• ໂສມໜ້າ 40 ຄົນສຸດທ້າຍ ຜູ້ເຂົ້າປະກວດນາງສາວລາວ ປະຈໍາປີ 2019 ແລະມົງກຸດ 5 ຕໍາແໜ່ງ

ໂດຍ: ສີເປື້ອນມື 01 ພະຈິກ 2019 (17.27 ນ.) Read : 2,961

ໃນວັນທີ 30 ຕຸລາ 2019 ຜ່ານມາ ໄດ້ມີການຈັດງານເປີດຕົວຜູ້ເຂົ້າຮອບ 40 ຄົນສຸດທ້າຍຂອງໂຄງການປະກວດ ນາງສາວລາວ ປະຈໍາປີ 2019 “MISS LAOS 2019” ເຊິ່ງເປັນຕົວແທນຈາກ 18 ແຂວງທົ່ວປະເທດ ພ້ອມທັງເປັນການເປີດໂຕມົງກຸດ 5 ຕໍາແໜ່ງ ຢ່າງເປັນທາງການ ຢູ່ທີ່ສູນການຄ້າ ວຽງຈັນ ເຊັນເຕີ. ໂດຍການເປັນປະທານຂອງ ທ່ານ ຄົມປັນຍາ ເພັງວິໄນຍາ ປະທານໂຄງການປະກວດ ນາງສາວລາວ ພ້ອມດ້ວຍບັນດາແຂກກຽດຕິມາສັກ ແລະຜູ້ສະໜັບສະໜູນຫຼັກຢ່າງເປັນທາງການ.

ໂຄງການປະກວດນາງສາວລາວ ເປັນເວທີການປະກວດເພື່ອຄົ້ນຫາສາວງາມທີ່ມີຄວາມເກົ່າແກ່ທີ່ສຸດໃນ ສປປ ລາວ ເຊິ່ງໄດ້ຮັບການຊີ້ນໍາຈາກ ສູນກາງຊາວໜຸ່ມປະຊາຊົນປະຕິວັດລາວມາໂດຍຕະຫຼອດ. ສະເພາະໃນປີ 2018-2019 ແມ່ນທາງບໍລິສັດ ຄົມປັນຍາເອັນເຕີເທນເມັ້ນ ເປັນຜູ້ຮັບຜິດຊອບໃນການດໍາເນີນໂຄງການ ແລະໃນປີ 2019 ທາງກອງປະກວດຍັງຈະສືບເນື່ອງຄົ້ນຫານາງສາວລາວ ທີ່ມີປະຫວັດ ແລະການປະພຶດຕົນອັນດີງາມ ທີ່ສອດຄ່ອງກັບການຮັກສາວັດທະນະທໍາ ແລະຮີດຄອງປະເພນີອັນຊົງຄຸນຄ່າຂອງຊາດລາວ ພ້ອມທັງໃສ່ໃຈໃນເລື່ອງຂອງການສຶກສາ ທີ່ມາພ້ອມກັບລາງວັນທຶນການສຶກສາຕໍ່ ໃນລະດັບປະລິນຍາຕີ ໃຫ້ກັບນາງສາວທີ່ຕໍາແໜ່ງຊະນະເລີດທັງ 5 ຄົນ.

ສໍາລັບມົງກຸດເພັດໃນປີນີ້ແມ່ນ ໄດ້ຖືກອອກແບບຢ່າງປານີດ ພ້ອມທັງມີລວດລາຍທີ່ເປັນເອກະລັກທີ່ຊົງຄຸນຄ່າ ແລະເຕັມໄປດ້ວຍຄວາມງົດງາມຈາກເພັດທີ່ປະດັບປະດາຢູ່ເທິງມົງກຸດ ເຊິ່ງໄດ້ຮັບການສະໜັບສະໜູນຈາກຮ້ານຄໍາພູວົງ, ມົງກຸດມີຈໍານວນ 5 ອັນ ທີ່ຈະມອບໃຫ້ນາງສາວລາວ ປະຈໍາປີ 2019 ທັງ 5 ຕໍາແໜ່ງ ແລະໃຫ້ກຽດນໍາສະເໜີມົງກຸດໃນງານດັ່ງກ່າວແມ່ນບັນດານາງສາວລາວ ປະຈໍາປີ 2018 ທັງ 5 ນາງສາວ. ສ່ວນການປະກວດໃນຮອບຕັດສິນແມ່ນວັນທີ 07 ທັນວາ 2019 ນີ້ ທີ່ໂຮງແຮມແລນມາກ ແມ່ຂອງຣີເວີໄຊ ນະຄອນຫຼວງວຽງຈັນ.




ທີ່ມາ:
  • ຮູບພາບ