• ຫຼາຍບັນຫາດ້ານການສຶກສາທີ່ ສະຫວັນນະເຂດ ຈະຕ້ອງແກ້ໄຂໃຫ້ໄດ້

ໂດຍ: ສີເປື້ອນມື 28 ກຸມພາ 2019 (14.29 ນ.) Read : 204

ເພື່ອເປັນການທົບທວນຄືນໝາກຜົນຂອງການຈັດຕັ້ງປະຕິບັດວຽກງານການສຶກສາໃນໄລຍະຜ່ານມາ ເພື່ອຊອກໃຫ້ເຫັນຈຸດດີ, ຈຸດອ່ອນ, ຂໍ້ຄົງຄ້າງ ແລະບົດຮຽນທີ່ຖອດຖອນໄດ້ສະນັ້ນ, ໃນວັນທີ 22 ກຸມພາຜ່ານມານີ້, ພະແນກສຶກສາທິການ ແລະກີລາແຂວງ ສະຫວັນນະເຂດ ຈິ່ງໄດ້ຈັດກອງປະຊຸມຜູ້ບໍລິຫານການສຶກສາພາກຮຽນທີ I ທົ່ວແຂວງປີ 2018 ແລະວາງແຜນວຽກຈຸດສຸມໃນພາກຮຽນທີ II ປີ 2019 ຂຶ້ນທີ່ຫ້ອງປະຊຸມພະແນກການດັ່ງກ່າວ ພາຍໃຕ້ການເປັນກຽດເຂົ້າຮ່ວມຂອງທ່ານ ນາງ ຫຼິງທອງ ແສງຕາວັນ ກຳມະການພັກແຂວງຫົວໜ້າພະແນກສຶກສາທິການ ແລະກີລາ, ມີຄະນະພະແນກ, ຫົວໜ້າ ຂະແໜງອ້ອມຂ້າງພະແນກ, ຫົວໜ້າຫ້ອງການສຶກສາທິການ-ກີລາ, ຜູ້ອຳນວຍການໂຮງຮຽນ, ຫົວໜ້າສູນ ແລະພະນັກງານວິຊາການກ່ຽວຂ້ອງເຂົ້າຮ່ວມ.
      ທ່ານຫົວໜ້າພະແນກສຶກສາທິການ ແລະກີລາແຂວງ ໄດ້ກ່າວໃຫ້ຮູ້ວ່າ: ກອງປະຊຸມຄັ້ງນີ້ ພວກເຮົາແມ່ນຈະໄດ້ທົບທວນຄືນກ່ຽວກັບຜົນສຳເລັດ, ບັນຫາ ແລະຂໍ້ຄົງຄ້າງໃນການຈັດຕັ້ງປະຕິບັດວຽກງານໃນພາກຮຽນ I ຜ່ານມາ, ເຊິ່ງໃນສົກຮຽນນີ້, ຄະນະພັກ-ອຳນາດການປົກຄອງແລະຜູ້ບໍລິຫານການສຶກສາ ແຕ່ລະຂັ້ນ ໄດ້ປະກອບສ່ວນຢ່າງຕັ້ງໜ້າໃນການຈັດຕັ້ງປະຕິບັດແຜນການສຶກສາ ກໍຄືເປົ້າໝາຍການພັດທະນາການສຶກສາ (SDG4) ໃນ 15 ເປົ້າໝາຍແມ່ນສາມາດບັນລຸໄດ້ 4 ຄາດ ໝາຍຄື: ອັດຕາເຂົ້າຮຽນຂອງເດັກໃນເກນອາຍຸ 5 ປີ, ອັດຕາເຂົ້າຮຽນໃໝ່ສຸດທິຊັ້ນປະຖົມ, ອັດຕາປະລະຫ້ອງປ.1 ແລະບັນດາເມືອງທີ່ບັນລຸອັດຕາເຂົ້າຮຽນລວມໃໝ່ຮອດ ຂັ້ນ ປ.5 ສູງກວ່າ 95% ໄດ້12 ເມືອງ ແລະມີ 2 ຄາດໝາຍໃກ້ຈະບັນລຸເປັນຕົ້ນ: ອັດຕາເຂົ້າຮຽນລວມຊັ້ນມັດທະຍົມຕອນຕົ້ນ ແລະມັດທະຍົມຕອນປາຍ. ຄຽງຄູ່ກັນນີ້, ພວກເຮົາກໍ່ຍັງມີຂໍ້ຄົງຄ້າງ ແລະສິ່ງທ້າທາຍ ທີ່ຈະຕ້ອງໄດ້ປັບປຸງແກ້ໄຂໃນຕໍ່ໜ້ານີ້ເປັນຕົ້ນບັນຫາການປະລະຂັ້ນ ປ.1 ທີ່ຍັງມີໂຕເລກຍັງສູງຢູ່ ເຊິ່ງທົ່ວແຂວງກວມ 7,6% ນອກນີ້, ແມ່ນບັນຫາ ການຄ້າງຫ້ອງຂອງນັກຮຽນໃນຂັ້ນປ.1 ຍັງສູງ ທີ່ກວມເອົາ 12,2%, ຮອງລົງມາແມ່ນອັດຕາການຄ້າງຫ້ອງຊັ້ນປະຖົມ ແລະອັດຕາການປະລະທີ່ຍັງສູງ ແລະອີກບັນຫາແມ່ນ ຈຳນວນໂຮງຮຽນມູນຍັງກວມ ອັດຕາສ່ວນສູງເກືອບ 16,8% ໃນນີ້ຢູ່ 6 ເມືອງໂຮງຮຽນມູນກວມເອົາ 24% ແລະບັນຫາການເຂົ້າຮຽນຂອງເດັກກໍ່ບໍ່ຖືກຕາມເກນອາຍຸ ແລະການຄ້າງຫ້ອງຂອງນັກຮຽນ ຊຶ່ງເປັນສາເຫດໜຶ່ງທີ່ເຮັດໃຫ້ນັກຮຽນປະລະການຮຽນກ່ອນຈົບ.
      ໂອກາດນີ້, ກອງປະຊຸມ ຍັງໄດ້ມີການປະກາດການຈັດຕັັ້ງພາຍໃນພະແນກສຶກສາທິການ ແລະກີລາແຂວງ, ຈາກນັ້ນໃນພິທີໄດ້ມີການລາຍງານຫຍໍ້ຜົນການປະເມີນກາງສະໄໝຂອງແຜນ 5 ປີ (2016-2020) ແລະຜົນການຈັດຕັ້ງປະຕິບັດ ແຜນພັດທະນາການສຶກສາປະຈຳປີ 2018 ແລະແຜນວຽກບູລິມະສິດປະຈຳປີ 2019, ຂະແໜງການແນະນຳ ວິທີແກ້ໄຂຕໍ່ບັນຫາ ແລະສິ່ງທ້າທາຍຂອງແຕ່ລະຂະແໜງ ການຍ່ອຍ ພ້ອມທັງມີການປະກອບຄຳຄິດຄຳເຫັນໃນບັນຫາຕ່າງໆຢ່າງກົງໄປກົງມາແນໃສ່ເຮັດໃຫ້ການຈັດຕັ້ງປະຕິບັດວຽກງານການສຶກສາໃນສົກປີ 2019 ໄດ້ຮັບຜົນສຳເລັດຕາມແຜນການຄາດໝາຍ. ພິເສດໃນວາລະກອງປະຊຸມຄັ້ງນີ້ຍັງໄດ້ມີການມອບ-ຮັບໃບຍ້ອງຍໍຂອງທ່ານລັດຖະມົນຕີກະຊວງສຶກສາທິການ ແລະກີລາໃຫ້ບັນດາເມືອງທີ່ມີຜົນງານດີເດັ່ນນຳອີກ.




ທີ່ມາ: ສະຫວັນພັດທະນາ ຂ່າວ / Savanhphuttana News
  • ຮູບພາບ

  • ແທັກທີ່ກ່ຽວຂ້ອງ