• ງານຫຼວງພະບາງຮາບມາລາທອນ ມີນັກແລ່ນເຂົ້າຮ່ວມຫຼາຍກ່ວາ 1.000 ຄົນ

ໂດຍ: ສີເປື້ອນມື 21 ຕຸລາ 2019 (14.02 ນ.) Read : 137

ຕອນເຊົ້າວັນທີ່ 20 ຕຸລາ 2019 ນີ້ ທີ່ໂຮງໝໍເພື່ອນລາວສຳລັບເດັກແຂວງຫຼວງພະບາງ ໄດ້ຈັດງານແລ່ານ ຫຼວງພະບາງຮາບມາລາທອນຄັ້ງທີ 7 ປີ ໂດຍມີນັກແລ່ນຈາກພາຍໃນປະເທດ ແລະຕ່າງປະເທດ ເຂົ້າຮ່ວມຫຼາຍກ່ວາ 1.000 ຄົນ. ເພື່ອປຸກລະດົມທຸກຄົນໃນສັງຄົມ ນັບທັງແຂກພາຍໃນ ແລະຕ່າງປະເທດ ມີສ່ວນຮ່ວມສົມທົບທືນ ໃນການຈັດຊື້ອຸປະກອນການແພດ ແລະພັດທະນາໂຮງໝໍເພື່ອນລາວສຳລັບເດັກ ໃນແຂວງຫຼວງພະບາງ ແລະສົມທົບທືນຊ່ວຍຜູ້ປະສົບໄພນ້ຳຖ້ວມ ໃນລະດູຝົນປີນີ້ ໂດຍສະເພາະແມ່ນບັດາແຂວງພາກໃຕ້ຂອງລາວ, ໂດຍຜູ້ເຂົ້າຮ່ວມ ຕ້ອງລົງທະບຽນເປັນເງີນ ເຊິ່ງລາຍໄດ້ທັງໝົດ ຈະມອບເຂົ້າໃນກອງທືນພັດທະນາ ການແພດ ຂອງໂຮງຫມໍດັ່ງກ່າວ.
ສຳລັບການແລ່ນຫຼວງພະບາງຮາບມາລາທອນໃນປີນີ້ປະກອບມີ 3 ຮຸ່ນຄື: 7 ກິໂລແມັດ, 14 ກິໂລແມັດ ແລະ 21 ກິໂລແມັດ. ໂດຍເລີ້ມຈາກໜ້າຫໍພິພິທະພັນແຫ່ງຊາດ ຫຼວງພະບາງ ອ້ອມຮອບເທດສະບານ ນະຄອນ ຫຼວງພະບາງ ແລ້ວເຂົ້າເສັ້ນໄຊຢູ່ຈຸດເລີ່ມຕົ້ນຄືເກົ່າ. ພິເສດສຳລັບປີນີ້ ໄດ້ຈັດກິດຈະກຳແລ່ນກ່ອນໜ້ານີ້ ນັບແຕ່ວັນທີ 15 ຫາ 18 ຕຸລາ ໂດຍນັກແລ່ນກຸ່ມໜຶ່ງ ມີຄວາມມຸ່ງໝັ້ນໃນການແລ່ນ ແລະເຕັມໃຈທີ່ຈະຮັບພາລະກິດ ແລ່ນແຕ່ນະຄອນຫຼວງວຽງຈັນ ຫາ ຫຼວງພະບາງ ໄລຍະທາງ 385 ກິໂລແມັດ ເພື່ອລະດົມທືນຊ່ວຍໂຮງໝໍເພື່ອນລາວສຳລັບເດັກ ໃນແຂວງຫຼວງພະບາງ ແລະຊ່ວຍຜູ້ປະສົບໄພນ້ຳຖ້ວມ ຢູ່ແຂວງພາກໃຕ້ຂອງລາວ ແລະຈະສືບຕໍ່ລະດົມທືນໄປຈົນຮອດ ວັນທີ່ 30 ຕຸລາ 2019.



ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ