• ນັກຮຽນລາວຍາດໄດ້ 2 ລາງວັນຈາກການປະກວດຮູບຖ່າຍທີ່ຍີ່ປຸ່ນ

ໂດຍ: ສີເປື້ອນມື 08 ສິງຫາ 2019 (16.57 ນ.) Read : 210

Tenkawa Laos (ເທັງຄາວາ ລາວ) ແມ່ນໂຄງການປະກວດຮູບຖ່າຍເລົ່າເລື່ອງ ທີ່ເປີດໂອກາດໃຫ້ນັກຮຽນລະດັບ ມ.ປາຍ ໃນທົ່ວປະເທດ ຜູ້ທີ່ມີພອນສະຫວັນ ແລະມັກຮັກໃນການຖ່າຍຮູບ ສົ່ງຜົນງານຮູບຖ່າຍເລົ່າເລື່ອງຂອງຕົນເອງ ເຂົ້າມາຮ່ວມແຂ່ງຂັນ ເພື່ອເປັນຕົວແທນທີມລາວ ເຂົ້າຮ່ວມການແຂ່ງຂັນຖ່າຍຮູບນາໆຊາດ ທີ່ແຂວງ ຮັອກໄກໂດ ປະເທດຍີ່ປຸ່ນ.

Tenkawa Laos ປີ 2019 ແມ່ນປີທຳອິດທີ່ຈັດຂຶ້ນ ພາຍໃຕ້ຫົວຂໍ້ຮູບຖ່າຍເລົ່າເລື່ອງ "Our Proud Community, ຊຸມຊົນທີ່ຂ້ອຍພູມໃຈ" ກະຕິກາແມ່ນ ໃຫ້ນ້ອງໆ ມ.ປາຍ ຈັບກຸ່ມກັນ 3 ຄົນ ຖ່າຍຮູບມາຄົນລະ 2 ໃບ (ລວມທັງຫມົດແມ່ນ 6 ຮູບຖ່າຍ) ເຊິ່ງແຕ່ລະຮູບຕ້ອງມີຄວາມສອດຄ້ອງ ຕໍ່ເນື່ອງ ແລະເປັນເລື່ອງລາວດຽວກັນ. ການແຂ່ງຂັນໃນປີທຳອິດ ມີນ້ອງໆນັກຮຽນຈາກທົ່ວປະເທດ ສົ່ງຜົນງານຂອງທີມຕົນເອງມາແຂ່ງຂັນ 48 ທີມ.

ຜ່ານການຄັດເລືອກຮອບສຸດທ້າຍຈາກຄະນະກຳມະການ ໃນວັນທີ 25 ພຶດສະພາ 2019, ຜົນການແຂ່ງຂັນ ແມ່ນນັກຮຽນ ທີມຊີວິດໃໝ່ ຈາກ ໂຮງຮຽນ ມສ ສັນຕິພາບ ແຂວງ ຫລວງພະບາງ ໄດ້ຮັບລາງວັນຊະນະເລີດອັນດັບທີ 1. ໃນທີມປະກອບມີ ອາຈານທີ່ປຶກສາ ອາຈານ ຢາກຸ ຈະ, ທ້າວ ຄຳຫຼ້າ ເຫຼົາ, ນາງ ຢົວ ເລົາ ແລະທາງ ໃຢລີ ເຈີຫວັງ. ອາຈານທີ່ປຶກສາ ແລະນ້ອງໆໄດ້ເປັນຕົວແທນ ທີມລາວໄປແຂ່ງຂັນຮູບຖ່າຍລະດັບນາໆຊາດ ທີ່ແຂວງ ຮັອກໄກໂດ ປະເທດຍີ່ປຸ່ນ.

ການແຂ່ງຂັນທີ່ຍີ່ປຸ່ນ ພາຍໃຕ້ຊື່ງານ The 5th Higashikawa Youth Fest (ງານແຂ່ງຂັນຮູບຖ່າຍນັກຮຽນນາໆຊາດ ຄັ້ງທີ 5 ທີ່ເມືອງ ຮິງະຊິກະວ້າ ແຂວງ ຮັອກໄກໂດ ຈັດຂຶ້ນໃນລະຫວ່າງວັນທີ 2-7 ສິງຫາ 2019 ທີ່ຜ່ານມາ. ມີນັກຮຽນທັງຫມົດ 24 ທີມ ຈາກ 22 ປະເທດເຂົ້າຮ່ວມ (ຍີ່ປຸ່ນມີ 3 ທີມ). ຕົວແທນທີມຈາກປະເທດລາວ ເຂົ້າຮ່ວມການແຂ່ງຂັນລາຍການນີ້ ເປັນຄັ້ງທຳອິດ. ການແຂ່ງຂັນແບ່ງອອກເປັນ 3 ວັນ, ນ້ອງໆນັກຮຽນຕ້ອງໄດ້ອອກທຣິບເພື່ອຖ່າຍຮູບຕາມສະຖານທີ່ຕ່າງໆທີ່ທີມງານໄດ້ຈັດສັນໄວ້ໃຫ້. ສະຖານທີ່ຖ່າຍຮູບ ມີທັງຢູ່ງານເທດສະການດອກໄມ້ໄຟ, ສະຖານທີ່ທຳມະຊາດ ແລະ ບັນຍາກາດຕົວເມືອງ. ມາຮອດວັນທີ 07 ສິງຫາ 2019 ໄດ້ມີພິທີປິດງານ ແລະປະກາດຜົນລາງວັນຢ່າງເປັນທາງການ.

ຜົນອອກມາປາກົດວ່າ ນ້ອງໆນັກຮຽນສາມາດຍາດມາໄດ້ 2 ລາງວັນ. ຄື: 1. ລາງວັນຊະນະເລີດອັນດັບທີ 3 ລາງວັນ, ລາງວັນ Hokko Gakuen Award ປະເພດບຸກຄົນ. ເຊິ່ງມອບລາງວັນໂດຍ ຕ່າງຫນ້າໂຮງຮຽນ Higashikawa (ໂຮງຮຽນທີ່ຈັດງານ) 2. ລາງວັນ Students and Teachers’ Choice Award ເປັນລາງວັນທີ່ໄດ້ຮັບການໂຫວດຫຼາຍທີ່ສຸດໂດຍອາຈານ ແລະນັກຮຽນທີ່ເຂົ້າຮ່ວມໂຄງການທັງຫມົດ ທີ່ໂຫວດໃຫ້ຜົນງານຮູບຖ່າຍທີ່ເຂົາເຈົ້າມັກ ແລະປະທັບໃຈທີ່ສຸດ. ເຊິ່ງທັງສອງລາງວັນນີ້ ແມ່ນຜົນງານຂອງ ທ້າວ ໃຢລີ ເຈີຫວັງ.

ສໍາລັບນ້ອງໆນັກຮຽນ ມໍປາຍ ທີ່ມັກໃນການຖ່າຍຮູບ ແລະສົນໃຈຢາກເຂົ້າຮ່ວມແຂ່ງຂັນ ສາມາດຕິດຕາມການເຄື່ອນໄຫວຂອງໂຄງການໄດ້ ຜ່ານ Facebook: Tenkawalaos ( ຫລື Let’s Go to Hokkaido Laos High School Student Photography Contest). ທຸກການສະໝັກບໍ່ໄດ້ເສຍຄ່າໃຊ້ຈ່າຍໃດໆທັງນັ້ນ.




ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ