໍ້າອຸ່ນ: ສໍາລັບຄົນທີ່ມັກອາບນໍ້າອຸ່ນ ຍ້ອນມັນໃຫ້ຄວາມຮູ້ສຶກທີ່ເບົາສະບາຍ ເຊິ່ງມັນເປັນຄວາມຄິດທີ່ຜິດ ເພາະນໍ້າອຸ່ນຈະເປັນຕົວດູດເອົາຄວາມຊຸ່ມຊື່ນອອກຈາກຜິວ ແລະເຮັດໃຫ້ຜິວແຫ້ງ. ດັ່ງນັ້ນ, ທາງທີ່ດີຄວນທີ່ຈະອາບນໍ້າທີ່ຢູ່ໃນອຸນຫະພູມປົກກະຕິ.
3. ແຊ່ນໍ້າເປັນເວລາດົນ: ສໍາລັບຄົນທີ່ມັກແຊ່ນໍ້າດົນໆ ບໍ່ວ່າຈະເປັນການແຊ່ຢູ່ໃນອ່າງອາບນໍ້າ ຫຼືຢືນແຊ່ໃນຝັກບົວ ຄວນຢຸດເຊົາພຶດຕິກໍາດັ່ງກ່າວ ເພາະການແຊ່ນໍ້າດົນເກີນໄປ ຈະເຮັດໃຫ້ຜິວແຫ້ງ ແລະສົມດຸນຂອງຜິວຫຼຸດລົງ. ດັ່ງນັ້ນ, ເຮົາຄວນອາບນໍ້າ ຫຼືແຊ່ໃນອ່າງພຽງ 7 ນາທີຕໍ່ຄັ້ງກໍພຽງພໍແລ້ວ.
4. ເຊັດຜິວແຮງ: ສໍາລັບຜູ້ທີ່ມັກໃຊ້ຜ້າແພເຊັດຕົວເຊັດຕົວແຮງໆ ຫຼືຖູຜິວໃຫ້ແຫ້ງໄວຂຶ້ນ ຖືວ່າເປັນວິທີທີ່ຜິດ ເພາະມັນຈະເຮັດໃຫ້ຜິວເກີດອາການອັກເສບຈາກການເຊັດຖູ ແລະຜ້າແພຍັງດູດຊຶມເອົານໍ້າຫຼໍ່ລ້ຽງໃນຜິວອອກໄປດ້ວຍ ຈຶ່ງເຮັດໃຫ້ຜິວແຫ້ງ ແລະບໍ່ມີຄວາມຊຸ່ມຊື່ນ. ດັ່ງນັ້ນ, ຄວນໃຊ້ຜ້າແພເຊັດຕົວເຊັດເບົາໆ ແລະທາຄຼີມບໍາລຸງເພື່ອຮັກສາຄວາມຊຸ່ມຂອງຜິວໃຫ້ຄົງໄວ້.
5. ບໍ່ເຄີຍປ່ຽນຟອງນໍ້າ: ຟອງນໍ້າຖູຕົວ ບໍ່ວ່າຈະເປັນຮູບແບບໃດກໍຕາມ ຈະມີອາຍຸການນໍາໃຊ້ພຽງແຕ່ 1 ເດືອນເທົ່ານັ້ນ, ເມື່ອໃຊ້ຄົບ 1 ເດືອນ ແລ້ວ ຄວນປ່ຽນໃໝ່ທັນທີ ເພາະຖ້າດົນກວ່ານີ້ ຟອງນໍ້າຈະສະສົມເຊື້ອພະຍາດທີ່ອາດຈະທໍາຮ້າຍຜິວຂອງເຮົາໄດ້ຫຼາຍກວ່າທີ່ຄິດ.




ທີ່ມາ:
  • ແທັກທີ່ກ່ຽວຂ້ອງ