• ໂຄງການປະກວດ “ປັ້ນເຈົ້າໃຫ້ເປັນດາວ” ຄັ້ງທໍາອິດໃນລາວ

ໂດຍ: ສີເປື້ອນມື 22 ຕຸລາ 2019 (16.09 ນ.) Read : 469

ໃນວັນທີ 21 ຕຸລາ 2019 ຜ່ານມາ ໄດ້ມີການຈັດພິທີຖະແຫຼງຂ່າວເປີດໂຄງການປະກວດການສະແດງຄວາມສາມາດທຸກຮູບແບບ ພາຍໃຕ້ໂຄງການ ປັ້ນເຈົ້າໃຫ້ເປັນດາວ ຢ່າງເປັນທາງການ ຢູ່ທີ່ສູນການຄ້າ ວຽງຈັນເຊັນເຕີ ນະຄອນຫຼວງວຽງຈັນ. ໃຫ້ກຽດເຂົ້າຮ່ວມໄດ້ແກ່: ທ່ານ ນາງ ອານິດ ສີວິໄຊ ປະທານສູນຝາກຂາຍໂອດ໊ອບລາວ, ທ່ານ ທະວີສັກ ທໍາມະວົງສາ ປະທານບໍລິຫານຄ້າຍເພງ ທີເຄ ຊາວລາວ ພ້ອມດ້ວຍຕົວແທນຈາກຜູ້ສະໜັບສະໜູນ ແລະພາກສ່ວນທີ່ກ່ຽວຂ້ອງ.

ໂຄງການ ປັ້ນເຈົ້າໃຫ້ເປັນດາວ ເປັນການຮ່ວມກັນລະຫວ່າງ ບໍລິສັດ ມິສທີນກ້າວໜ້າລາວ, ສູນຝາກຂາຍໂອດ໊ອບລາວ N&N/12, ຄ້າຍເພງທີເຄຊາວລາວ,​ ຫ້ອງເສື້ອ DVIS, ຮ້ານຂອບໃຈຊາບູບຸບເຟ່, ຮ້ານອາຫານ C&C/2 ແລະສູນການຄ້າ ວຽງຈັນເຊັນເຕີ. ຈຸດປະສົງຂອງການຈັດໂຄງການດັ່ງກ່າວແມ່ນ ເພື່ອເປັນສີສັນ ແລະກິດຈະກໍາ ທີ່ສາມາດດຶງດູດຄວາມສົນໃຈຈາກຜູ້ຄົນທັງພາຍໃນ ແລະຕ່າງປະເທດ ໃຫ້ເຂົ້າມາຮ່ວມຫຼາຍຂຶ້ນ. ນອກນັ້ນ, ຍັງເປັນການເປີດໂອກາດໃຫ້ຜູ້ທີ່ມີຄວາມສາມາດໃນດ້ານຕ່າງໆ ບໍ່ວ່າຈະເປັນ ການຕໍ່າຫູກງາມ, ປຸງແຕ່ງອາຫານແຊບ, ຮ້ອງເພງ, ຂັບລໍາ, ຫຼິ້ນດົນຕີ, ອອກແບບເສື້ອຜ້າ, ເດີນແບບ, ຊ່າງແຕ່ງໜ້າ, ຫັດຖະກໍາ ແລະຄວາມສາມາດພິເສດດ້ານອື່ນໆ ພ້ອມທັງສ້າງບັນຍາກາດໃຫ້ການວາງສະແດງ ແລະຈໍາໜ່າຍສິນຄ້າຂອງຊາວບ້ານ ໃຫ້ມີຈຸດເດັ່ນ ແລະສົ່ງເສີມປີທ່ອງທ່ຽວລາວ ພ້ອມທັງເປັນການເປີດໂຕສູນຝາກຂາຍໂອດ໊ອບລາວຢ່າງເປັນທາງການ.

ເລີ່ມສະໝັກໄດ້ຕັ້ງແຕ່ມື້ນີ້ເປັນຕົ້ນໄປ ແລະຮອບຄັດເລືອກທໍາອິດ ໃນວັນທີ 15 ພະຈິກ 2019 ທີ່ສູນການຄ້າ ວຽງຈັນເຊັນເຕີ ແລະໂຄງການດັ່ງກ່າວຈະດໍາເນີນໄປຈົນເຖິງ ວັນທີ 10 ທັນວາ 2019. ສໍາລັບຜູ້ທີ່ສົນໃຈສະໝັກເຂົ້າຮ່ວມປະກວດໃນໂຄງການ ປັ້ນເຈົ້າໃຫ້ເປັນດາວ ສາມາດຕິດຕໍ່ພົວພັນ ແລະສອບຖາມຂໍ້ມູນເພີ່ມຕື່ມໄດ້ທີ່: ນາງ ສອນສະຫວັນ ເບີໂທ 020 5887 2256, ນາງ ລັດດາວັນ ເບີໂທ 020 2374 6138, ທ້າວ ພຸ້ງຕາວັນ ເບີໂທ 020 5567 4244, ທ້າວ ສຸກອນ ເບີໂທ 020 5410 1858, ບໍລິສັດ ມິສທີນ ເບີໂທ 021 255442-3, ຮ້ານຊາບູ ບຸບເຟ່ ເບີໂທ 030 4411 629, ສູນຝາກຂາຍໂອດ໊ອບລາວ ເບີໂທ 030 4629 970 ແລະຄ້າຍເພງ ທີເຄ ຊາວລາວ ເບີໂທ 020 7878 3222.




ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ