• ການແຂ່ງຂັນກີລາດອກປີກໄກ່ ລະດັບສາກົນ ຄັ້ງທີ 5 ປະຈໍາປີ 2019

ໂດຍ: ສີເປື້ອນມື 08 ກຸມພາ 2019 (13.46 ນ.) Read : 172

ໃນວັນທີ 08 ກຸມພາ 2019 ໄດ້ຈັດງານຖະແຫຼງຂ່າວການແຂ່ງຂັນກີລາດອກປີກໄກ່ ລະດັບສາກົນ ຄັ້ງທີ 5 ໃນລາຍການ Badminton Beerlao International Series 2019 ທີ່ຫ້ອງການຄະນະກໍາມະການໂອແລັມປິກແຫ່ງຊາດລາວ. ໃຫ້ກຽດເຂົ້າຮ່ວມໄດ້ແກ່: ທ່ານ ກະເສມ ອິນທະລາ ຮອງປະທານ ຄະນະກຳມະການໂອລັປິກແຫ່ງຊາດລາວ, ທ່ານ ສົມສະແຫວງ ແສງສີລາວົງ ຮັກສາການປະທານ ແລະ ເລຂາທິການ ສະຫະພັນດອກປີກໄກ່ແຫ່ງຊາດລາວ, ທ່ານ ຈັນສະໝອນ ຜອງຈັນທາ ຜູ້ຈັດການຝ່າຍການຕະຫຼາດ ບໍລິສັດ ເບຍລາວ ຈຳກັດ ແລະ Mr. Johan Arief ເລຂານຸການເອກ ສະຖານເອກອັກຄະລັດຖະທູດມາເລເຊຍ ປະຈຳ ລາວ ພ້ອມດ້ວຍນັກກີລາເຂົ້າຮ່ວມ.

ການ​ແຂ່ງຂັນ​ກີລາ​ດອກ​ປີກ​ໄກ່ ຊີງ​ແຊ້ມນາໆ​ຊາດ ຫຼືແບັດ​ມິນ​ຕັນ ​ເບຍ​ລາວ ອິນ​ເຕີ​ເນ​ຊັ່ນນນອລ ຊີຣີ 2019 ​(Badminton Beerlao International Series) ເພື່ອເປັນການສະສົມຄະແນນລະດັບໂລກ “​ເວີແລັງກິຈະຈັດຂຶ້ນໃນລະຫວ່າງວັນທີ 19-24 ກຸມພາ 2019 ແລະຄັ້ງນີ້ ລາວເຮົາໄດ້ຮັບກຽດໃນການເປັນເຈົ້າພາບຈັດງານ ຢູ່ທີ່ສະໂມສອນດອກປີກໄກ່ ບຶງຂະຫຍອງ ໂດຍໄດ້ຮັບການສະໜັບສະໜູນຫຼັກ ຈາກບໍລິສັດ ເບຍລາວ ຈໍາກັດ ເປັນເງິນຈໍານວນ 108 ລ້ານກີບ.

ໃນຂະນະທີ່ນັກກີລາດອກປີກໄກ່ ທີ່ຕິດລະດັບທອບ ອັນດັບ 100 ທົ່ວໂລກ 190 ກວ່າຄົນ ຈາກ 14 ປະເທດປະກອບມີ: ສປປ ລາວເປັນເຈົ້າພາບ, ​ໄທ, ຫວຽດນາມ, ມາເລເຊຍ, ສິງກະໂປ, ອົດສະຕາລີ, ຍີ່ປຸ່ນ, ອິນເດຍ, ​ອາເມລິກາ, ອັງກິດ, ​ການາດາ, ສະວີເດັນ, ​ເດັນມາກແລະອິນໂດເນເຊຍມີການຊີງໄຊທັງໝົດ 5 ລາຍການ ຄື: ປະເພດ​​ດ່ຽວຍິງ, ດ່ຽວຊາຍ, ຄູ່ຍິງ, ຄູ່ຊາຍ ແລະ ທີມຄູ່ປະສົມ.​ ສ່ວນທັບນັກກີລາດອກປີກໄກ່ລາວສົ່ງນັກກີລາຮ່ວມເຖິງ 23 ຄົນ, ຍິງ 3 ຄົນ ນຳທັບໂດຍທ້າວ ວິຊຸນນະລາດ ພິຈິດ ນັກກີລາດອກປີກໄກ່ ມື 1 ຂອງລາວ.

​​      ທ່ານ ບຸນຍະ​ແສງ ​ນະ​ຊຽງ​ຄຳ ຮອງ​ເລ​ຂາ​ທິ​ການ​ສະ​ຫະ​ພັນ​ດອກ​ປີກ​ໄກ່​ແຫ່ງ​ຊາດ​ລາວ ໃຫ້​ຮູ້​ວ່າ: ການ​ແຂ່ງ​ຂັນ​ຄັ້ງ​ນີ້ ມີ​ຄວາມ​ພ້ອມ​ 100% ໃນ​ໄລ​ຍະ​ກະ​ກຽມ​ ກໍ​ມີຜູ້​ຊຽວ​ຊານ​ສະ​ຫະ​ພັນ​ດອກ​ປີກ​ໄກ່ສາ​ກົນ​ ໄດ້​ລົງ​ມາ​ຕິດ​ຕາມ ແລະກວດ​ສອບສະ​ໜາມ​ແຂ່ງ​ຂັນ ແມ່ນ​ໃຫ້​ຜ່ານສາ​ມາດຈັດ​ການ​ແຂ່ງ​ຂັນ​ໄດ້​ຕາມ​ແຜນ​ທີ່​ວາງ​ໄວ້. ສະ​ນັ້ນ, ການ​ແຂ່ງ​ຂັນ​ຈະ​ບໍ່​ໄດ້​ເກັບບັດເຂົ້າຊົມ​​ຈາກ​ແຟນ​ພັນ​ແທ້ດອກ​ປີກ​ໄກ່​ລາວ ​ທຸກ​ຄົນສາ​ມາດ​ຕິດ​ຕາມເຂົ້າ​ຮ່ວມ​ຊົມ ແລະເຊຍ​ໄດ້​​ແບບຟ​ຣີ. ລາຍ​ການ​ດັ່ງ​ກ່າວ ໃນເບື້ອງ​ຕົ້ນ​​ມີນັກ​ກກີລາ​ດອກ​ປີກ​ໄກ່​ລາວ ລົງ​ທະ​ບຽນ​ເຂົ້າ​ຮ່ວມ​ແຂ່ງ​ຂັນ 31 ຄົນ ແຕ່​ຜ່ານ​ການ​ສະ​ມັກ ແລະຄັດ​ເລືອກ​ຕົວ​ຈິງ​ ໄດ້​ພຽງ 23 ຄົນ, ຍິງ 3 ຄົນ. ປັດ​ຈຸ​ບັນ​ໄດ້​ເກັບ​ຕົວ​ເຝິກ​ຊ້ອມ​ຢ່າງເຕັມ​ທີ່ ໂດຍ​ມີ​ຄູ​ຝຶກ​ຕ່າງ​ປະ​ເທດ​ຝຶກ​ຊ້ອມ​ໃຫ້ ​ທີ່​ສະ​ໂມ​ສອນ ດອກ​ປີກ​ໄກ່ ເດ​ຖາ ພວກ​ເຮົາ​ຕັ້ງ​ເປົ້າ​ໄວ້​ທີ່ ປະ​ເພດ​ຄູ່​ຊາຍ ແລະຄູ່​ປະ​ສົມ ຈະສາ​ມາດ​ຜ່ານ​​ເຂົ້າ​ເຖິງຮອບ 8 ຄົນ​ສຸດ​ທ້າຍ ​ໂດຍ​ຈະ​ມີ​ການ​ຊີງ​ເງິນ​ລາງວັນ​ລວມ 87 ລ້ານ​ກີບ ຫຼືປະ​ມານ 10.000 ​ໂດ​ລາ​. ​ສຳ​ລັບລາງວັນ​ທີ 1 ​ແຕ່​ລະ​ລາຍ​ການຈະໄດ້​ເງິນ 7 ລ້ານ​ກີບ, ທີ 2 ຈະ​ໄດ້​ເງິນ​ລາງວັນ ລາຍ​ການ​ລະ 3,5 ລ້ານ​ກີບ. ສ່ວນ​ນັກ​ກກີລາທີ່ເຂົ້າ​ຮອບ​ຮອງ​ຊະ​ນະ​ເລີດ  ຈະ​ໄດ້​ເງິນ​ລາງວັນ ລາຍ​ການ​ລະ 1,8 ລ້ານ​ກີບ ແລະຖ້າຜ່ານ​ເຂົ້າ​ຮອບ 8 ທີມ ຈະ​ໄດ້​ເງິນ​ລາງວັນ ລາຍ​ການ​ລະ 1 ລ້ານ​ກີບ.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ