• ແຂ່ງຂັນລົດໃຫຍ່ອ໊ອບໂຣດນາໆຊາດ ຊີງຂັນລັດຖະມົນຕີ

ໂດຍ: ສີເປື້ອນມື 08 ກໍລະກົດ 2019 (14.17 ນ.) Read : 266

ໃນວັນທີ 05 ກໍລະກົດ 2019 ທີ່ຜ່ານມາ ທາງສະຫະພັນ ກີລາລົດໃຫຍ່ ແລະລົດຈັກ ແຫ່ງຊາດລາວ ຮ່ວມກັບ ກະຊວງສຶກສາທິການ ແລະ ກີລາ ໄດ້ຈັດພິທີຖະແຫຼງຂ່າວແຂ່ງຂັນລົດໃຫຍ່ "ອ໊ອບໂຣດນາໆຊາດ" ຊີງຂັນລັດຖະມົນຕີກະຊວງສຶກສາທິການ ແລະ ກີລາ ປະຈໍາປີ 2019  ທີ່ສະໂມສອນໂອແລມປິກແຫ່ງຊາດລາວ. ໃຫ້ກຽດເຂົ້າຮ່ວມໂດຍ: ທ່ານ ບົວລານ ສີລິປັນຍາ ຮອງລັດຖະມົນຕີກະຊວງສຶກສາທິການ ແລະ ກີລາ, ທ່ານ ແສງພອນ ພົນອາມາດ ຫົວໜ້າກົມກີລາລະດັບສູງ, ທ່ານ ສົມພອນ ສະຫວັດວິພານ ປະທານສະຫະພັນກີລາ ລົດໃຫຍ່ ແລະລົດຈັກ ແຫ່ງຊາດລາວ ແລະບັນດາແຂກຖືກເຊີນ ແລະພາກສ່ວນກ່ຽວຂ້ອງ.

ການແຂ່ງຂັນກີລາລົດໃຫຍ່ອ໊ອບໂຣດນາໆຊາດໃນປີນີ້ ຈະຈັດຂຶ້ນໃນລະຫວ່າງວັນທີ 5-11 ສິງຫາ 2019 ຢູ່ທີ່ເຂດເສດຖະກິດສະເພາະບຶງທາດຫຼວງ ເມືອງ ໄຊເສດຖາ ນະຄອນຫຼວງວຽງຈັນ. ການແຂ່ງຂັນ ລວມມີ 6 ລຸ້ນຄື: ລຸ້ນວີໄອພີ (VIP), ປີກນົກ, ຄານແຂງ, ທ່ຽວປ່າທົ່ວໄປ, ທ່ຽວປ່າໂອເພັນ ແລະຊຸບເປີໂອເພັນ.

ສ່ວນລາງວັນ ລຸ້ນ VIP ອັນດັບ 1-5 ຈະໄດ້ຮັບຂັນລາງວັນ ພ້ອມຫຼຽນລາງວັນ (ບໍ່ມີເງິນລາງວັນ), ລຸ້ນປີກນົກ ມີ 5 ຂັນລາງວັນ 5 ຫຼຽນລາງວັນ ພ້ອມເງິນລາງວັນອັນດັບທີ 1 ໄດ້ຮັບເງິນ 1.000 ໂດລາ, ອັນດັບທີ 2 ໄດ້ຮັບເງິນ 500 ໂດລາ, ອັນດັບທີ 3 ໄດ້ຮັບເງິນ 300 ໂດລາ, ອັນດັບທີ 4 ໄດ້ຮັບເງິນ 150 ໂດລາ ແລະອັນດັບທີ 5 ໄດ້ຮັບເງິນ 100 ໂດລາ ແລະລຸ້ນຄານແຂງ ແລະລຸ້ນທ່ຽວປ່າທົ່ວໄປ ລາງວັນແມ່ນຄືກັນກັບລຸ້ນປີກນົກ. ສ່ວນລຸ້ນທ່ຽວປ່າໂອເພັນ ແລະລຸ້ນຊຸບເປີໂອເພັນລວມມີ 5 ຂັນລາງວັນ 5 ຫຼຽນລາງວັນ ອັນດັບທີ 1 ຈະໄດ້ຮັບເງິນ 1.400 ໂດລາ, ອັນດັບທີ 2 ໄດ້ຮັບເງິນ 700 ໂດລາ, ອັນດັບທີ 3 ໄດ້ຮັບເງິນ 300 ໂດລາ, ອັນດັບທີ 4 ໄດ້ຮັບເງິນ 200 ໂດລາ ແລະອັນດັບທີ 5 ໄດ້ຮັບເງິນມູນຄ່າ 100 ໂດລາ.

ການຈັດງານຄັ້ງນີ້ ນອກຈາກເປັນການສ້າງຂະບວນການແຂ່ງຂັນກີລາ ເພື່ອຕ້ອນຮັບວັນສໍາຄັນຕ່າງໆຂອງຊາດແລ້ວ ຍັງເປັນການຖອດຖອນບົດຮຽນຂອງບັນດານັກກີລາ (ລະຫວ່າງນັກກີລາໃນລາວກັບນັກກີລາຕ່າງປະເທດ) ທັງເປັນການສ້າງກີລາປະເພດນີ້ ໃຫ້ເປັນທີ່ຮູ້ຈັກກັນຫຼາຍຂຶ້ນເພື່ອກ້າວໄປສູ່ການແຂ່ງຂັນໃນລະດັບພາກພື້ນກໍຄືສາກົນ.




ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ