• ເທດສະການສາຍຮູບເງົາດີເດັ່ນ ລາວ-ຈີນ ປະຈໍາປີ 2019

ໂດຍ: ສີເປື້ອນມື 30 ຕຸລາ 2019 (17.11 ນ.) Read : 506

ໃນວັນທີ 30 ຕຸລາ 2019 ທາງກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ຮ່ວມກັບ ວິທະຍຸສາກົນແຫ່ງປະເທດຈີນ ຫຼື CRI ປະຈໍາ ສປປ ລາວ ໄດ້ຈັດພິທີເປີດງານເທດສະການຮູບເງົາດີເດັ່ນ ລາວ-ຈີນ ປະຈໍາປີ 2019 ຢ່າງເປັນທາງການ ທີ່ຫໍວັດທະນະທໍາແຫ່ງຊາດ ນະຄອນຫຼວງວຽງຈັນ. ໃຫ້ກຽດເຂົ້າຮ່ວມງານ ໄດ້ແກ່: ທ່ານ ຈ້າວເສີງກ່າງ ທີ່ປຶກສາການເມືອງ ສະຖານທູດ ສປ ຈີນ ປະຈໍາ ສປປ ລາວ,​ ທ່ານ ວິທູນ ສຸນດາຣາ ຫົວໜ້າກົມຮູບເງົາ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ທ່ານ ນາງ ສຸດທິດາ ຫົວໜ້າວິທະຍຸສາກົນແຫ່ງປະເທດຈີນ ຫຼື CRI ປະຈໍາ ສປປ ລາວ, ພ້ອມດ້ວຍບັນດານັກພາກຮູບເງົາ ແລະມວນຊົນເຂົ້າຮ່ວມທັງຄົນລາວ ແລະຄົນຈີນຢ່າງຫຼວງຫຼາຍ.

ທ່ານ ວິທູນ ສູນດາຣາ ໄດ້ກ່າວວ່າ: ໂດຍປະຕິບັດຕາມແຜນແມ່ບົດ ວ່າດ້ວຍການສ້າງຄູ່ຮ່ວມຊະຕາກໍາ ລາວ-ຈີນ ແລະຜົນສໍາເລັດໃນການຈັດເທດສະການຮູບເງົາດີເດັ່ນ ລາວ-ຈີນ ໃນຄັ້ງຜ່ານມາ, ພາຍໃຕ້ການຊີ້ນໍາຂອງກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແລະສະຖານທູດ ສປ ຈີນ ປະຈໍາ ສປປ ລາວ, ກົມຮູບເງົາ ແລະ CRI ປະຈໍາລາວ ໄດ້ຮ່ວມກັນຈັດງານເທດສະການ ສາຍຮູບເງົາດີເດັ່ນ ລາວ-ຈີນ ປະຈໍາປີ 2019 ຂຶ້ນຢູ່ ສປປ ລາວ ເຊິ່ງການຮ່ວມມືຄັ້ງທີ 3 ແລະເຊື່ອວ່າການຈັດງານໃນຄັ້ງນີ້ ຈະກາຍເປັນເວທີແຫ່ງການພົວພັນ ແລະແລກປ່ຽນວັດທະນະທໍາສອງຊາດ ລາວ-ຈີນ ໂດຍຜ່ານຮູບເງົາຈີນ ທີ່ພາກເປັນພາສາລາວ ເພື່ອຈະເຮັດໃຫ້ປະຊາຊົນລາວບັນດາເຜົ່າ ໄດ້ເຂົ້າໃຈວັດທະນະທໍາຈີນຫຼາຍຂຶ້ນ ແລະຫວັງວ່າທັງສອງປະເທດຈະສືບຕໍ່ຮ່ວມມື ໃນການຊ່ວຍເຫຼືອເຊິ່ງກັນ ແລະກັນ ໂດຍສະເພາະແມ່ນການຈັດການແຂ່ງຂັນຮູບເງົາ ແລະການພັດທະນາບຸກຄະລາກອນດ້ານຮູບເງົາ.

ສໍາລັບເທດສະການສາຍຮູບເງົາດີເດັ່ນ ລາວ-ຈີນ ປະຈໍາປີ 2019 ນີ້ ຈະໄດ້ນໍາເອົາຮູບເງົາດີເດັ່ນຂອງຈີນ 02 ເລື່ອງ ຄື: ມະຫາເສດຖີຈໍາເປັນ ແລະສາຍພູຈາກຮອຍຍິ້ມ ເຊິ່ງໄດ້ພາກສຽງເປັນພາສາລາວ ໂດຍນັກພາກມືອາຊີບ ແລະສິລະປິນທີ່ມີຊື່ສຽງຂອງລາວ ພ້ອມກັນນັ້ນ, ຍັງຈະນໍາເອົາຮູບເງົາທັງສອງເລື່ອງໄປສາຍທີ່ຕ່າງແຂວງ ໂດຍບໍ່ເສຍຄ່າເຂົ້າຊົມ ເຊັ່ນ: ແຂວງ ວຽງຈັນ, ບໍລິຄໍາໄຊ, ສະຫວັນນະເຂດ, ສາລະວັນ, ອັດຕະປື, ໄຊຍະບູລີ, ບໍ່ແກ້ວ ແລະຜົ້ງສາລີ ໃນລະຫວ່າງເດືອນ ພະຈິກ 2019 ນີ້.




ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ