• ຕາດກວາງຊີ ຕິດ 1 ໃນ 50 ອັນດັບ ສະຖານທີ່ທ່ອງທ່ຽວທີ່ດີທີ່ສຸດ

ໂດຍ: Admin Mahason 03 ມັງກອນ 2020 (09.01 ນ.) Read : 272

     ນໍ້າຕົກຕາດກວາງຊີ ເປັນໜຶ່ງສະຖານທີ່ທ່ອງທ່ຽວທີ່ມີຊື່ສຽງທີ່ສຸດໃນແຂວງ ຫຼວງພະບາງ ແລະໃນປະເທດລາວ ເຊິ່ງເມື່ອບໍ່ດົນມານີ້ໄດ້ມີການຈັດອັນດັບໃຫ້ ນໍ້າຕົກຕາດກວາງຊີ ຕິດ 1 ໃນ 50 ອັນດັບນໍ້າຕົກຕາດທີ່ດີທີ່ສຸດສໍາລັບນັກທ່ອງທ່ຽວຍີ່ປຸ່ນ ໃນປີ 2019.
     ນໍ້າຕົກຕາກກວາງຊີ ໄດ້ຖືກຈັດໃຫ້ຢູ່ໃນອັນດັບທີ 26 ຈາກທັງໝົດ 50 ອັນດັບຂອງສະຖານທີ່ທ່ອງທ່ຽວຍອດນິຍົມສໍາລັບນັກທ່ອງທ່ຽວຍີ່ປຸ່ນ ປີ 2019 ເຊິ່ງເປັນການຮວບຮວມໂດຍ “Trip Advisor Japan” ນີ້ເປັນຄັ້ງທໍາອິດທີ່ສະຖານທີ່ທ່ອງທ່ຽວໃນປະເທດລາວ ມີລາຍຊື່ຢູ່ໃນການຈັດອັນດັບດັ່ງກ່າວ.
     Trip Advisor Japan ຂອງປະເທດຍີ່ປຸ່ນ ໄດ້ເຮັດການສໍາຫຼວດ ໂດຍອີງໃສ່ການລົງຄໍາເຫັນ ແລະຄໍາຕິຊົມຈາກຜູ້ເຂົ້າໃຊ້ໃນເວັບໄຊຂອງບໍລິສັດ ເຊິ່ງບັນຊີລາຍຊື່ດັ່ງກ່າວລວມມີ ນໍ້າຕົກຕາກກວາງຊີ ຂອງປະເທດລາວເຮົາ, ອັງກໍວັດ ຢູ່ປະເທດ ກໍາປູເຈຍ, ວິຫານເຊນປີເຕີ ບາຊິລິກາ (St. Peter’s Basilica) ໃນປະເທດ ວາຕິກັນ ແລະ La Sagrada Familia ໃນປະເທດ ແອັດສະປາຍ.
     ໃນເດືອນ ຕຸລາ 2019 ຜ່ານມາ ທາງເວັບໄຊຂອງ Booking.com ຂອງປະເທດຍີ່ປຸ່ນ ໄດ້ລົງຊື່ໃຫ້ນະຄອນຫຼວງວຽງຈັນ ເປັນເມືອງທີ່ດີທີ່ສຸດສໍາລັບການຍ່າງທ່ອງທ່ຽວໃນອາຊີຕາເວັນອອກສຽງໃຕ້ ເຊິ່ງນັກທ່ອງທ່ຽວສາມາດຍ່າງຊົມຕົວເມືອງໄດ້ທັງກາງເວັນ ແລະກາງຄືນ.
     ນອກນັ້ນ, ເວັບໄຊດັ່ງກ່າວຍັງກ່າວຕື່ມອີກວ່າ: ນັກທ່ອງທ່ຽວສາມາດຍ່າງຕາມຖະໜົນຕ່າງໆ ພ້ອມຊົມຕຶກອາຄານຂ້າງຖະໜົນທີ່ເປັນບ່ອນອານານິຄົມຂອງຝຣັ່ງ, ຢ້ຽມຊົມບູຮານສະຖານທາງປະຫວັດສາດ ພ້ອມດຽວກັນນີ້ ຍັງມີປະຕູໄຊ, ພຣະທາດຫຼວງວຽງຈັນ ແລະເມື່ອຕາເວັນຕົກດິນກໍສາມາດຍ່າງທ່ຽຊົມຕະຫຼາດກາງຄືນບໍລິເວນແຄມແມ່ນໍ້າຂອງ ສວນສາທາລະນະເຈົ້າອານຸວົງ ເຊິ່ງນັກທ່ອງທ່ຽວສາມາດທ່ອງທ່ຽວຊື່ເຄື່ອງນຸ່ງ, ເຄື່ອງໃຊ້ ແລະອາຫານແຄມທາງໃນລາຄາຖືກຫຼາກຫຼາຍຢ່າງ.



ທີ່ມາ: Laotiantimes.com
  • ແທັກທີ່ກ່ຽວຂ້ອງ