• ປະກາດຈັດຕັ້ງ ສະຫະພັນຄິກບອກຊິງແຫ່ງຊາດລາວ

ໂດຍ: ສີເປື້ອນມື 04 ກໍລະກົດ 2019 (13.33 ນ.) Read : 166

ໃນວັນທີ 03 ກໍລະກົດ 2019 ທີ່ຜ່ານມາ ໄດ້ມີການຈັດງານຖະແຫຼງຂ່າວປະກາດຈັດຕັ້ງ ສະຫະພັນຄິກບອກຊິງແຫ່ງຊາດລາວ ທີ່ຫ້ອງປະຊຸມຄະນະກໍາມະການໂອແລັມປິກແຫ່ງຊາດ. ໃຫ້ກຽດເຂົ້າຮ່ວມໄດ້ແກ່: ທ່ານ ບົວລານ ສີລິປັນຍາ ຮອງລັດຖະມົນຕີ ກະຊວງສຶກສາທິການ ແລະ ກີລາ,​ ທ່ານ ຊົມພູ ພົງສາ ຮອງປະທານ ແລະ ເລຂາທິການ ຄະນະກໍາມະການໂອແລັມປິກແຫ່ງຊາດ,​ ທ່ານ ວັນນະເດດ ແກ້ວວຽງຄໍາ ປະທານສະຫະພັນຄິກບອກຊິງແຫ່ງຊາດລາວ, ທ່ານ ສຸລີ ມີລະໄມ ຮອງປະທານ ສະຫະພັນຄິກບອກຊິງແຫ່ງຊາດລາວ ແລະທ່ານ ແສງພອນ ພົນອາມາດ ຫົວໜ້າກົມກີລາລະດັບສູງ ພ້ອມດ້ວຍບັນດາສະໂມສອນຄ້າຍມວຍຕ່າງໆ.

ກີລາຄິກບອກຊິງ ເປັນກີລາຕໍ່ສູ້ປ້ອງກັນຕົວປະເພດໜຶ່ງທີ່ມີລັກສະນະການເຝິກຊ້ອມ, ການສະແດງ, ແຂ່ງຂັນທີ່ມີເຕັກນິກ ແລະຍຸດທະວິທີຄ້າຍຄື ແລະມີຄວາມແຕກຕ່າງກັນກັບມວຍລາວ, ຄາຣາເຕ້, ເທຄວັນໂດ້ ໃນປະເພດຟ້ອນ ແລະປະເພດຕໍ່ສູ້ ເປັນປະເພດກີລາມີສະຫະພັນຄິກບອກຊິງໂລກເປັນອົງກອນ ເອີ້ນວ່າ: WAKO (World Association of Kickboxing Organization) ແລະສະຫະພັນຄິກບອກຊິງອາຊີທະວີບ (Continental WAKO), ສ່ວນສະຫະພັນຄິກບອກຊິງອາຊີ ເອີ້ນວ່າ: WAKO ASIA ເຊິ່ງໄດ້ຈົດທະບຽນກັບ Sport Accord ແລະຮັບຮູ້ໂດຍ ຄະນະກໍາມະການໂອແລັມປິກສາກົນ (National of Olympic Committee-IOC). ປະເພດກີລານີ້ ປະກອບມີ 7 ລາຍການແຂ່ງຂັນ ເຊິ່ງລາຍການທີ່ໂດດເດັ່ນ ແລະມີຊື່ສຽງແມ່ນ ລາຍການ K-1 ທີ່ປະເທດຍີ່ປຸ່ນເປັນຜູ້ສ້າງຂຶ້ນ ແລະໃນປີ 2013 ໄດ້ຖືກບັນຈຸເຂົ້າໃນການແຂ່ງຂັນກີລາອາຊຽນເກມ ແລະໃນປີ 2019 ໄດ້ຖືກບັນຈຸເຂົ້າການແຂ່ງຂັນກີລາຊີເກມ ທີ່ປະເທດຟີລິບປິນ.

ສະຫະພັນຄິກບອກຊິງແຫ່ງຊາດລາວ ໄດ້ຖືກຮັບຮູ້ການເປັນສະມາຊິກຈາກສະຫະພັນກີລາຄິກບອກຊິງອາຊີ ຕັ້ງແຕ່ປີ 2013 ໂດຍການເຫັນດີຈາກກະຊວງສຶກສາທິການ ແລະ ກີລາ ແລະການສະເໜີຂອງຄະນະກໍາມະການໂອແລັມປິກແຫ່ງຊາດລາວ. ຍ້ອນການກະກຽມຄວາມພ້ອມບໍ່ທັນພຽງພໍ ໂດຍສະເພາະແມ່ນການລວມຕົວຂອງຄະນະປະທານ, ບຸກຄະລາກອນປະຕິບັດໜ້າທີ່ ແລະງົບປະມານຍັງບໍ່ທັນຕອບສະໜອງໄດ້ ຈຶ່ງເຮັດໃຫ້ການເຄື່ອນໄຫວຍັງບໍ່ທັນໄດ້ດີ. ເຖິງຢ່າງໃດກໍຕາມ, ໃນລະຫວ່າງນັ້ນພວກເຮົາກໍຈະໄດ້ຈັດບາງກິດຈະກໍາ ເພື່ອໃຫ້ສັງຄົມໄດ້ຮັບຮູ້ກ່ຽວກັບກີລາບັອກຊິງ ເຊິ່ງມາຮອດປັດຈຸບັນນີ້ ບັນດາສະໂມສອນກີລາ, ບຸກຄະລາກອນກີລາ ແລະນັກກີລາ ໄດ້ຮັບຮູ້ຫຼາຍຂຶ້ນ ແລະມີຄວາມສົນໃຈທີ່ຈະເຂົ້າຮ່ວມພັດທະນາ. ກີລາບອກຊິງລາວກາຍເປັນອາຊີບໜຶ່ງທີ່ປະກອບສ່ວນໃນການພັດທະນາເສດຖະກິດ ແລະສັງຄົມຢ່າງຍືນຍົງ.




ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ