• ຊ້າງເທົ້າຫຼັງ ແຮງຍູ້ໜຸນສຳຄັນທີ່ຈະຊ່ວຍໃຫ້ຜູ້ຊາຍປະສົບຜົນສຳເລັດ.

ໂດຍ: Admin Mahason 20 ກັນຍາ 2017 (00.00 ນ.) Read : 1,141

     ຜູ້ຊາຍຫຼາຍຄົນເຊື່ອໝັ້ນວ່າ ຊີວິດທີ່ປະສົບຜົນສຳເລັດສາມາດສ້າງຂຶ້ນດ້ວຍຕົນເອງ ແລະພວກເຂົາເຫຼົ່ານັ້ນກໍເຊື່ອວ່າຫາກປະສົບຜົນສຳເລັດໃນໜ້າທີ່ວຽກງານ, ມີຖານະ, ມີກຽດຕິຍົດຊື່ສຽງ ພວກເຂົາກໍຈະສາມາດມີຄົນຮັກທີ່ດີ ແລະມີຄອບຄົວທີ່ສົມບູນແບບໄດ້.
 
     ແຕ່ຄວາມຈິງແລ້ວການມີຄູ່ຊີວິດທີ່ດີຕ່າງຫາກທີ່ຈະຊ່ວຍໃຫ້ຜູ້ຊາຍປະສົບຜົນສຳເລັດໄດ້ຢ່າງວ່ອງໄວ. ຍົກຕົວຢ່າງ ເຮນຣີ ຟອດ ຜູ້ມີຄວາມຄິດຢາກຜະລິດພາຫະນະທີ່ໄວກວ່າມ້າແລ່ນ ໃນເບື້ອງຕົ້ນບໍ່ມີໃຜເຊື່ອໃນຄວາມຄິດຂອງລາວແລະເຫັນມັນເປັນເລື່ອງຕະຫຼົກ ມີແຕ່ ຄລາຣ່າ ໄບຣອັນ ເມຍຂອງລາວເທົ່ານັ້ນທີ່ເຊື່ອໝັ້ນ, ແຕ່ລະມື້ ສອງຜົວເມຍຈະພາກັນລຸກແຕ່ເຊົ້າໆຕັ້ງແຕ່ຊາວບ້ານບໍ່ທັນຕື່ນເພື່ອໄປທົດລອງລົດຈຳລອງ. ຈົນໃນທີ່ສຸດ ເຮນລີ ຟອດກໍປະສົບຜົນສຳເລັດ ກາຍເປັນຜູ້ຜະລິດລົດຍົນລາຍທຳອິດຂອງໂລກ ຍີ່ຫໍ້ Ford. 

     ເຊັ່ນດຽວກັບເລື່ອງລາວຂອງອາດີດປະທານາທິບໍດີສະຫະລັດອາເມຣິກາ ບາລັກ ໂອບາມາ ທີ່ມີນາງມິດເຊວ ຜູ້ເປັນພັນລະຍາຄອຍຊ່ວຍເຫຼືອສົ່ງເສີມໃຫ້ ບາລັກ ລົງສະໝັກຕຳແໜ່ງປະທານາທິບໍດີ ຈົນໃນທີ່ສຸດບາລັກກໍກາຍເປັນປະທານາທິບໍດີຜິວສີຄົນທຳອິດຂອງສະຫະລັດ ເຖິງ 2 ສະໄໝ. ມີຄັ້ງໜຶ່ງມິວເຊວເຄີຍເລົ່າວ່າ ສະໄໝເປັນສາວມີເຈົ້າຂອງພັດຕະຄານມາຫຼົງຮັກນາງ ແຕ່ນາງບໍ່ຮັບຮັກຂອງລາວ. ບາລັກຟັງແລ້ວກໍຫົວຂວັນແລ້ວເວົ້າຂຶ້ນວ່າ ຖ້າມື້ນັ້ນມິດເຊວຕອບຕົກລົງ ປານນີ້ກໍຄົນໄດ້ເປັນເມຍເຈົ້າຂອງພັດຕະຄານໄປແລ້ວ. ແຕ່ມິດເຊວເວົ້າວ່າ “ບໍ່ດອກ! ຫາກຂ້ອຍແຕ່ງງານກັບລາວ ຜູ້ຊາຍຄົນນັ້ນຈະບໍ່ໄດ້ເປັນພຽງເຈົ້າຂອງພັດຕະຄານ ແຕ່ລາວຈະກາຍເປັນປະທານາທິບໍດີ.” ນັ້ນໝາຍຄວາມວ່າແມ່ຍິງຄົນນີ້ເຊື່ອໝັ້ນໃນຕົນເອງຢ່າງແຮງກ້າວ່າຈະຊ່ວຍຍູ້ໜຸນຜົວຂອງຕົນໃຫ້ໄປສູ່ທີ່ສູງໄດ້ຢ່າງສຳເລັດ. 

     ຫາກທ່ານເປັນຜູ້ຊາຍທີ່ກະຫາຍໃນຄວາມສຳເລັດໃນຊີວິດ ການເລືອກຄູ່ຄອງທີ່ດີຈະຊ່ວຍໃຫ້ທ່ານມີໄຊໄປກວ່າເຄິ່ງ! ບາງຄົນເວົ້າວ່າ ການແຕ່ງງານ ແລະການມີຄອບຄົວຄືໂຕຖ່ວງຄວາມສຳເລັດ ແຕ່ມັນຈະບໍ່ເປັນແບບນັ້ນເລີຍ! ຫາກທ່ານມີຄອບຄົວທີ່ດີ ໂດຍສະເພາະມີພັນລະຍາທີ່ສະຫຼຽວສະຫຼາດ ມີຄວາມສາມາດໃນການເບິ່ງແຍງອົບຮົມລູກເຕົ້າ, ມີຄວາມເຂົ້າອົກເຂົ້າໃຈ ແລະພ້ອມທີ່ຈະສະໜັບສະໜູນທ່ານຢ່າງບໍ່ຮູ້ອິດຮູ້ເມື່ອຍ. ມັນດີໃດ! ຫາກມື້ໜຶ່ງທີ່ທ່ານລົ້ມເຫຼວ ແຕ່ທ່ານຍັງມີລູກ ແລະພັນລະຍາທີ່ໜ້າຮັກຄອຍຢູ່ຄຽງຂ້າງ. ແນ່ນອນ! ມັນຈະດີທີ່ສຸດຫາກໃນມື້ທີ່ທ່ານປະສົບຜົນສໍາເລັດແລ້ວມີລູກ ແລະພັນລະຍາຄອຍສະແດງຄວາມຍິນດີ. ນັ້ນລະ! ຄວາມຄວາມສຸກອັນຍອດຍິ່ງໃນຊີວິດຂອງລູກຜູ້ຊາຍຄົນໜຶ່ງ. 

     ອ່ານມາເຖິງວ່ານີ້ແລ້ວ ເຊື່ອວ່າໜຸ່ມໂສດຫຼາຍຄົນຄົງກຳລັງຊອກຫາຄູ່ຊີວິດທີ່ມີຄຸນສົມບັດໃນການເປັນຊ້າງເທົ້າຫຼັງທີ່ສາມາດຍູ້ດັນທ່ານໄປສູ້ຄວາມສຳເລັດ ແຕ່ຢ່າລືມເດີວ່າ ແມ່ຍິງທີ່ທັງງາມທັງເກັ່ງມີຄວາມພຽບພ້ອມດ້ວຍຄຸນສົມບັດເຫຼົ່ານັ້ນ ພວກເຂົາກໍມີຄວາມຄາດຫວັງຢາກໄດ້ຄູ່ຊີວິດ ຫຼືຜູ້ນຳຄອບຄົວທີ່ດີເຊັ່ນດຽວກັນ.



ທີ່ມາ:
  • ແທັກທີ່ກ່ຽວຂ້ອງ