• ເຫື່ອອອກຫຼາຍ ແລະມີກິ່ນຕົວ ເຮັດແນວໃດດີ?

ໂດຍ: Admin Mahason 31 ທັນວາ 2019 (09.07 ນ.) Read : 338

     ເມື່ອພົບກັບອາກາດຮ້ອນ ຫຼືຫຼັງຈາກທີ່ອອກກໍາລັງກາຍແລ້ວ ເຮົາຈະຕ້ອງພົບກັບເຫື່ອ ເຊິ່ງແຕ່ລະຄົນຈະມີເຫື່ອຫຼາຍ ແລະໜ້ອຍແຕກຕ່າງກັນ ເພາະມັນຂຶ້ນກັບສະພາບຮ່າງກາຍຂອງແຕ່ລະຄົນ ແລະກິດຈະກໍາທີ່ເຮັດໃນແຕ່ລະມື້. ສໍາລັບຄົນທີ່ມີເຫື່ອຫຼາຍຈົນເຮັດໃຫ້ມີກິ່ນຕົວ ແລະຮູ້ສຶກອຶດອັດຂາດຄວາມໝັ້ນໃຈ ໃນສະບັບນີ້ເຮົາຈະນໍາເອົາເຄັດລັບຫຼຸດເຫື່ອມາແນະນໍາໃຫ້ທຸກຄົນໄດ້ຮູ້ ແຕ່ກ່ອນອື່ນໝົດເຮົາຕ້ອງໄປທໍາຄວາມເຂົ້າໃຈກ່ຽວກັບເຫື່ອເສຍກ່ອນ.
     ເຫື່ອ ເປັນສິ່ງເສດເຫຼືອຂອງຮ່າງກາຍທີ່ຖືກຂັບອອກມາຜ່ານຜິວໜັງໃນຮູບແບບຂອງແຫຼວ, ເຫື່ອຈະມີລົດຊາດເຄັມ ເນື່ອງຈາກມີສ່ວນປະກອບຂອງເກືອ ແລະເຫື່ອຈະມີນໍ້າ 99% ແລະອີກ 1% ແມ່ນສານອື່ນໆ. ເກີດຈະເກີດຂຶ້ນ ເມື່ອຮ່າງກາຍຂອງເຮົາໄດ້ສໍາຜັດກັບຄວາມຮ້ອນ ຫຼືການກະຕຸ້ນມີເຫື່ອອອກມາ ໂດຍປະລິມານເຫື່ອຂອງຄົນເຮົາຈະຂຶ້ນຢູ່ກັບສະພາບອາກາດ ແລະຄວາມຊຸ່ມໃນອາກາດ ໃນກໍລະນີ ມີຄວາມຊຸ່ມໃນອາກາດສູງຈະເຮັດໃຫ້ເຫື່ອອອກຫຼາຍເປັນພິເສດ. ນອກຈາກເລື່ອງສະພາບອາກາດແລ້ວ ຍັງມີເລື່ອງຂອງກິດຈະກໍາທີ່ເຮົາເຮັດໃນແຕ່ລະມື້ ເພາະຖ້າເຮົາອອກແຮງຫຼາຍ ເຫື່ອກໍຈະອອກມາຫຼາຍເຊັ່ນກັນ ລວມເຖິງຄົນທີ່ເປັນພະຍາດບາງຊະນິດກໍອາດຈະມີເຫື່ອອອກມາຫຼາຍກວ່າປົກກະຕິເຊັ່ນກັນ.
#ວິທີການຫຼຸດເຫື່ອ ແລະມີກິ່ນຕົວແຮງ
1. ບໍ່ໃຫ້ໃສ່ເຄື່ອງນຸ່ງທີ່ຄັບເກີນໄປ ຄວນນຸ່ງເຄື່ອງຫຼວມໆຈະເຮັດໃຫ້ອາກາດຖ່າຍເທໄດ້ດີຂຶ້ນ ແລະເລືອກນຸ່ງຜ້າຝ້າຍ ຫຼືຜ້າທີ່ມີຄວາມເບົາບາງ ຈະເຮັດໃຫ້ດູດຊຶມເຫື່ອໄດ້ດີ, ບໍ່ຮູ້ສຶກອຶດອັດ ແລະອົບເອົ້າ. ນອກນັ້ນ, ໃຫ້ເລືອກນຸ່ງເສື້ອສີອ່ອນ ເພາະຖ້ານຸ່ງສີເຂັ້ມເກີນໄປຈະເຮັດໃຫ້ມັນດູດຊຶມຄວາມຮ້ອນໄດ້ສູງ ຍິ່ງຈະເຮັດໃຫ້ເຫື່ອເຮົາອອກຫຼາຍ.
2. ໃຊ້ຜະລິດຕະພັນດັບກິ່ນຕົວ ເຊິ່ງມັນຈະຊ່ວຍຫຼຸດການເກີດເຫື່ອ ແລະຫຼຸດກິ່ນຕົວລົງໄດ້ ແຕ່ຕ້ອງສັງເກດເບິ່ງສ່ວນປະກອບນໍາວ່າມີຫຍັງແດ່ ເມື່ອເອົາມາໃຊ້ແລ້ວໃຫ້ມັນໄດ້ຜົນດີທີ່ສຸດ.
3. ດື່ມນໍ້າຫຼາຍໆ ເພາະການດື່ມນໍ້າຈະຊ່ວຍຫຼຸດອຸນຫະພູມໃນຮ່າງກາຍ ເຮັດໃຫ້ເຫື່ອອອກໜ້ອຍລົງ ແລະຊ່ວຍຄາຍຄວາມຮ້ອນໄດ້ເປັນຢ່າງດີ ທີ່ສໍາຄັນຢ່າດື່ມນໍ້າທີ່ມີລົດຊາດຫວານຫຼາຍເກີນໄປ.
4. ເລືອກກິນອາຫານ ແລະໝາກໄມ້ທີ່ມີປະໂຫຍດ ເຊັ່ນ: ໝາກເລັ່ນ, ໝາກນັດ, ໝາກໂມ, ເສົາກ້ວຍ... ເຊິ່ງຈະເຮັດໃຫ້ເຫື່ອອອກໜ້ອຍລົງ ແລະຄາຍຮ້ອນໄດ້ເປັນຢ່າງດີ.
5. ບໍ່ຄວນກິນອາຫານລົດຈັດ ໂດຍສະເພາະແມ່ນລົດຊາດເຜັດຮ້ອນ ເພາະມັນຈະເຮັດໃຫ້ເຫື່ອອອກຫຼາຍຂຶ້ນ.
6. ກິນອາຫານຄາບລະໜ້ອຍຊ່ວຍໄດ້ ເພາະການກິນອາຫານໃຫ້ພໍດີຈະເຮັດໃຫ້ລະບົບການເຜົາຜານໜ້ອຍລົງ ເຮັດໃຫ້ອຸນຫະພູມໃນຮ່າງກາຍຫຼຸດໄປນໍາ ແຕ່ຖ້າເຮົາກິນຫຼາຍເກີນໄປ ຮ່າງກາຍກໍຕ້ອງເຜົາຜານຫຼາຍກວ່າເກົ່າ ຈຶ່ງເຮັດໃຫ້ເກີດຄວາມຮ້ອນໃນຮ່າງກາຍ ແລະເຫື່ອອອກຫຼາຍຂຶ້ນ.
7. ໃສ່ເກີບທີ່ສາມາດລະບາຍອາກາດໄດ້ດີ ເພາະເຮົາໃສ່ເກີບຜ້າໃບ ຫຼືເກີບໜັງຈະຍິ່ງເຮັດໃຫ້ມີກິ່ນອັບ ແລະເກີດເຫື່ອໄດ້ງ່າຍໄດ້.




ທີ່ມາ:
  • ແທັກທີ່ກ່ຽວຂ້ອງ