• ບຸນມະໂຫລານ ສົ່ງເສີມການອ່ານ ນະຄອນຫຼວງວຽງຈັນ ຄັ້ງທີ 1

ໂດຍ: ສີເປື້ອນມື 01 ມີນາ 2019 (13.56 ນ.) Read : 173

ໃນວັນທີ 01 ມີນາ 2019 ໄດ້ຈັດງານຖະແຫຼງຂ່າວການຈັດງານບຸນມະໂຫລານ ສົ່ງເສີມການອ່ານ ນະຄອນຫຼວງວຽງຈັນ ຄັ້ງທີ 1 ທີ່ຫ້ອງຮັບແຂກຫ້ອງວ່າການປົກຄອງນະຄອນຫຼວງ. ພາຍໃຕ້ການເຂົ້າຮ່ວມຂອງທ່ານ ສົມພອນ ສອນດາລາ ຮອງຫົວໜ້າພະແນກ ສຶກສາທິການ ແລະ ກີລາ, ທ່ານ ວຽງສະໄໝ ພາສະເຫຼີມສຸກ ຮອງຫົວໜ້າຫ້ອງວ່າການ ນະຄອນຫຼວງ, ທ່ານ ພອນຈັນ ແພງພູວັນ ຮອງຫົວໜ້າພະແນກ ຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ພ້ອມດ້ວຍຄະນະຮັບຜິດຊອບຈັດງານ.

ຈຸດປະສົງຂອງການຈັດງານແມ່ນເພື່ອເປັນການປຸກລະດົມໃຫ້ຄົນລາວ ເລັງເຫັນເຖິງຄວາມສໍາຄັນຂອງການອ່ານ ແລະສົ່ງເສີມການອ່ານໜັງສືຢ່າງຕໍ່ເນື່ອງ ລວມເຖິງການຊ່ວຍເຫຼືອຂອງພໍ່-ແມ່ຜູ້ປົກຄອງ, ຄູ-ອາຈານ ແລະບັນນາລັກຮັບຮູ້, ມີຄວາມເຂົ້າໃຈເຕັກນິກວິທີການສົ່ງເສີມການອ່ານແກ່ເດັກ ແລະເຍົາວະຊົນຢ່າງເໝາະສົມ. ພາຍໃນງານຈະມີການວາງສະແດງສື່ສິ່ງພິມຕ່າງໆ ເປັນຕົ້ນແມ່ນປຶ້ມອ່ານ ພາຍໃນງານຈະມີຫຼາຍກວ່າ 200 ບູ໊ດ, ມີກິດຈະກໍາຖາມ-ຕອບ, ແຈກຢາຍປຶ້ມ ໃຫ້ແກ່ການນໍາພັກ-ລັດ ແລະໂຮງຮຽນທົ່ວນະຄອນຫຼວງວຽງຈັນ ເຊິ່ງຜູ້ເຂົ້າຮ່ວມຈະໄດ້ພົບກັບນັກຂຽນ, ນັກແຕ່ງ ແລະນັກເວົ້າທີ່ມີປະສົບການສູງຈາກພາຍໃນ ແລະຕ່າງປະເທດ ຄາດວ່າຈະມີຜູ້ເຂົ້າຮ່ວມປະມານ 5000-10,000 ຄົນຕໍ່ມື້.

ບຸນມະໂຫລານ ສົ່ງເສີມການອ່ານ ນະຄອນຫຼວງວຽງຈັນ ຄັ້ງທີ 1 ຈະໄດ້ຈັດຂຶ້ນໃນລະຫວ່າງວັນທີ 07 – 17 ມີນາ 2019 ທີ່ລານກາງແຈ້ງດ້ານໜ້າຂອງສູນການຄ້າສາກົນ (World Trade Center) ຖະໜົນຄູວຽງ ເລີ່ມຕັ້ງແຕ່ເວລາ 09:00 ໂມງ ຫາ 21:30 ໂມງ (ສະເພາະວັນສຸກ-ອາທິດ ປິດ 22:30 ໂມງ).


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ