• ເຄັດລັບງ່າຍໆ ປ່ຽນຜົມນຸ້ມງາມຄືເສັ້ນໄໝ

ໂດຍ: Admin Mahason 20 ມັງກອນ 2020 (14.20 ນ.) Read : 183

    ຫຼາຍຄົນອາດຈະເຄີຍເບິ່ງໂຄສະນາໃນໂທລະພາບ ແລະຢາກຈະມີຜົມນຸ້ມງາມສຸຂະພາບຄືນາງແບບໂຄສະນາເຫຼົ່ານັ້ນ ຈຶ່ງເຮັດໃຫ້ຫຼາຍຄົນເລືອກຊື້ຜະລິດຕະພັນບໍາລຸງຜົມຫຼາກຫຼາຍຍີ່ຫໍ້ມາໃຊ້ ເພື່ອຫວັງຢາກໃຫ້ຜົມຂອງຕົນເອງງາມຄືກັນກັບໂຄສະນາ ແຕ່ຜົນລັບທີ່ໄດ້ກໍບໍ່ເປັນຕາມຄາດຫວັງ. ໃນສະບັບນີ້ ເຮົາຈຶ່ງນໍາເອົາເຄັດລັບງ່າຍໆ ໂດຍບໍ່ຈໍາເປັນຈະຕ້ອງໄປເພິ່ງຄຼີມບໍາລຸງຜົມລາຄາແພງ ເພາະສິ່ງທີ່ເຮົາຄວນເຮັດນັ້ນ ຄື: ການຮູ້ຈັກເບິ່ງແຍງເສັ້ນຜົມໃຫ້ຖືກວິທີ ກໍເປັນຈຸດເລີ່ມຕົ້ນທີ່ດີສູ່ຜົມນຸ້ມງາມຄືກັບເສັ້ນໄໝໄດ້ບໍ່ຍາກ.
1. ບໍ່ສະຜົມຫຼາຍເກີນໄປ: ການສະຜົມຫຼາຍຄັ້ງ ຫຼືສະຜົມທຸກມື້ ຈະເຮັດໃຫ້ເສັ້ນຜົມເສຍຄວາມຊຸ່ມຊື່ນ, ອາດຈະເຮັດໃຫ້ຜົມແຫ້ງ ແລະຟູຕາມມາ. ດັ່ງນັ້ນ, ຈຶ່ງຄວນຫຼີກເວັ້ນການສະຜົມທຸກມື້ ຄວນເວັ້ນວັນສະຜົມ ທຸກໆ 2-3 ມື້ກໍພຽງພໍແລ້ວ.
2. ເສີມຄວາມເງົາງາມຂອງເສັ້ນຜົມດ້ວຍນໍ້າເຢັນ: ຫຼັງຈາກທີ່ສະຜົມແລ້ວ ຄວນໃຊ້ນໍ້າເຢັນລ້າງເສັ້ນຜົມ ແລະໜັງຫົວໃຫ້ທົ່ວແບບຄ່ອຍໆ ເຊິ່ງນໍ້າເຢັນຈະຊ່ວຍກະຕຸ້ນໃຫ້ຮູຂຸມຂົນຕື່ນຕົວ ເພາະຮ່າງກາຍພະຍາຍາມເພີ່ມເລື່ອດໄປຫຼໍ່ລ້ຽງຫົວເພື່ອຫຼຸດອຸນຫະພູມ ເປັນວິທີທີ່ເຮັດໃຫ້ຮ່າງກາຍກະຕຸ້ນໃຫ້ເລືອດໝູນວຽນໄດ້ຫຼາຍຂຶ້ນ ພຽງເທົ່ານີ້ເສັ້ນຜົມຂອງເຮົາກໍຈະເງົາງາມດົກດໍາ ເພາະມັນໄດ້ຮັບອົກຊີແຊນທີ່ພຽງພໍນັ້ນເອງ.
3. ເຊັດຜົມໃຫ້ແຫ້ງດ້ວຍຜ້າໄມໂຄຼໄຟເບີ: ຜ້າແພຂົນໜູທໍາມະດາອາດຈະເຮັດໃຫ້ຜົມເສຍ ເພາະມັນມີຄວາມຫຍາບ ສົ່ງຜົນເຮັດໃຫ້ເກັດຜົມທີ່ບາງນັ້ນຖືກທໍາລາຍໄດ້ງ່າຍເມື່ອຖືກເຊັດແຮງໆ. ດັ່ງນັ້ນ, ຫຼັງຈາກທີ່ເຮົາສະຜົມແລ້ວໃຫ້ເຊັດດ້ວຍຜ້າໄມໂຄຼໄຟເບີ ເພາະມັນຈະສາມາດດູດຊຶມນໍ້າໄດ້ດີ ພຽງແຕ່ພັນຜ້າເອົາໄວ້ເທິງຫົວ ກໍສາມາດຫຼຸດຄວາມສ່ຽງບັນຫາເສັ້ນຜົມຂາດຫຼຸົ່ນໄດ້.
4. ໃຊ້ຫວີຫ່າງຫວີຜົມຕອນປຽກ: ຖ້າຫາກບໍ່ສາມາດປະໃຫ້ຜົມແຫ້ງກ່ອນຫວີໄດ້ ໃຫ້ໃຊ້ຫວີແຂ້ວຫ່າງຫວີຜົມຕອນທີ່ຜົມປຽກແບບເບົາໆ ແລະຫ້າມໃຊ້ຫວີຖີ່ຢ່າງເດັດຂາດ ເພາະຈະເຮັດໃຫ້ເສັ້ນຜົມຂາດຫຼົ່ນ ແລະຍັງເປັນການທໍາລາຍເກັດຜົມນໍາອີກ ເຊິ່ງອາດຈະເຮັດໃຫ້ເສັ້ນຜົມຖືກທໍາລາຍເສຍຫາຍຢ່າງໜັກໃນໄລຍະຍາວ.
5. ຫຼີກລ່ຽງການໃຊ້ຄວາມຮ້ອນໃນການຈັດແຕ່ງຊົງຜົມ: ຄວາມຮ້ອນເປັນຕົວການທີ່ເຮັດໃຫ້ເສັ້ນຜົມຖືກທໍາລາຍ ແລະແຫ້ງຟູ. ດັ່ງນັ້ນ, ເຮົາຄວນຫຼີກລ່ຽງການໃຊ້ຄວາມຮ້ອນກັບເສັ້ນຜົມໃຫ້ໄດ້ຫຼາຍທີ່ສຸດ. ເນື່ອງຈາກການໃຊ້ຄວາມຮ້ອນພຽງຄັ້ງດຽວ ມັນຈະທໍາລາຍຄວາມຊຸ່ມຊື່ນທີ່ສະສົມຢູ່ໃນເສັ້ນຜົມຢ່າງຫຼວງຫຼາຍ. ສະນັ້ນ, ເຮົາຄວນເປົ່າຜົມດ້ວຍລົມເຢັນ ແລະຖ້າຫາກຈໍາເປັນທີ່ຈະຕ້ອງໃຊ້ອຸປະກອນຈັດແຕ່ງຊົງຜົມທີ່ໃຊ້ຄວາມຮ້ອນ ຄວນທາຄຼີມບໍາລຸງຜົມເພື່ອປົກປ້ອງເສັ້ນຜົມທຸກຄັ້ງ.
     ສາວຄົນໃດ ຢາກມີຜົມນຸ້ມເງົາງາມບໍ່ຍາກຢ່າງທີ່ຄິດ ພຽງແຕ່ນໍາໃຊ້ວິທີທີ່ແນະນໍາຂ້າງເທິງນັ້ນ ແລະເຮັດຢ່າງມີລະບຽບ ກໍຈະເຮັດໃຫ້ເຮົາມີຜົມງາມ, ຈັດແຕ່ງຊົງຜົມໄດ້ຢ່າງໝັ້ນໃຈ ແລະທີ່ສໍາຄັນຖ້າເຮົາມີຜົມທີ່ເງົາງາມມັນຈະເພີ່ມສະເໜ່ໃຫ້ບຸກຄະລິກໃນຕົວເຮົາອີກດ້ວຍ.




ທີ່ມາ:
  • ແທັກທີ່ກ່ຽວຂ້ອງ