• ຄັດເລືອກບານເຕະເຍົາວະຊົນ ໄປສູນເຝິກ Allianz Explorer Camp 2019

ໂດຍ: ສີເປື້ອນມື 03 ກໍລະກົດ 2019 (14.49 ນ.) Read : 140

ໃນວັນທີ 02 ກໍລະກົດ 2019 ທີ່ຜ່ານມາ ທາງສະຫະພັນກີລາບານເຕະແຫ່ງຊາດລາວ ຮ່ວມກັບ ບໍລິສັດ ອາລິອັນສ໌ ປະກັນໄພລາວ ໄດ້ຈັດງານຖະແຫຼງຂ່າວ ເພື່ອເປີດຮັບສະໝັກນັກກີລາຮຸ້ນເຍົາວະຊົນລາວ ທີ່ມີອາຍຸລະຫວ່າງ 14-16 ປີ ເຂົ້າຮ່ວມໃນໂຄງການ “Allianz Explorer Camp 2019” ໃຫ້ກຽດເຂົ້າຮ່ວມໄດ້ແກ່: ທ່ານ ນາງ ກັນຍາ ແກ້ວມະນີ ເລຂາທິການສະຫະພັນບານເຕະແຫ່ງຊາດລາວ, ທ່ານ ບຸນຖົມ ລໍມະນີ ຮອງຜູ້ອໍານວຍການ ບໍລິສັດ ອາລິອັນສ໌ ປະກັນໄພລາວ, ທ່ານ ໄພຍະເອກ ທໍາມະນາມ ຫົວໜ້າພະແນກການຄ້າ-ການຕະຫຼາດ ບໍລິສັດ ອາລິອັນສ໌ ປະກັນໄພລາວ ແລະທ່ານ ສອນໄຊ ພັນນະໄຊ ອະດີດຕົວແທນປະເທດລາວ ເຂົ້າຮ່ວມງານ Allianz Junior Football Camp 2018 ພ້ອມດ້ວຍບັນດາພະນັກງານ ບໍລິສັດ ອາລິອັນສ໌ ປະກັນໄພລາວ ແລະເຕັກນິກຈາກສະຫະພັນບານເຕະ.

ໂຄງການ Allianz Explorer Camp 2019 ຈັດຂຶ້ນໂດຍກຸ່ມບໍລິສັດ ອາລິອັນສ໌ ຈຸດປະສົງແມ່ນເພື່ອສົ່ງເສີມໃຫ້ເຍົາວະຊົນມີຄວາມກ້າທີ່ຈະສະແຫວງຫາທັກສະ, ປະສົບການໃໝ່ ແລະມີຄວາມໝັ້ນໃຈໃນການຄົ້ນພົບສິ່ງທີ່ຕົນເອງໄຝ່ຝັນ. ເຊິ່ງໂຄງການດັ່ງກ່າວໄດ້ຖືກຈັດຂຶ້ນເປັນປີທີ 11 ໂດຍໄດ້ຮ່ວມມືກັບ ສະໂມສອນບາເຢິນມິວນິກ ເພື່ອຄັດເລືອກເອົາເຍົາວະຊົນທີ່ມີຄວາມມັກ ແລະມີພອນສະຫວັນໃນກີລາບານເຕະທົ່ວໂລກ ໃນຂົງເຂດທີ່ມີບໍລິສັດ ອາລິອັນສ໌ ດໍາເນີນທຸລະກິດຢູ່ ເຊິ່ງປະເທດທີ່ມີເຄືອຂ່າຍຂອງກຸ່ມບໍລິສັດ ອາລິອັນສ໌ ປະກອບມີ: ຈີນ, ອິນໂດເນເຊຍ, ມາເລເຊຍ, ໄທ, ສິງກະໂປ, ລາວ, ສີລັງກາ, ໃຕ້ຫວັນ ແລະຟີລິບປິນ.

ໂຄງການ Allianz Explorer Camp 2019 ຈະແບ່ງອອກເປັນ 2 ຄ້າຍເຝິກຊ້ອມ ຄື: Allianz Explorer Asia Camp 2019 ຈະເປັນເຍົາວະຊົນຈາກຂົງຈາກຂົງເຂດ ອາຊີ-ປາຊີຟິກ ເຊິ່ງຈະໄດ້ຈັດຂຶ້ນໃນລະຫວ່າງ ວັນທີ 23-26 ກໍລະກົດ 2019 ທີ່ປະເທດ ສິງກະໂປ ແລະ Allianz Explorer Global Camp 2019 ເປັນການຄັດເລືອກເອົາຜູ້ຊະນະເລີດຂອງແຕ່ລະປະເທດໃນ Asia Camp ໄປຮ່ວມເຝິກຊ້ອມທີ່ເມືອງ ມິວນິກ ປະເທດເຢຍລະມັນ ໃນລະຫວ່າງ ວັນທີ 22-27 ສິງຫາ 2019.

ສໍາລັບປະເທດລາວເຮົາ ໂຄງການ Allianz Explorer Camp 2019 ໄດ້ຈັດຂຶ້ນເປັນປີທີ 3 ເຊິ່ງເປັນການເປີດກວ້າງໃຫ້ເຍົາວະຊົນລາວທົ່ວປະເທດ ບໍ່ວ່າຈະເປັນຍິງ ຫຼືຊາຍ ກໍສາມາດເຂົ້າຮ່ວມຄັດເລືອກໄດ້. ຄົນທີ່ຊະນະເລີດ ຈະໄດ້ເປັນຕົວແທນປະເທດລາວ ເຂົ້າຮ່ວມໂຄງການ Allianz Explorer Asia Camp 2019 ແລະພິເສດສຸດແມ່ນ ໜຶ່ງໃນສອງຄົນນີ້ຈະມີໂອກາດໄປຮ່ວມຄ້າຍເຝິກຊ້ອມກັບ ສະໂມສອນບາເຢິນມິວນິກ ທີ່ປະເທດເຢຍລະມັນ.

ເງື່ອນໄຂຂອງຜູ້ເຂົ້າສະໝັກ ມີດັ່ງນີ້:

-    ຜູ້ທີ່ມີອາຍຸລະຫວ່າງ 14-16 ປີເຕັມ ບໍ່ຈໍາກັດເພດ (ກຽມຮູບຖ່າຍມາມື້ສະໝັກດ້ວຍ).

-    ສັນຊາດລາວ.

-    ມີຄວາມມັກຮັກໃນກິລາບານເຕະ.

-    ມີທັກສະດ້ານພາສາອັງກິດໃນຂັ້ນເລີ່ມຕົ້ນ.

-    ສໍາເນົາບັດປະຈໍາຕົວ ແລະປຶ້ມສໍາມະໂນຄົວ ຫຼືເອກະສານທີ່ຢັ້ງຢືນການເກີດໄດ້.

ສໍາລັບຊ່ອງທາງໃນການສະໝັກ ສາມາດລົງທະບຽນໄດ້ລ່ວງໜ້າ ເພື່ອກວດສອບເອກະສານກ່ອນຜ່ານທາງເຟສບຸກຂອງ ບໍລິສັດ ອາລິອັນສ໌ ປະກັນໄພລາວ ໂດຍການພິມ @agl.allianz ຫຼືຈະມາລົງທະບຽນດ້ວຍຕົນເອງໃນມື້ຄັດເລືອກ ວັນທີ 06 ກໍລະກົດ 2019 ທີ່ເດີນເຕະບານຂອງສະຫະພັນບານເຕະແຫ່ງຊາດລາວ ທີ່ບ້ານ ຫ້ວຍຫົງ ເມືອງ ຈັນທະບູລີ ນະຄອນຫຼວງວຽງຈັນ. ເລີ່ມຕັ້ງແຕ່ເວລາ 6 ໂມງເຊົ້າເປັນຕົ້ນໄປ ພ້ອມທັງຮັບຂອງທີ່ລະນຶກຈາກບໍລິສັດ ອາລິອັນສ໌ ປະກັນໄພລາວ.




ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ