• ເຄັດລັບໃນການເອົາຊະນະໃຈແມ່ຂອງຄົນຮັກ

ໂດຍ: Admin Mahason 02 ກໍລະກົດ 2019 (11.04 ນ.) Read : 296

     ບັນຫາແມ່ຂອງຄົນຮັກ ເປັນບັນຫາໃຫຍ່ລະດັບໂລກ ບໍ່ວ່າທ່ານຈະເກີດຢູ່ໃສ ແລະຮຽນຮູ້ວັດທະນະທໍາແບບໃດ ບັນຫາແມ່ຂອງຄົນຮັກ ກໍສາມາດເກີດຂຶ້ນກັບທ່ານໄດ້ສະເໝີ. ສໍາລັບສາວໆຄົນໃດທີ່ພົບແມ່ຂອງຄົນຮັກທີ່ດີ ແລະມັກຮັກໃນຕົວຂອງເຮົາກໍຖືວ່າໂຊກດີໄປ ແຕ່ເຊື່ອວ່າຍັງມີອີກຫຼາຍຄົນທີ່ຕ້ອງເຈັບຫົວກ່ຽວກັບເລື່ອງແມ່ຂອງຄົນຮັກຢູ່ເປັນປະຈໍາ ແລ້ວເຮົາຈະມີວິທີເອົາຊະນະໃຈເຂົາໄດ້ແນວໃດ?
1. ເປັນຄົນມີມາລະຍາດ: ເວລາພົບຜູ້ໃຫຍ່ເຮົາຕ້ອງຍົກມືສະບາຍດີເສຍກ່ອນ, ໄປມາລາຄອບທຸກຄັ້ງ ແລະບໍ່ວ່າຈະເຮັດຫຍັງຢູ່ຕໍ່ໜ້າຄົນຮັກ ເຮົາກໍຕ້ອງປະພຶດຕົວເປັນຜູ້ຍິງແນ່ກໍດີ, ບໍ່ວ່າຈະເຮັດຫຍັງກໍຕ້ອງໃຫ້ກຽດຜູ້ໃຫຍ່ ແລະສະຖານທີ່, ອ່ອນນ້ອນຖ່ອມຕົນໃຫ້ຜູ້ໃຫຍ່ເຫັນໃຈເຮົາ ແລະການເປັນຄົນດີມີມາລະຍາດ ຈະເຮັດໃຫ້ເພິ່ນ ບໍ່ມີສິ່ງທີ່ຈະຕໍາໜິເຮົາໄດ້.
2. ມັກຊື້ເຄື່ອງໄປຕ້ອນ: ການຊື້ເຄື່ອງຝາກເຄື່ອງຕ້ອນໄປໃຫ້ເພິ່ນ ກໍເປັນອີກວິທີໜຶ່ງທີ່ຈະເອົາຊະນະໃຈແມ່ຂອງຄົນຮັກໄດ້ງ່າຍໆ ແຕ່ກ່ອນຈະຊື້ຫຍັງໄປ ຄວນທີ່ຈະສືບຖາມຄົນຮັກກ່ອນວ່າ ແມ່ຂອງລາວມັກ ແລະບໍ່ມັກຫຍັງ. ເວລາເຮົາໄປທ່ຽວຕ່າງແຂວງ ຫຼືຕ່າງປະເທດ ແລ້ວມີເຄື່ອງຝາກມາຕ້ອນເພິ່ນເປັນປະຈໍາ ຈະເຮັດໃຫ້ເພິ່ນປະທັບໃຈໃນຕົວເຮົາ.
3. ຊ່ວຍເຮັດວຽກເຮືອນ: ສໍາລັບສາວໆຄົນໃດທີ່ມັກໄປເຮືອນຄົນຮັກຢູ່ເປັນປະຈໍາ ຖ້າວ່າງໆກໍຄວນທີ່ຈະຊ່ວຍເຮັດວຽກເຮືອນກໍຈະເປັນການເກັບຄະແນນອີກທາງໜຶ່ງ ບໍ່ວ່າຈະເປັນການກວດເຮືອນ, ລ້າງຖ້ວຍ-ລ້າງຈານ, ໜຶ້ງເຂົ້າ, ແຕ່ງກິນ... ກໍລ້ວນແຕ່ເປັນວຽກທີ່ຜູ້ຍິງຖະນັດຢູ່ແລ້ວ ຍິ່ງໃນຕອນທີ່ເພິ່ນວຽກຫຼາຍ ເຮົາຕ້ອງຮີບເຂົ້າໄປເຮັດຊ່ວຍ ເພາະນີ້ເປັນໂອກາດທີ່ເຮົາຈະໄດ້ສານຄວາມສໍາພັນ ແລະໂອ້ລົມກັນໄດ້ຫຼາຍຍິ່ງຂຶ້ນ.
4. ພາເພິ່ນໄປທ່ຽວ: ເມື່ອຄົບຫາກັບລູກຊາຍເພິ່ນ ຢ່າມົວແຕ່ເອົາໃຈໃສ່ກັນແຕ່ສອງຄົນ ບາງເວລາກໍຄວນຊວນແມ່ ຫຼືຄອບຄົວຂອງຄົນຮັກໄປທ່ຽວຫຼິ້ນນໍາກັນໃນເທສະການຕ່າງໆ. ບາງທີການທີ່ເຮົາຊວນລູກຊາຍເພິ່ນໄປຫຼິ້ນລໍາພັງຫຼາຍເກີນໄປ ເພິ່ນອາດຈະບໍ່ມັກ. ດັ່ງນັ້ນ, ເຮົາບໍ່ຕ້ອງເຮັດໃຫ້ເພິ່ນຮູ້ສຶກແບບນັ້ນ ແຕ່ເຮັດໃຫ້ເພິ່ນຮູ້ສຶກວ່າ ມີລູກສາວເພີ່ມມາອີກຄົນໜຶ່ງ.
5. ບໍ່ຫວານໃສ່ກັນຕໍ່ໜ້າຜູ້ໃຫຍ່: ເຂົ້າໃຈວ່າທຸກຄົນກໍຕ້ອງຢາກມີໂມເມັ້ນແບບກອດ, ຫອມແກ້ມ ແລະກຸກກິກກັບຕາມສະໄຕລ໌ການເປັນແຟນກັນ ເຊິ່ງມັນກໍເປັນເລື່ອງປົກກະຕິບໍ່ໄດ້ຜິດຫຍັງ ພຽງແຕ່ວ່າ ເວລາຢູ່ຕໍ່ໜ້າຜູ້ໃຫຍ່ ບໍ່ວ່າຈະເປັນແມ່ຂອງເຮົາ ຫຼືແມ່ຂອງຄົນຮັກ ເຮົາກໍຕ້ອງມີຂອບເຂດ ບໍ່ດັ່ງນັ້ນ, ເຮົາອາດຈະຖືກເບິ່ງໃນແງ່ລົບໄດ້. ສະນັ້ນ, ເມື່ອຢູ່ຕໍ່ໜ້າແມ່ຂອງຄົນຮັກແນະນໍາໃຫ້ລົມກັນຄືທໍາມະດາກໍພໍ.
6. ຫ້າມຜິດຖຽງກັນໃຫ້ເພິ່ນເຫັນ: ສິ່ງນີ້ເປັນສິ່ງສໍາຄັນຫຼາຍ ເພາະການຜິດຖຽງກັນຕໍ່ໜ້າເພິ່ນ ຈະເຮັດໃຫ້ເຮົາເສຍພາບພົດ ແນ່ນອນວ່າເວລາຜິດຖຽງກັນ ມັນຈະຕ້ອງມີຄໍາເວົ້າທີ່ບໍ່ສຸພາບຫຼຸດອອກມານໍາ ແລະຍິ່ງເຮົາໄປດ່າລູກເພິ່ນໃຫ້ເພິ່ນເຫັນ ຈະເຮັດໃຫ້ເພິ່ນຮູ້ສຶກບໍ່ມັກເຮົາ.
7. ຖາມໄຖ່ສະບາຍດີ: ອີກຂັ້ນໜຶ່ງຂອງການສ້າງຄວາມສະໜິດສະໜົມ ກໍຄືການເປັນຫ່ວງເປັນໃຍຄືກັບຄົນໃນຄອບຄົວຂອງເຮົາ, ຖາມໄຖ່ຂ່າວຄາວດ້ວຍຄວາມຈິງໃຈ ບໍ່ແມ່ນທັກທາຍຕາມມາລະຍາດ ຈະເຮັດໃຫ້ເພິ່ນຮູ້ສຶກວ່າເຮົາໃສ່ໃຈເພິ່ນ.
8. ເຂົ້າໃຈຄອບຄົວເຂົາ: ແຕ່ລະເຮືອນຈະມີປະເພນີຄວາມລຶ້ງເຄີຍທີ່ແຕກຕ່າງກັນ ເຊັ່ນ: ບາງເຮືອນອາດຈະກິນເຂົ້າແຕ່ເວັນ, ບາງເຮືອນອາດຈະກິນເຂົ້າເດິກ ແລະມີອີກຫຼາຍສິ່ງທີ່ເຈົ້າຂອງເຮືອນເພິ່ນໄດ້ກໍານົດ. ດັ່ງນັ້ນ, ເຮົາຕ້ອງສຶກສາເພື່ອທໍາຄວາມເຂົ້າໃຈ ແລະປັບຕົວໃຫ້ເຂົ້າກັບເພິ່ນໃຫ້ໄດ້.




ທີ່ມາ:
  • ແທັກທີ່ກ່ຽວຂ້ອງ