• 5 ວິທີແກ້ອາການແພ້ລິບສະຕິກແບບໄດ້ຜົນດີ

ໂດຍ: Admin Mahason 31 ທັນວາ 2019 (11.17 ນ.) Read : 200

     ລິບສະຕິກເປັນເຄື່ອງສໍາອາງຄູ່ກັບສາວໆທັງຫຼາຍ ເປັນສິ່ງທີ່ສາວຫຼາຍຄົນຂາດບໍ່ໄດ້ ແລະຕ້ອງມີຕິດກະເປົ໋າຕະຫຼອດເວລາ ເພາະລິບສະຕິກເປັນຕົວເພີ່ມສະເໜ່ ແລະຄວາມໝັ້ນໃຈໃຫ້ກັບສາວໆໄດ້ເປັນຢ່າງດີ. ແຕ່ສໍາລັບບາງຄົນອາດຈະມີອາການແພ້ລິບສະຕິກ ເຊິ່ງອາດຈະເຮັດໃຫ້ຂາດຄວາມໝັ້ນໃຈຫຼາຍສົມຄວນ. ເຖິງຢ່າງໃດກໍຕາມ, ເຮົາມີວິທີແກ້ໄຂບັນຫາດັ່ງກ່າວ ເພື່ອເປັນຊ່ອງທາງໃນການແກ້ໄຂບັນຫາແພ້ລິບສະຕິກ.
1. ຫ້າມດຶງ, ແກະ ຫຼືຫຼອກຮີມສົບ: ສໍາລັບໃຜທີ່ມີອາການແພ້ລິບສະຕິກ ຈົນເຮັດໃຫ້ຮີມສົບແຫ້ງ ແລະບໍ່ຊຸ່ມຊື່ນ ສົ່ງຜົນເຮັດໃຫ້ຜິວໜັງບໍລິເວນດັ່ງກ່າວຫຼຸດຫຼອກອອກ ແຕ່ຕ້ອງລະວັງຢ່າງໄປແກະ ຫຼືຫຼອກມັນອອກຢ່າງເດັດຂາດ ເພາະມັນຈະເຮັດໃຫ້ອາການອັກເສບນັ້ນຮ້າຍແຮງກວ່າເກົ່າ ແລະຍັງສ່ຽງຕໍ່ການຕິດເຊື້ອອີກດ້ວຍ. ທາງທີ່ດີຄວນເບິ່ງແຍງຮັກສາຮີມສົບຂອງເຮົາໃຫ້ຊຸ່ມຊື່ນຢູ່ຕະຫຼອດເວລາ ແລະບໍ່ຕ້ອງເອົາມືໄປໃກ້ຮີມສົບເລີຍຍິ່ງເປັນການດີ.
2. ທາລິບສະຕິກມັນ: ຄຸນປະໂຫຍດຂອງລິບສະຕິກມັນຈະຊ່ວຍບໍາລຸງຮີມສົບ, ເຮັດໃຫ້ຮີມສົບຊຸ່ມຊື່ນ, ປ້ອງກັນຮີມສົບແຫ້ງແຕກ ແລະຊ່ວຍແກ້ບັນຫາການແພ້ລິບສະຕິກໄດ້ເປັນຢ່າງດີ. ແນະນໍາໃຫ້ທາລິບສະຕິກມັນເປັນປະຈໍາ ມື້ລະ 2 ເທື່ອ (ເຊົ້າ-ແລງ) ແລ້ວມັນຈະຊ່ວຍເຮັດໃຫ້ຮີມສົບຂອງເຮົາກັບມາງາມຄືເກົ່າຢ່າງແນ່ນອນ.
3. ດື່ມນໍ້າ ແລະກິນອາຫານທີ່ມີປະໂຫຍດ: ການດື່ມນໍ້າໃຫ້ພຽງພໍຈະຊ່ວຍຮັກສາຄວາມຊຸ່ມຊື່ນໃຫ້ແກ່ຮີມສົບ ແລະຊ່ວຍຂັບສານພິດທີ່ໄດ້ຮັບຈາກລິບສະຕິກອອກຈາກຮ່າງກາຍ. ນອກຈາກນີ້້, ການກິນອາຫານທີ່ມີປະໂຫຍດຍັງຈະຊ່ວຍຟື້ນຟູຮີມສົບທີ່ມີບັນຫາໄດ້ ເຊັ່ນ: ກິນໝາກໄມ້ຕະກູນເບີລີ່ ເຊິ່ງຈະປະກອບດ້ວຍສານຕ້ານອະນຸມູນອິດສະຫຼະຊ່ວຍປົກປ້ອງຜິວ ແລະເຮັດໃຫ້ຮີມສົບຊຸ່ມຊື່ນຂຶ້ນ. ສ່ວນການດື່ມນໍ້າກາລົດ (ແຄຣັອດ) ທີ່ມີເບຕ້າແຄໂລທີນສູງ ຈະຊ່ວຍເຮັດໃຫ້ຮີມສົບນຸ້ມຊຸ່ມຊື່ນໄດ້ເຊັ່ນກັນ.
4. ເລືອກໃຊ້ສີອ່ອນໆ: ການເລືອກໃຊ້ລິບສະຕິກໃນຄັ້ງຕໍ່ໄປ ແນະນໍາວ່າຄວນເລືອກໃຊ້ລິບສະຕິກສີອ່ອນໆ ເພາະລິບສະຕິກສີສົດໃສ ໂດຍສະເພາະແມ່ນ ສີແດງ ມັກຈະເຮັດໃຫ້ຜູ້ໃຊ້ເກີດອາການແພ້ໄດ້ຫຼາຍກວ່າໝູ່ ເຊິ່ງການເລືອກໃຊ້ລິບສະຕິກສີອ່ອນ ຈະຊ່ວຍໃຫ້ສ່ຽງຕໍ່ການແພ້ໜ້ອຍລົງ. ນອກນັ້ນ, ຄວນຫຼີກລ່ຽງການໃຊ້ລິບສະຕິກທີ່ປະສົມນໍ້າຫອມ ແລະສານກັນທີ່ເປັນອັນຕະລາຍ ເພາະສານເຫຼົ່ານັ້ນຈະເຮັດໃຫ້ຜູ້ໃຊ້ມີໂອກາດແພ້ລິບສະຕິກຫຼາຍຂຶ້ນ.
5. ປຶກສາແພດໝໍ: ອາການແພ້ທີ່ເກີດຂຶ້ນ ອາດຈະຕ້ອງໃຊ້ຢາຊ່ວຍຮັກສາ ຖ້າພົບວ່າມີອາການຮ້າຍແຮງ ຈໍາຕ້ອງໄດ້ໄປພົບແພດໝໍໂດຍດ່ວນ ເພື່ອຈະໄດ້ຮັກສາຢ່າງຖືກວິທີ ເຊິ່ງທ່ານໝໍອາດຈະໃຫ້ຢາແກ້ອັກເສບ, ຢາແກ້ແພ້ຄໍເຟນິຣາມີນ ສໍາລັບທາຮີມສົບທາງນອກ ທັງນີ້ກໍຕ້ອງເຮັດຕາມຄໍາສັ່ງຂອງທ່ານໝໍຢ່າງເຂັ້ມງວດ ເພື່ອໃຫ້ອາການແພ້ດີໄວທີ່ສຸດ.
     ການຮັກສາຮີມສົບຈາກການແພ້ລິບສະຕິກນັ້ນ ຄວນເນັ້ນເລື່ອງຄວາມສະອາດ, ການເບິ່ງແຍງຮີມສົບຢ່າງທະນຸຖະໜອມ ແລະຄວນເລືອກໃຊ້ລິບສະຕິກທີ່ມີຄຸນນະພາບໄດ້ມາດຕະຖານ ແລະເໝາະກັບສະພາບຜິວຂອງເຮົາ ເພື່ອປ້ອງກັນບໍ່ໃຫ້ເກີດອາການແພ້ອີກ. 




ທີ່ມາ:
  • ແທັກທີ່ກ່ຽວຂ້ອງ