• ຜົນກະທົບຈາກການນອກເດິກ ມີຫຍັງແດ່?

ໂດຍ: Admin Mahason 30 ທັນວາ 2019 (09.51 ນ.) Read : 397

     ນອກຈາກພຶດຕິກໍາການກິນອາຫານທີ່ມີແຄລໍລີ່ສູງຈະເຮັດໃຫ້ໜ້າທ້ອງເຮົາມີໄຂມັນໄດ້ງ່າຍແລ້ວ ຮູ້ ຫຼືບໍ່ວ່າ ພຶດຕິກໍາການນອນເດິກກໍເປັນອີກສາເຫດໜຶ່ງທີ່ເຮັດໃຫ້ໜ້າທ້ອງເຮົາໃຫຍ່ຂຶ້ນໄດ້ເຊັ່ນກັນ ພ້ອມທັງຍັງເຮັດໃຫ້ຮູບຮ່າງບໍ່ງາມອີກດ້ວຍ. ຫຼາຍຄົນອາດຈະສົງໄສວ່າ ເປັນຫຍັງການນອນເດິກ ຈຶ່ງສົ່ງຜົນກະທົບໃຫ້ເຮົາຫຼາຍປານນີ້ ແລະນອກຈາກໜ້າທ້ອງໃຫຍ່ແລ້ວ ຍັງມີຫຍັງອີກ ເຮົາລອງມາອ່ານເບິ່ງນໍາກັນ.
1. ລະບົບການເຜົາຜານເຮັດວຽກບໍ່ເຕັມທີ່: ລະບົບເມຕ້າບໍລິຊໍ່ານັ້ນຄື ສ່ວນສໍາຄັນທີ່ເຮັດໃຫ້ຮ່າງກາຍສາມາດຍ່ອຍອາຫານໄດ້ຍ່າງມີປະສິດທິພາບ ໂດຍຄວາມສາມາດໃນການຍ່ອຍສາມາດປ່ຽນແປງໄດ້ໄປຖາມອາຍຸ, ນໍ້າໜັກ, ເພດ ແລະພຶດຕິກໍາການໃນການນອນຂອງແຕ່ລະຄົນ. ການອົດນອນ ຫຼືນອນໜ້ອຍ ຈະເຮັດໃຫ້ລະບົບເມຕ້າບໍລິຊໍ່ານັ້ນຫຼຸດລົງ ເພາະມັນຈະເຮັດວຽກໄດ້ດີໃນເວລາທີ່ເຮົານອນ ແຕ່ມັນຊໍ້າພັດມາເຮັດວຽກໜັກໃນຍາມກາງເວັນແທນ ຈົນເຮັດໃຫ້ເຮົາຮູ້ສຶກຫິວຫຼາຍຂຶ້ນ, ກິນຫຼາຍຂຶ້ນ ແລະມີໜ້າທ້ອງເພີ່ມຂຶ້ນນັ້ນເອງ.
2. ບໍ່ມີແຮງເຮັດວຽກ ຫຼືກິດຈະກໍາອື່ນ: ຖ້າເຮົາອົດນອນພຽງມື້ດຽວ ຫຼືຫຼາຍມື້ຕິດຕໍ່ກັນ ສັງເກດເຫັນໄດ້ຢ່າງຈະແຈ້ງຄື ຮ່າງກາຍຂອງເຮົາບໍ່ສົດຊື່ນ ແລະເຮັດວຽກໄດ້ບໍ່ເຕັມທີ່, ຖ້າຫາກເປັນຄົນທີ່ມັກອອກກໍາລັງກາຍ ຮ່າງກາຍຂອງເຮົາຈະຮູ້ສຶກອ່ອນເພຍ ແລະບໍ່ຢາກອອກກໍາລັງກາຍໃນມື້ຕໍ່ໄປ. ດັ່ງນັ້ນ, ຖ້າຫາກເຮົານອນເດິກ ໜ້າທ້ອງທີ່ມີຢູ່ກໍຈະບໍ່ຫຼຸດລົງ ເຖິງແມ່ນວ່າເຮົາຈະພະຍາຍາມອອກກໍາລັງກາຍເລື້ອຍໆກໍຕາມ.
3. ຄວບຄຸມອາລົມໄດ້ຍາກຂຶ້ນ: ເມື່ອເຮົານອນເດິກ ຫຼືນອນໜ້ອຍ ຄວາມສາມາດໃນການຄວບຄຸມອາລົມຕ່າງໆຂອງເຮົາຈະຫຼຸດໜ້ອຍລົງຢ່າງຫຼວງຫຼາຍ ອາການມັກຈະສະແດງອອກ ຄື: ນັ່ງຊຶງ, ລະເມີ, ໃຈລອຍ, ຫາວນອນໝົດມື້, ຮູ້ສຶກຫງຸດງິດງ່າຍ ຫຼືອາດຈະບໍ່ມີອາລົມຢາກຈະຄວບຄຸມອາຫານຕາມທີ່ຕັ້ງໃຈໄວ້. ດັ່ງນັ້ນ, ຖ້າເຮົາບໍ່ສາມາດຄວບຄຸມຄວາມຍາກກິນໄດ້ ຈຶ່ງເປັນສາເຫດຂອງການກິນຈຸບຈິບຕາມໃຈປາກ ເຊິ່ງເປັນສາເຫດເຮັດໃຫ້ພະຍາດຕຸ້ຍຕາມມາ.
4. ການນອນໜ້ອຍເຮັດໃຫ້ຫິວງ່າຍ: ທຸກເທື່ອທີ່ເຮົານອນເດິກ ຫຼືພັກຜ່ອນບໍ່ພຽງພໍ ເຮົາຈະຮູ້ສຶກຫິວຕະຫຼອດເວລາ, ຢາກກິນນັ້ນໆນີ້ໆ ແລະເຮັດໃຫ້ເຮົາຫິວຫຼາຍຂຶ້ນ. ເນື່ອງຈາກຮໍໂມນເກຼລິນ ແລະເລບຕິນ ທີ່ເຮັດໜ້າທີ່ຄວບຄຸມຄວາມຫິວນັ້ນ ຍັງເຮັດວຽກຢູ່ໃນຊ່ວງທີ່ເຮົານອນເດິກ ຫຼືນອນພັກຜ່ອນບໍ່ພຽງພໍໃນຄືນຜ່ານມາ.
5. ເກີດພະຍາດຕຸ້ຍ: ການນອນເດິກເປັນປັດໄຈສ່ຽງທີ່ຈະເຮັດໃຫ້ເກີດພະຍາດຕຸ້ຍໄດ້ງ່າຍໆ ເພາະມັນຈະເຮັດໃຫ້ BMI ຫຼືນໍ້າໜັກຕົວຂອງເຮົາເພີ່ມຂຶ້ນ ເຊິ່ງພະຍາດຕຸ້ຍນີ້ເອງ ທີ່ສົ່ງຜົນໂດຍກົງຕໍ່ໜ້າທ້ອງຂອງເຮົາ ເຮົາຈະສັງເກດເຫັນມັນໃຫຍ່ຂຶ້ນເລື້ອຍໆ.
     ເຊື່ອວ່າມີຄົນສ່ວນໜ້ອຍທີ່ຈະເຂົ້ານອນຕັ້ງແຕ່ 20:00 ໂມງ ໄດ້ທຸກມື້ ແຕ່ຖ້າຫາກເປັນໄປໄດ້ກໍຢາກແນະນໍາໃຫ້ທຸກທ່ານນອນຫຼັບຢ່າງພຽງພໍ. ເຮັດໄດ້ພຽງເທົ່ານີ້ ກໍເຮັດໃຫ້ໝັ້ນໃຈໄດ້ວ່າ ໜ້າທ້ອງຂອງເຮົາຈະຕ້ອງຫຍຸບລົງຢ່າງແນ່ນອນ. 




ທີ່ມາ:
  • ແທັກທີ່ກ່ຽວຂ້ອງ