• ຄວາມເປັນມາຂອງຮອຍພຣະບາດໂພນສັນ

ໂດຍ: Admin Mahason 19 ທັນວາ 2019 (16.12 ນ.) Read : 298

     ຮອຍພຣະບາດໂພນສັນເປັນປູສະນີຍະວັດຖຸອັນສຳຄັນປະການໜຶ່ງ ເຊິ່ງພຸດທະສາຊະນິກະຊົນ ທັງພາຍໃນແລະຕ່າງປະເທດ ຕ່າງກໍ່ເຄົາລົບນັບຖື ເພື່ອລະນຶກເຖິງຄຸນຂອງພຣະພຸດທະເຈົ້າ, ພຣະທໍາມະເຈົ້າ ແລະພຣະສັງຄະເຈົ້າ ເຊິ່ງເປັນຜູ້ມີອຸປະກາລະຄຸນໃຫ້ແກ່ມະນຸດເຮົາ ພະຍາຍາມສອນໃຫ້ພວກເຮົາທັງຫຼາຍ ໃຫ້ລຸດພົ້ນອອກຈາກຕັນຫາ, ເຄື່ອງຜູກພັນຕ່າງໆນາໆ, ສັດທັງຫຼາຍໃຫ້ຈົມຢູ່ໃນວັດຕະສົງສານ ແລະໃຫ້ມະນຸດຄົນ. ໃຫ້ບັນດາສັບພະສັດທັງຫຼາຍ ໄດ້ມີໂອກາດສ້າງຄຸນງາມຄວາມດີ, ເຮັດບຸນໃຫ້ທານ, ມີເມດຕາກາລຸນາ ແລະມຸທຸຕາອຸເປກຂາ ຕາມຄໍາສອນໃນພຣະພຸດທະສາສະໜາ.
     ຮອຍພຣະພຸດທະບາດໂພນສັນ ປະດິດສະຖານຢູ່ພະລານຫິນໂຄກຈິກວຽງງົວ ໃນເຂດບ້ານ ພະບາດ ເມືອງ ທ່າພະບາດ ແຂວງ ບໍລິຄຳໄຊ ອັນເປັນສິ່ງທີ່ນຳຄວາມເຫຼື້ອມໃສຂອງບັນດາຊາວພຸດທັງພາຍໃນ ແລະຕ່າງປະເທດ ເນື່ອງຈາກວ່າເປັນທີ່ປະດິດສະຖານ “ຮອຍພຣະບາດຂອງພຣະພຸດທະເຈົ້າ” ຄືເມື່ອຕອນພຣະອົງຊົງຍັງມີຊີວິດຢູ່ ພຣະອົງໄດ້ສະເດັດມາປະທານຮອຍພຣະບາດໄວ້ ເພື່ອໃຫ້ປະນະສັດທັງຫຼາຍ ທີ່ມີຄວາມເຫຼື້ອມໃສໃນພຣະອົງ ໄດ້ຂາບໄຫວ້, ດ້ວຍລິດເດດປາຣະມີຂອງພຣະພຸດທະອົງ ສະຖານທີ່ແຫ່ງນີ້ຈຶ່ງບໍ່ຖືກທຳລາຍ ແລະຍັງຄົງໃຫ້ພວກເຮົາເຫັນຢູ່ໃນປັດຈຸບັນ.
     ພຣະພຸດທະບາດໂພນສັນ ໝາຍຄວາມວ່າ: ຮອຍພຣະບາດທີ່ພຣະພຸດທະອົງປະທັບໄວ້ໃນສະຖານທີ່ ທີ່ພຣະອົງ ນັ່ງສັນເຂົ້ານັ້ນເອງ ເພາະບໍລິເວນໃກ້ກັນນີ້ ມີໂພນດິນປົນຫີນ ແລະຊາຍສູງໃຫ່ຍ ຢູ່ແຄມແມ່ນໍ້າຂອງ ຫ່າງຈາກທີ່ປະດິດສະຖານຮອຍພຣະພຸດທະບາດ ໄປທາງທິດໃຕ້ປະມານ 2 ກິໂລແມັດ. ບູຮານນະການຈຶ່ງໄດ້ກ່າວເອີ້ນກັນມາວ່າ: "ຮອຍພຣະບາດໂພນສັນ" ຮວມເອົາຊື່ທັງສອງແຫ່ງມາເຂົ້າກັນ ເພື່ອໃຫ້ພວກເຮົາຈື່ຈຳໄດ້ງ່າຍ.
     ວັດພຣະບາດໂພນສັນ ມີເນື້ອທີ່ ປະມານ 200x600 ຕາແມັດ ເທົ່າກັບ 12 ເຮັກຕາ. ຮ່ອງຮອຍພຣະບາດໄດ້ຄົ້ນພົບໃນກາງເດືອນ ມີນາ ປີ 1933 ຕັ້ງຢູ່ພະລານຫີນ ທີ່ມີຮອຍພຣະພຸດທະເຈົ້າ. ຂະໜາດຂອງຮອຍພຣະບາດເລິກ 40 ຊມ, ກວ້າງ 1.20 ຊມ ແລະຍາວ 2.40 ຊມ. ຢູ່ໃນກົງຈັກພື້ນພຣະບາດ ມີຮູບສັດ 108 ຊະນິດ ເປັນຮອຍພຣະບາດເບື້ອງຂວາ ປິ່ນໜ້າໄປທາງທິດຕາເວັນອອກ ເຊິ່ງໃນທຸກໆປີຂອງເດືອນ ກຸມພາ ຂຶ້ນ 15 ຄໍ່າ ຈະເປັນວັນຈັດພິທີບຸນນະມັດສະການວັດພຣະບາດໂພນສັນ.

ຂໍ້ມູນ: Thaphabath Review




ທີ່ມາ:
  • ແທັກທີ່ກ່ຽວຂ້ອງ