• ສິ່ງທີ່ຄວນເຮັດເພື່ອໃຫ້ມີຊີວິດທີ່ດີຕ້ອນຮັບປີໃໝ່

ໂດຍ: ແມວດຳ 10 ມັງກອນ 2019 (13.36 ນ.) Read : 446

ປີເກົ່າກຳລັງຜ່ານໄປ ປີໃໝ່ເຄື່ອນມາ, ໃນຂະນະດຽວກັນແຕ່ລະທ່ານກໍຢ່າລືມວາງແຜນວ່າ ຄວນຈະເຮັດແນວໃດເພື່ອໃຫ້ຊີວິດດີຂຶ້ນໃນມື້ເລີ່ມຕົ້ນປີໃໝ່.

ຖິ້ມທຸກໄວ້ກັບປີເກົ່າ:ໂດຍສະເພາະຄວາມຮູ້ສຶກໂສກເສົ້າ, ຄວາມລົ້ມເຫຼວທີ່ເກີດຂຶ້ນໃນປີເກົ່າກໍບໍ່ຄວນເກັບເອົາມາຄິດ ແລະທຳລາຍໂຕເອງ, ຂໍໃຫ້ເກັບໄວ້ເປັນບົດຮຽນ, ເຕືອນສະຕິໃນການດຳເນີນຊີວິດເພື່ອບໍ່ໃຫ້ເກີດຄວາມຜິດພາດຄືປີເກົ່າກໍພຽງພໍແລ້ວ.

ວາງແຜນຊີວິດຕັ້ງແຕ່ຕົ້ນປີ:ເປັນສິ່ງສຳຄັນທີ່ຈະເຮັດໃຫ້ເຮົາບໍ່ປ່ອຍເວລາໃຫ້ຜ່ານໄປແບບໄຮ້ຄ່າ, ພ້ອມນີ້ ຈະເຮັດໃຫ້ເຮົາເລີ່ມເຮັດສິ່ງທີ່ດີໃຫ້ກັບຊີວິດ ແລະເຮັດໃຫ້ເຮົາປະສົບຜົນສຳເລັດໄດ້ຕາມເປົ້າໝາຍທີ່ເຮົາຕັ້ງໄວ້ບໍ່ມີຜິດພາດ.

ຄິດດີ, ເວົ້າດີ ແລະເຮັດດີ:ຄວາມດີເປັນສິ່ງທີ່ຊ່ວຍຊຸກຍູ້ໃຫ້ຊີວິດຂອງທ່ານກ້າວໜ້າໄດ້ຢ່າງໝັ້ນຄົງ, ຖ້າທ່ານເຮັດທຸກຢ່າງດ້ວຍຄວາມດີ, ຖືກຕ້ອງ ແລະຊື່ສັດສຸຈະລິດ ທ່ານກໍຈະຖືກຍອມຮັບ ແລະໄດ້ຮັບຄວາມເຄົາລົບນັບຖືຈາກຄົນອ້ອມຂ້າງ.

ຮັກສາສຸຂະພາບທັງກາຍ ແລະໃຈ:“ການມີສຸຂະພາບດີເປັນລາບອັນປະເສີດ”, ເຖິງແມ່ນວ່າສຸຂະພາບກາຍຈະແຂງແຮງແຕ່ສຸຂະພາບໃຈໝົ່ນໝອງ ມັນກໍອາດເປັນອຸປະສັກກັບການດຳລົງຊີວິດ ຈົນບໍ່ສາມາດເຮັດສິ່ງໃດໜຶ່ງໃຫ້ສຳເລັດໄດ້, ດັ່ງນັ້ນ ຄວນເບິ່ງແຍງ, ຮັກສາສຸຂະພາບກາຍ ແລະໃຈຂອງທ່ານໃຫ້ແຂງແຮງ ແລະເຂັ້ມແຂງພ້ອມຕໍ່ສູ້ກັບອຸປະສັກສະເໝີ.

ຢ່າຢຸດພັດທະນາຕົນເອງ:ໃນໂລກນີ້ບໍ່ມີສິ່ງໃດທີ່ຈະຢຸດຢູ່ບ່ອນເກົ່າ, ດັ່ງນັ້ນ ຈົ່ງເປີດໃຈສຶກສາ, ຮັບເອົາຄວາມຮູ້ໃໝ່ໆເພື່ອພັດທະນາຕົນເອງໃຫ້ດີຂຶ້ນທຸກໆມື້. ເພາະສິ່ງດັ່ງກ່າວຈະເຮັດໃຫ້ທ່ານສາມາດຮັບມືກັບ ອຸປະສັກທຸກຮູບແບບ ແລະເປັນຜູ້ທີ່ປະສົບຄວາມສຳເລັດຢ່າງໝັ້ນຄົງ.

ໃນຄວາມເປັນຈິງແລ້ວ ບໍ່ຕ້ອງຖ້າໃຫ້ຮອດມື້ປີໃໝ່ ແຕ່ຊີວິດຂອງພວກເຮົາສາມາດເລີ່ມຕົ້ນໃໝ່ໄດ້ທຸກໆມື້ ພຽງແຕ່ມີຄວາມມຸ່ງໝັ້ນ, ບໍ່ທໍ້ຖອຍ, ຫວັ່ນໄຫວກັບອຸປະສັກທີ່ຜ່ານເຂົ້າມາ ແລະວາລະສານມະຫາຊົນກໍຂໍອວຍພອນໃຫ້ທ່ານຜູ້ອ່ານທຸກທ່ານຈົ່ງມີຄວາມສຸກໃນມື້ເລີ່ມຕົ້ນປີໃໝ່ຕະຫຼອດປີ ແລະຕະຫຼອດໄປ.


ທີ່ມາ:
  • ແທັກທີ່ກ່ຽວຂ້ອງ