• ເອັດສຊີຈີ ສານຕໍ່ມອບທຶນການສຶກສາ “SCG Sharing the Dream” ປີທີ 8

ໂດຍ: ສີເປື້ອນມື 18 ທັນວາ 2019 (15.22 ນ.) Read : 247

ໃນວັນທີ 17 ທັນວາ 2019 ຜ່ານມາ ທາງບໍລິສັດ ເອັດສຊີຈີ ໄດ້ຮ່ວມກັບ ກະຊວງສຶກສາທິການ ແລະ ກີລາ ແລະສະມາຄົມຮ່ວມນໍ້າໃຈກັບເດັກນ້ອຍລາວ ສານຕໍ່ໂຄງການ “SCG Sharing the Dream” ໃນ ສປປ ລາວ ເປັນປີທີ 8 ເຊິ່ງເປັນໜຶ່ງໃນໂຄງການກິດຈະກໍາເພື່ອສັງຄົມຂອງເອັດສຊີຈີ ທີ່ມຸ່ງສົ່ງເສີມການພັດທະນາສັກກະຍະພາບເຍົາວະຊົນຂອງປະເທດໃນອາຊຽນ ເພື່ອສ້າງໂອກາດທາງການສຶກສາໃຫ້ເຍົາວະຊົນທີ່ເປັນຄົນເກັ່ງ ແລະດີ, ມີຄວາມກະຕັນຍູ ແຕ່ຂາດເຂີນທຶນການສຶກສາ. ງານດັ່ງກ່າວໄດ້ຈັດຂຶ້ນທີ່ສູນກີລາໃນຮົ່ມ ບູໂດ ນະຄອນຫຼວງວຽງຈັນ. ໃຫ້ກຽດເຂົ້າຮ່ວມໄດ້ແກ່: ທ່ານ ນາງ ອຸຣະວະດີ ສີພິຣົມ ເອກອັກຄະລັດຖະທູດໄທ ປະຈໍາ ສປປ ລາວ,  ທ່ານ ນາງ ປອ. ດາລາວອນ ກິດຕິພັນ ຮັກສາການຫົວໜ້າຫ້ອງການ ກະຊວງສຶກສາທິການ ແລະ ກີລາ, ທ່ານ ພູທອນ ແສງດາວົງ ຮອງຫົວໜ້າພະແນກສຶກສາທິການ ແລະ ກີລາ, ທ່ານ ວິໂຣດ ຣັດຕະນະໄຊສິດ Head of Distribution and Retail Business ບໍລິສັດ ເອັດສຊີຈີ ຊີມັງ - ຜະລິດພັນກໍ່ສ້າງ ພ້ອມດ້ວຍບັນດາຄູອາຈານ, ນັກຮຽນ-ນັກສຶກສາ ຜູ້ທີ່ໄດ້ຮັບທຶນເຂົ້າຮ່ວມ.

ທ່ານ ວິໂຣດ ຣັດຕະນະໄຊສິດ ໄດ້ກ່າວວ່າ: ເອັດສຊີຈີ ເຊື່ອວ່າປະເທດຊາດຈະເຂັ້ມແຂງໄດ້ກໍຕ້ອງເລີ່ມຈາກ ຄົນ ທີ່ມີຄຸນນະພາບ ເຊິ່ງບໍ່ໄດ້ໝາຍເຖິງພຽງແຕ່ຄົນເກັ່ງ ຫຼືຄົນທີ່ມີຄວາມສາມາດແຕ່ຢ່າງດຽວ ແຕ່ຕ້ອງເປັນຄົນດີ, ກະຕັນຍູຕໍ່ຄອບຄົວ, ຕໍ່ຊຸມຊົນ, ຕໍ່ສັງຄົມ ແລະຕົນເອງ. ນອກນັ້ນ, ເອັດສຊີຈີ ຍັງເປັນຄວາມສໍາຄັນຂອງຄວາມໄຝ່ຝັນ ແລະຄວາມມຸ່ງໝັ້ນ ຈຶ່ງຢາກເຊີນຊວນໃຫ້ນ້ອງໆທຸກຄົນ ຮ່ວມຈຸດປະກາຍຄວາມໄຝ່ຝັນ ແລະຄວາມມຸ່ງໝັ້ນ ສູ່ຄວາມສໍາເລັດໃນອະນາຄົດ ແລະສະແດງໃຫ້ເຫັນວ່າ ຄວາມໄຝ່ຝັນຄືພະລັງສໍາຄັນ ທີ່ເປັນຈຸດເລີ່ມຕົ້ນໄປສູ່ການພັດທະນາສັງຄົມ ແລະປະເທດຊາດໃຫ້ກ້າວໜ້າຕໍ່ໄປໃນອະນາຄົດ.

ເອັດສຊີຈີ ໄດ້ປະກາດຮັບສະໝັກຜ່ານສື່ມວນຊົນ ແລະໜ່ວຍງານລາດຊະການທີ່ກ່ຽວຂ້ອງເພື່ອໃຫ້ໄດ້ນັກຮຽນກົງຕາມຄຸນນະສົມບັດຕາມເກນ, ສົ່ງໃບສະໝັກພ້ອມດ້ວຍບົດຄວາມບັນຍາຍຄວາມເປັນຄົນດີ, ມີຄວາມກະຕັນຍູ ແລະຄວາມມຸ່ງໝັ້ນທີ່ຈະສຶກສາຕໍ່ ເພື່ອນໍາເອົາຄວາມຮູ້ມາພັດທະນາສັງຄົມ ແລະຜ່ານການຄັດເລືອກສາມາດໄດ້ຜູ້ທີ່ໄດ້ຮັບທຶນດັ່ງນີ້:

ເອັດສຊີຈີ ໄດ້ມອບທຶນການສຶກສາໃຫ້ກັບນັກຮຽນມັດທະຍົມຕອນປາຍ ຈໍານວນ 300 ທຶນ (ນະຄອນຫຼວງວຽງຈັນ 160 ທຶນ ແລະ ແຂວງ ຄໍາມ່ວນ 140 ທຶນ) ມອບໃຫ້ຄົນລະ 1.700.000 ກີບ ຫຼື 200 ໂດລາ ແລະມອບທຶນການສຶກສາຕໍ່ເນື່ອງໃນລະດັບປະລິນຍາຕີ ຈໍານວນ 10 ທຶນ ຫຼັງຈາກທີ່ໄດ້ມອບທຶນລະດັບປະລິນຍາຕີໄປໃນປີຜ່ານມາເປັນຄັ້ງທໍາອິດ ໃນຈໍານວນ 10 ທຶນ ໂດຍໃຫ້ທຶນການສຶກສາ ຄົນລະ 5.100.000 ກີບ ຫຼື 600 ໂດລາ ຕໍ່ປີ ຈົນຈົບການສຶກສາໂດຍບໍ່ມີເງື່ອນໄຂໃນການໃຊ້ຄືນ.




ທີ່ມາ:
  • ຮູບພາບ